འཇིཌ་བྲལ་གློག་བརྙན་བཟོ་སྒྲིག་པའི་ལས་རོཌ་འཛིན་བཟུང་།

༄༅༎རྒྱ་ནག་གི་བོད་ཐོག་དབང་སྒྱུར་ལ་སྐྱོན་བརྗོད་ཀྱི་གློག་བརྙན་འཇིགས་བྲལ་ཞེས་པ་དེ་བཟོ་སྒྲིག་གནང་མཁན་དོན་གྲུབ་དབང་ཆེན་ལགས་ཀྱི་ཕྱག་རོགས་མགོ་ལོག་འཇིགས་མེད་ལགས་རྒྱ་ནག་དབང་འཛིན་པ་ཚོས་བསྐྱར་དུ་འཛིན་བཟུང་ཐེངས་གཉིས་པ་དེ་བྱས་འདུག

བོད་ཀྱི་འགྲོ་བ་མིའི་ཐོབ་ཐང་དང་དམངས་གཙོ་འཕེལ་རྒྱས་ལྟེ་གནས་ཁང་གིས་གསུང་དོན་ལ་འཇིགས་མེད་རྒྱ་མཚོ་འམ་མགོ་ལོག་འཇིགས་མེད་ལགས་ཞུ་བ་ཕྱི་ཟླ་གསུམ་པའི་ཚེས་བཅུ་ཉིན་ཀན་ལྷོ་བོད་རིགས་རང་སྐྱོང་ས་ཁུལ་གྱི་གཟང་ཆུ་རྫོང་ནང་ཁོང་གི་བཞུགས་གནས་ནས་རྒྱ་མིས་འཛིན་བཟུང་བྱས་ཡོད་པ་རེད། མདོ་སྨད་བླ་བྲང་དགོན་པའི་དགེ་འདུན་པ་འཇིགས་མེད་རྒྱ་མཚོ་ལགས་སྔ་ལོ་ཕྱི་ཟླ་གསུམ་པའི་ཚེས་ཉི་ཤུ་གསུམ་ཉིན་རྒྱ་མིས་འཛིན་བཟུང་བྱས་ནས་ཕྱི་ཟླ་བཅུ་པའི་ཚེས་བཅོ་ལྔ་ཉིན་གློད་བཀྲོལ་བཏང་ཡོད་པ་རེད། སྔ་ལོ་ཉིས་སྟོང་བརྒྱད་ལོར་རྒྱ་ནག་ནང་འཛམ་གླིང་ཨོ་ལིམ་པིག་རྩེད་འགྲན་མ་ཚུགས་གོང་འགྲེམས་སྤེལ་བྱས་པའི་འཇིགས་བྲལ་གློག་བརྙན་གྱིས་རྒྱ་ནག་གིས་བོད་ཐོག་འཛིན་པའི་བྱ་སྤྱོད་ངན་པར་ཐེར་འདོན་བྱས་ཡོད་པ་དང་མགོ་ལོག་འཇིགས་མེད་ལགས་ཀྱིས་གློག་བརྙན་དེ་བཟོ་སྒྲིག་གནང་མཁན་དོན་གྲུབ་དབང་ཆེན་ལགས་སུ་ཕྱག་རོགས་གནང་ཡོད་པ་རེད།

གནས་ཚུལ་དབྱུང་ཁུངས་ནས་འགྲེལ་བརྗོད་གནང་དོན་ལ་རྒྱ་མིའི་དབང་འཛིན་པས་མགོ་ལོག་འཇིགས་མེད་ལགས་བསྐྱར་དུ་འཛིན་བཟུང་བྱེད་དགོས་པའི་རྒྱུ་མཚན་གང་ཡང་བཤད་མེད་པ་དང་ད་ཆ་ཁོང་གར་ཡོད་སུས་ཀྱང་ཤེས་རྟོག་མེད་པ་རེད།

གློག་བརྙན་འཇིགས་བྲལ་བཟོ་སྒྲིག་གནང་མཁན་དོན་གྲུབ་དབང་ཆེན་ལགས་སྔ་ལོ་ཕྱི་ཟླ་གསུམ་པའི་ཚེས་ཉི་ཤུ་གསུམ་ཉིན་རྒྱ་མིས་འཛིན་བཟུང་བྱས་ཡོད་པ་དང་ད་ལྟའི་ཆར་ཁོང་འཛིན་བཟུང་དོ་དམ་འོག་ཡོད་མུས་ཡིན་ནའང་ས་གནས་གར་ཡོད་རྩད་གཅོད་ཐུབ་ཀྱི་མེད་པའི་གནས་ཚུལ་ཐོན་འདུག།