པེ་ཅིན་ནང་བཟོ་གྲྭ་མང་པོ་གནས་སྐབས་ལས་མཚམས་འཇོག་རྒྱུ།

༄༅༎རྒྱ་ནག་གཞུང་གིས་པེ་ཅིན་ཨོ་ལིམ་པིག་རྩེད་འགྲན་གྱི་གོང་པེ་ཅིན་ནང་གི་མཁའ་རླུང་བཙོག་པའི་གནས་སྟངས་དེར་འགྱུར་ལྡོག་གཏོང་ཆེད་པེ་ཅིན་དང་ཐག་ཉེ་རིང་མཚམས་ཀྱི་གྲོང་ཁྱེར་དང་ཞིང་ཆེན་ཁག་ནང་གི་བཟོ་གྲྭ་མང་པོ་ཞིག་གནས་སྐབས་ལས་མཚམས་འཇོག་རྒྱུའི་ལས་དོན་སྤེལ་བཞིན་ཡོད་པ་ལྟར། པེ་ཅིན་དང་ཐག་ཉེ་བའི་རྒྱ་ནག་གི་མཚོ་ཁའོ་གྲོང་ཁྱེར་ཐན་ཅིན་ནང་བཟོ་གྲྭ་ཁག་༤༠ཙམ་ཕྱི་ཟླ་བདུན་པའི་ཚེས་༢༥ནས་ཕྱི་ཟླ་དྲུག་པའི་ཚེས་༢༠བར་ལས་མཚམས་འཇོག་རྒྱུའི་ཐག་གཅོད་བྱས་ཟིན་ཡོད་པ་རེད། པེ་ཅིན་གྱི་མཁའ་རླུང་འབག་བཙོག་གི་གནད་དོན་དེ་བཞིན་པེ་ཅིན་ཨོ་ལིམ་པིག་རྩེད་འགྲན་གྱི་མགྲོན་བདག་རྒྱ་ནག་ལ་དཀའ་གནད་ཆེན་པོ་ཞིག་ཡིན་པ་མ་ཟད། ཕྱི་རྒྱལ་གྱི་ལུས་རྩལ་མི་ཉུང་བ་ཞིག་ཡང་ཨོ་ལིམ་པིག་རྩེད་འགྲན་ནང་བཞུགས་རྒྱུ་མིན་པའི་རྒྱུ་མཚན་གལ་ཆེ་ཞིག་ཡང་ཆགས་ཀྱི་ཡོད་པར་བརྟེན་། རྒྱ་ནག་གཞུང་གིས་གནད་དོན་དེར་ཐག་གཅོད་ཡོང་རྒྱུར་འཆར་གཞི་མང་པོ་བཏོན་ཡོད་ཅིང་། དེ་ཚོའི་ཁྲོད་འཁོར་ཡུག་འབག་བཙོག་ཤུགས་ཆེན་པོ་བཟོ་མཁན་གྱི་བཟོ་གྲྭའི་རིགས་པེ་ཅིན་ནས་གནས་སྐབས་གནས་སྤོས་བྱེད་བཅུག་ཡས་དང་གནས་སྐབས་ལས་གཉེར་བྱ་རྒྱུ་མཚམས་འཇོག་བྱེད་བཅུག་ཡས་། དེ་བཞིན་ཨོ་ལིམ་པིག་རྩེད་འགྲན་རིང་པེ་ཅིན་ནང་མོ་ཊ་འགྲོ་འོང་བྱེད་ཡས་ཉུང་དུ་གཏོང་རྒྱུ་སོགས་ཀྱི་འཆར་གཞི་མང་པོ་ཞིག་ལག་བསྟར་བྱེད་ཀྱི་ཡོད་པ་རེད༎