ཆོས་དཔོན་ཞིག་གི་རིཊ་རུས་དབྱེར་མེད་ཀྱི་སྤྱོད་པ་ལ་༧གོང་ས་མཆོག་གིས་བསྔགས་བརྗོད།

རྒྱ་གར་གྱི་ཧིན་རྡུའི་ཆོས་དཔོན་ཞིག་གིས་རིགས་རུས་དབྱེར་མེད་ཀྱི་འདུ་ཤེས་དར་སྤེལ་གཏོང་ཐབས་གནང་བར་༧གོང་ས་སྐྱབས་མགོན་ཆེན་པོ་མཆོག་གིས་བསྔགས་བརྗོད་མཛད་འདུག
ཉེ་ཆར་རྒྱ་གར་ལྷོ་ཕྱོགས་ཏེལན་གཱ་ན་མངའ་སྡེའི་རྒྱལ་ས་ཧཡེ་རྡར་བཱདྷ་ཡི་ཉེ་འཁྲིས་ར་གཱ་རེ་ཌིས་རྫོང་ཁོངས་ཀྱི་ ཅི་ཁུར་བ་ལ་ཇི་ཞུ་བའི་ཧིན་དུའི་ལྷ་ཁང་གི་དབུ་བླ་ སི་ཨེསྀ་ཪ་གཱ་ར་ཇན་མཆོག་གིས་རིགས་རུས་དབྱེར་མེད་ཀྱི་རྣམ་འགྱུར་མཚོན་ཆེད་དྷ་ལིཏ་ཞེས་རིགས་དམན་པར་བརྩི་བའི་ཨ་དྷི་ཡ་ཟེར་བའི་རིགས་བརྒྱུད་ཀྱི་མི་ཞིག་རང་ཉིད་ཀྱི་དཔུང་པའི་སྟེང་བསྣམས་ནས་ལྷ་ཁང་དུ་ཕེབས་པ་དེར། བོད་མིའི་བླ་ན་མེད་པའི་དབུ་ཁྲིད་༧གོང་ས་སྐྱབས་མགོན་ཆེན་པོ་མཆོག་གིས་ཟླ་འདིའི་ཕྱི་ཚེས་༢༠ཉིན། ཆོས་དཔོན་དེར་བསྔགས་བརྗོད་ཀྱི་ཕྱག་བྲིས་ཤིག་བསྩལ་གནང་ཡོད་འདུག
༧གོང་ས་༧སྐྱབས་མགོན་ཆེན་པོ་མཆོག་གིས་བསྩལ་བའི་ཕྱག་བྲིས་ཀྱི་ནང་།  ཁྱེད་ཀྱིས་མང་ཚོགས་ལ་དཀོན་མཆོག་གི་མདུན་དུ་མི་ཚང་མ་འདྲ་མཉམ་ཡིན་པའི་རྣམ་འགྱུར་བསྟན་པ་དེས་ངོས་རང་ལ་སེམས་འགུལ་ཆེན་པོ་བྱུང་ལ། བསྔགས་བརྗོད་དང་རྗེས་སུ་ཡི་རངས་ཡོད། ཁྱེད་རང་གི་རྣམ་འགྱུར་དེས་མི་མང་པོར་སེམས་ཤུགས་སྤར་ཐུབ་པ་དང་སྤྱི་ཚོགས་ཁྲོད་མིག་དཔེར་འོས་པ་ཞིག་རེད། དེས་ནུས་སྟོབས་ཡང་སྤེལ་ཐུབ་ཅེས་བཀའ་གནང་འདུག
ཨེ་ཤེ་ཡ་རང་དབང་རླུང་འཕྲིན་ཁང་གིས་ ཆོས་དཔོན་ར་གཱ་ར་ཇན་མཆོག་ལ་༧གོང་ས་མཆོག་གིས་བསྔགས་བརྗོད་ཀྱི་ཕྱག་བྲིས་དེ་བསྩལ་བའི་སྐོར་ཞལ་པར་ཐོག་བཀའ་འདྲི་ཞུས་པར།  ཁོང་གིས་འཛམ་གླིང་ནང་ཆེས་བཀུར་ཞིང་མཚན་སྙན་གྲགས་ཆེ་བའི་དབུ་ཁྲིད་༧གོང་ས་ཏཱ་ལའི་བླ་མ་མཆོག་གིས་ལྷ་ཁང་ཆུང་ཆུང་ཞིག་གི་བླ་མ་ཞིག་གིས་མི་ཚང་མ་འདྲ་མཉམ་ཡིན་པའི་རྣམ་འགྱུར་བསྟན་པ་དེར་བསྔགས་བརྗོད་གནང་བར་དགའ་ཚོར་ཆེན་པོ་བྱུང་ཞེས་དང་། ངའི་རྣམ་འགྱུར་ཆུང་ཆུང་དེར་མི་མང་པོས་བསྔགས་བརྗོད་བྱེད་བཞིན་ཡོད་ཀྱང་།  རྒྱ་གར་ནང་ལོ་ངོ་བརྒྱ་ཕྲག་རིང་གནས་པའི་རིགས་དམན་པ་རྣམས་ལྷ་ཁང་དུ་འགྲོ་མི་ཆོག་པའི་སྲོལ་རྒྱུན་དེ་ནོར་འཁྲུལ་ཡིན་པ་ཡོངས་གྲགས་ཀྱི་ཐོག་ནས་གསུང་མཁན་༧གོང་ས་ཏཱ་ལའི་བླ་མ་མཆོག་མ་གཏོགས་བྱུང་མེད་པ་འགྲེལ་བརྗོད་གནང་འདུག

གསར་འགོད་པ་རྡོ་རྗེ་མཚོ།