ནང་སེམས་ཀྱི་བདེ་སྐྱིད་བསྐྲུན་ཐབས་སུ་ནང་ཆོས་ལ་སློབ་སྦྱོང་བྱེད་གལ་ཆེ། ༧གོང་ས་མཆོག་གིས།

ནང་སེམས་ཀྱི་བདེ་སྐྱིད་བསྐྲུན་ཐབས་སུ་ནང་ཆོས་ལ་སློབ་སྦྱོང་བྱེད་གལ་ཆེ་བ་༧གོང་ས་སྐྱབས་མགོན་ཆེན་པོ་མཆོག་གིས་བལ་ཡུལ་ཤར་ཁུམ་གྱི་སློབ་ཕྲུག་ཁག་ཅིག་ལ་བཀའ་སྩལ་འདུག
བོད་ཀྱི་བླ་ན་མེད་པའི་དབུ་ཁྲིད་སྤྱི་ནོར་༧གོང་ས་སྐྱབས་མགོན་ཆེན་པོ་མཆོག་གིས་བཞུགས་སྒར་ཕོ་བྲང་དུ། འདི་ཚེས་༢༧་ཉིན་བལ་ཡུལ་ཤར་ཁུམ་རྣམ་ཆེ་ནས་ཡིན་པའི་སློབ་ཕྲུག་ཁག་ཅིག་ལ་མཇལ་ཁའི་སྐབས། ནང་སེམས་ཀྱི་ཞི་བདེ་བསྐྲུན་ཐབས་ཆེད་དུ་དེང་དུས་ཤེས་ཡོན་ཐོག་ནང་ཆོས་ལ་སློབ་སྦྱོང་བྱེད་དགོས་པ་དེ་གལ་ཆེན་པོ་ཡིན་པ་མ་ཟད། བོད་མི་རིགས་སྤོབས་པ་སྐྱེས་འོས་པའི་བོད་པའི་ཆོས་དང་རིག་གཞུང་གཏིང་ཟབ་ཡོད་པ་དེའི་ཐོག་དོ་སྣང་བྱེད་དགོས་པ་དེ་ཧ་ཅང་གལ་ཆེན་པོ་ཡིན་པ་བཀའ་སྩལ་འདུག
སློབ་ཕྲུག་གི་སྣེ་ཁྲིད་བྱེད་མཁན་ཚེ་རིང་དགྲ་འདུལ་ལགས་ཀྱིས། ད་རེས་སློབ་ཕྲུག་ཚོར་༧གོང་ས་སྐྱབས་མགོན་ཆེན་པོ་མཆོག་གིས་མཇལ་ཁ་དང་བཀའ་སློབ་ཕེབས་པ་ནི་ཧ་ལས་པའི་སྐལ་བ་བཟང་པོ་ཞིག་ལ་ངོས་འཛིན་ཞུ་བཞིན་འདུག
ཁོང་གིས་སློབ་ཕྲུག་ཚོ་བོད་དང་བལ་ཡུལ་ས་མཚམས་ཤར་ཁུམ་རྣམ་ཆེ་ས་གནས་ནང་ཡོད་པའི་ཤ་རི་ཧི་མ་ལ་ཡ་གཞི་རིམ་སློབ་གྲྭ་ནས་ཡིན་ཅིང་། ཉམས་ཐག་ཕྲུག་གུ་མང་མོ་ཞིག་སོ་སོའི་ནང་ནས་སློབ་གྲྭ་དང་ཐག་རིང་པོ་ཡོང་དགོས་ཀྱི་ཡོད་སྟབས། ཁོང་ཚོའི་དཀའ་ངལ་སེལ་སླད་ངས་སློབ་ཕྲུག་ཚོའི་ཆེད་དུ་སྡོད་ཁང་གསར་བ་རྒྱབ་ཡོད་ཅེས་འགྲེལ་བརྗོད་གནང་བྱུང་།
མཇལ་བཅར་བ་སློབ་མ་སྒྲོལ་མ་ཤར་པ་ལགས་ཀྱིས། ད་རེས་༧གོང་ས་སྐྱབས་མགོན་ཆེན་པོ་མཆོག་གི་མཇལ་ཁ་ཐོབ་པ་དེ་ང་རང་ལ་རྨི་ལམ་ལྟ་བུ་ཞིག་ཆགས་སོང་། ང་རང་བསོད་ནམས་ཆེན་པོ་ཡིན་དྲན་གྱི་འདུག ༧གོང་ས་མཆོག་གིས་ནང་སེམས་ལ་ཞི་བདེ་སྐྲུན་ཐབས་ཀྱི་ཆེད་དུ་ནང་ཆོས་ལ་སློབ་གཉེར་བྱེད་དགོས་པའི་སྐོར་བཀའ་སློབ་ཕེབས་པ་སེམས་ལ་ཉར་གྱི་ཡིན་ཅེས་བརྗོད་བྱུང་།
ཚེ་རིང་དགྲ་འདུལ་ལགས་ཀྱིས་ཉམས་ཐག་ཆེད་སྡོད་ཁང་གསར་རྒྱག་དེ་བཞིན་སྤྱི་ལོ་༢༠༡༠་ལོར་འགོ་བཙུགས་པའི་སྐབས། སློབ་ཕྲུག་བཅུ་ལས་མེད་ཀྱང་ད་ལྟའི་ཆར་སློབ་ཕྲུག་༧༥་ཡོད་པ་དང་། དེའི་ཐོག་ལ་བལ་ཡུལ་གཞུང་གི་རོགས་རམ་གང་ཡང་མེད་པ་འགྲེལ་བརྗོད་གནང་འདུག
ཚེ་རིང་དགྲ་འདུལ་ལགས་ནི་མ་སུ་རི་གཏན་སློབ་ཀྱི་སློབ་ཟུར་ཞིག་ཡིན་འདུག་པ་དང་། ཁོང་རང་སློབ་གྲྭའི་སྐབས་སུ་ཕྱི་རྒྱལ་རོགས་རམ་བྱེད་མཁན་བྱུང་མྱོང་ཡོད་པར་སོང་། རྒྱལ་བ་རིན་པོ་ཆེ་དང་བོད་གཞུང་གི་བཀའ་དྲིན་་གསབ་ཆེད་དུ་ཤར་པའི་མི་རིགས་ཚོ་ནི་སྐད་དང་རིག་གཞུང་ཐོག་བོད་དང་འབྲེལ་བ་ཡོད་པ་ཞིག་ཆགས་ཡོད་སྟབས་ཁོང་ཚོར་རོགས་རམ་ཞུ་བཞིན་ཡོད་པ་འགྲེལ་བརྗོད་གནང་གི་འདུག