༸གོང་ས་མཆོག་གི་སྲུང་སྐྱོབ་དམ་བསྒྲགས་ཆེ་རུ་བཏང་ཡོད་འདུག

༄༅༎བོད་མིའི་བླ་ན་མེད་པའི་དབུ་ཁྲིད་༸སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་སྐུ་ཕྱར་ཉེན་ཁ་ཡོད་པའི་གསང་བའི་སྙན་ཐོ་འབྱོར་བའི་རྗེས་སུ་སྲུང་སྐྱོབ་དམ་བསྒྲགས་ཆེ་རུ་བཏང་ཡོད་འདུག༎

འདི་ཚེས་ཉི་ཤུ་གཉིས་ཉིན་རྒྱ་གར་གྱི་ཉིན་རེའི་གསར་ཤོག་ཧིན་རྡུསེཏན་ཁྲའེམསེ་ཞེས་པས་གནས་ཚུལ་སྤེལ་དོན་ལྟར་ན་༸གོང་ས་༸སྐྱབས་མགོན་ཆེན་པོ་མཆོག་གི་མཛད་པར་ཁག་ཅིག་ལ་མི་འདོད་པའི་སྒྲིགས་འཛུགས་ཤིག་གིས་༸གོང་ས་མཆོག་གི་སྐུ་ཕྱར་འགལ་རྐྱེན་བཟོ་རྒྱུའི་ལྐོག་བྱུས་བཏིང་གི་ཡོད་པའི་གསང་གནས་མཁོ་གྲུབ་ཀྱི་རྗེས་སུ་སྐུའི་ཉེན་སྲུང་འགན་ཁུར་ཡོད་པའི་སྒྲིག་འཛུགས་ཁག་གིས་ཕོ་བྲང་གི་ཁོར་ཡུག་གི་སྲུང་སྐྱོབ་དམ་ཏུ་གཏོང་ཡོད་པ་མ་ཟད་༸གོང་ས་མཆོག་ལ་ཕྱི་རྒྱལ་ལ་ཆིབས་བསྒྱུར་གྱི་མཛད་འཆར་མཁོ་བསྡུ་གནང་ཡོད་པའི་དགོངས་འཆར་ཡང་ཕུལ་ཡོད་འདུག

གསང་བའི་སྙན་ཐོ་ཁག་ལ་ཞིབ་འཇུག་གནང་བའི་རྗེས་སུ་སྐུའི་སྲུང་ཕྱར་དམ་བསྒྲགས་ཆེ་རུ་གཏོང་རྒྱུར་ཐག་གཅོད་ཀྱིས་མངའ་སྡེའི་སྲུང་སྐྱོབ་དཔོན་རིགས་དང་བཙལ་བྱོད་བོད་གཞུང་བདེ་སྲུང་ལས་ཁུངས་ཀྱི་བཀའ་བློན་གདོང་ཆུང་དངོས་གྲུབ་མཆོག་གཙོས་པའི་འབྲེལ་ཡོད་རྣམས་དང་ལྷན་འཛོམས་ཀྱིས་ཕོ་བྲང་གི་ཉེན་སྲུང་ཡོ་ཆས་ཁ་སྣོན་མཁོ་གྲུབ་གནང་རྒྱུ་མ་ཟད་སྐུ་སྒེར་ཡིག་ཚང་གི་ལས་བྱེད་རྣམས་ལ་ཉེར་མཁོའི་ཉེན་སྲུང་ཟབ་སྦྱོང་གནང་རྒྱུ་ཡིན་ལུགས་ཉེན་སྲུང་འགན་འཛིན་སྤྱི་ཁྱབ་ཨེ་པི་སི་རྡིཁ་གིས་རྒྱས་བཤད་མེད་པའི་ཐོག་གསལ་བསྒྲགས་གནང་བཞག  ས་གནས་རྒྱ་གར་ཕྱི་སྲིད་ལས་ཁུངས་ཀྱི་འབྲེལ་མཐུད་ལས་ཁུངས་ནས་ཀྱང་ཕོ་བྲང་དང་གཙུག་ལག་ཁང་གི་གཡས་གཡོན་དུ་གསང་བའི་བརྙན་འཕྲིན་གསར་འཛུགས་གནང་དགོས་ལུགས་འབྲེལ་ཡོད་ལ་བཀོད་ཁྱབ་བཏང་ཡོད་འདུག ཉེ་ལམ་༸གོང་ས་མཆོག་རྒྱ་གར་བྱང་ཤར་གྱི་མངའ་སྡེ་ཨ་རུ་ན་ཅལ་ནང་ཆིབས་བསྒྱུར་བསྐྱངས་པའི་རྗེས་སུ་སྐུ་ཕྱ་དང་འབྲེལ་བའི་གནས་ཚུལ་འདྲ་མིན་བྱུང་ཡོད་པར་བརྟེན་སྲུང་སྐྱོབ་དམ་ཏུ་བཏང་ཡོད་འདུག གོང་ཞུས་གསར་ཤོག་ལ་ཁུངས་ལྡན་གནས་ཚུལ་མཁོ་སྤྲོད་བྱས་པར་གཞིགས་ནས་༸གོང་ས་མཆོག་གི་མཛད་བྱུས་ཁག་ཅིག་ལ་མི་དགའ་བའི་ཤུགས་ལྡན་ཚོགས་པས་བཙན་བྱོལ་བོད་མིའི་གཞིས་ཆགས་ཁག་ནང་གསང་བའི་ལས་འགུལ་འདྲ་མིན་སྤེལ་གྱི་ཡོད་ལུགས་འགྲེལ་བརྗོད་བྱས་འདུག༎