ནི་དར་ལེནྚ་གྲོས་ཚོགས་ཀྱིས་བོད་དོན་དང་འབྲེལ་བའི་གྲོས་ཆོད་གསུམ་མང་མོས་ཐོག་གཏན་འབེབས་གནང་འདུག

ཕྱི་ལོ་ ༢༠༢༥ ཟླ་བ་ ༤ ཚེས་ ༡༥ ཉིན་ཡུ་རོབ་ནི་དར་ལེནྚ་གྲོས་ཚོགས་ཀྱིས་ཡུ་རོབ་མཐུན་ཚོགས་ནང་བོད་དོན་དམིགས་བསལ་འབྲེལ་མཐུད་པ་བསྐོ་བཞག་ཡོང་ཐབས་དང་འབྲེལ་བོད་དོན་དང་འབྲེལ་བའི་གྲོས་ཆོད་གསུམ་མང་མོས་ཐོག་གཏན་འབེབས་གནང་འདུག

དེ་ཡང་ཡུ་རོབ་ནེ་དར་ལེནྚ་གྲོས་ཚོགས་སུ་བོད་དོན་དང་འབྲེལ་བའི་གྲོས་གཞི་ཡུ་རོབ་མཐུན་ཚོགས་ཀྱི་བོད་དོན་དམིགས་བསལ་འབྲེལ་མཐུད་པ་བསྐོ་བཞག་དང་། ཨ་རིའི་བོད་རྒྱའི་རྩོད་རྙོག་སེལ་ཐབས་ཀྱི་ཁྲིམས་ཡིག་རྗེས་མཐུན་ཁྲིམས་ཡིག་གཏན་འབེབས་ཡོང་ཐབས་དང་། རྒྱ་ནག་གཞུང་གིས་༸གོང་ས་༸ཏཱ་ལའི་བླ་མ་མཆོག་གི་ཡང་སྲིད་ངོས་འཛིན་གནང་སྒོར་ཐེ་བྱུས་བྱེད་པར་དགག་པ་དང་། རྒྱལ་སྤྱིའི་སྤྱི་ཚོགས་ལ་འབོད་སྐུལ་ཞུ་ཐབས། བོད་ནང་འགྲོ་བ་མིའི་ཐོབ་ཐང་རྡོག་རོལ་གཏོང་བཞིན་པའི་གནས་སྟངས་གླེང་སློང་བྱ་རྒྱུ་བཅས་ཀྱི་ཐོག གྲོས་ཚོགས་སུ་གླེང་སློང་གིས་མང་མོས་ཐོག་གཏན་འབེབས་གནང་འདུག

དེ་སྔ་ཕྱི་ལོ་ ༢༠༢༤ ལོར་ཨ་རི་གཞུང་གིས་བོད་རྒྱའི་རྩོད་རྙོག་སེལ་བར་སྐུལ་འདེད་གཏོང་བའི་ཁྲིམས་ཡིག་གཏན་འབེབས་བརྒྱུད་བོད་དོན་ལ་ངོས་འཛིན་དང་རྒྱབ་སྐྱོར་རྒྱབ་སྣོན་གནང་ཡོད་ཅིང་། དེ་འབྲེལ་བོད་མིའི་སྒྲིག་འཛུགས་གཙོས་པའི་ཚོགས་སྡེ་ཁག་ཅིག་ནས་ཡུ་རོབ་མཐུན་ཚོགས་མཚོན་པའི་ཡུ་རོབ་ནང་བོད་དོན་ལ་རྒྱབ་སྐྱོར་གྱི་གྲོས་ཆོད་ཁྲིམས་འཆར་གཏན་འབེབས་ཡོང་བར་འབོད་སྐུལ་ཞུ་གཏུག་རིམ་གནང་དང་གནང་མུས་ཡིན་པ་རེད། །

གསར་འགོད་པ། བསྟན་འཛིན་བསྟན་སྐྱོང་། 

རྩོམ་སྒྲིག་པ། བསྟན་འཛིན་པདྨ། 

དྲྭ་ཐོག་སྤེལ་མཁན། བསྟན་འཛིན་བསྟན་སྐྱོང་།