སྐུ་ཕྲེང་བཅུ་གསུམ་པ་རྒྱ་གར་དུ་འཁོད་དེ་ལོ་༡༠༠འཁོར་བའི་སྐོར།

༄༅༎བཙན་བྱོལ་བོད་གཞུང་གིས་རྒྱལ་མཆོག་སྐུ་ཕྲེང་བཅུ་གསུམ་པ་ཆེན་པོ་མཆོག་རྒྱ་གར་ནང་བཙན་བྱོལ་དུ་ཞབས་སོར་འཁོད་དེ་ལོ་༡༠༠་འཁོར་བའི་དུས་དྲན་སྲུང་བརྩི་ཞུ་གཏན་འཁེལ་འདུག

བཙན་བྱོལ་བོད་གཞུང་བཀའ་ཤག་གིས་གསལ་བསྒྲགས་ཤིག་སྤེལ་དོན་ལྟར་ན་རྒྱལ་མཆོག་སྐུ་ཕྲེང་བཅུ་གསུམ་པ་ངག་དབང་བློ་བཟང་ཐུབ་བསྟན་རྒྱ་མཚོ་འཇིགས་བྲལ་མཆོག་ལས་རྣམ་རྒྱལ་མཆོག་རྒྱ་གར་ནང་བཙན་བྱོལ་དུ་ཞབས་སོར་འཁོད་ནས་ད་ལོ་ལོ་བརྒྱ་འཁོར་བའི་གཞུང་འབྲེལ་རྗེས་དྲན་སྲུང་བརྩི་ཞུ་གཏན་འཁེལ་བ་ལྟར་ འདི་ཟླའི་ཚེས་༢༥ཡི་སྔ་དྲོར་བཞུཌ་སྒར་རྡ་རམ་ས་ལའི་ཐེག་ཆེན་ཆོས་གླིང་གཙུག་ལག་ཁང་དུ་གཞུང་འབྲེལ་མཛད་སྒོ་གནང་རྒྱུ་དང་སྐབས་དེར་བཀའ་བློན་ཁྲི་པ་མཁས་དབང་ཟམ་གདོང་རིན་པོ་ཆེ་མཆོག་དང་བོད་མི་མང་སྤྱི་འཐུས་ལྷན་ཚོགས་ཀྱི་ཚོགས་གཙོ་སྤེན་པ་ཚེ་རིང་ལགས་དབུས་པའི་ཆེས་མཐོའི་མི་སྣ་རྣམས་ཀྱིས་མང་ཚོགས་ལ་གསུང་བཤད་གནང་རྒྱུ་དང་ཉིན་རྒྱབ་ཕྱག་ཚོད་༢་དང་ཕྱེད་ཀའི་ཐོག་གངས་སྐྱིད་ལས་བྱེད་གསོལ་ཐབ་ཀྱི་ཡང་སྟེང་ཚོགས་ཁང་ལ་དཔལ་ལྡན་བཀའ་བློན་ཁྲི་པ་མཁས་དབང་ཟམ་གདོང་བློ་བཟང་བསྟན་འཛིན་རིན་པོ་ཆེ་མཆོག་གིས་རྒྱལ་མཆོག་སྐུ་ཕྲེང་བཅུ་གསུམ་པ་ཐུབ་བསྟན་རྒྱ་མཚོ་མཆོག་གི་མཛད་རྗེས་རླབས་ཆེན་ཁག་གི་སྐོར་བོད་གཞུང་གི་གཞུང་ཞབས་རྣམས་ལ་དམིགས་བསལ་གསུང་བཤད་གནང་གཏན་འཁེལ་འདུག ཕྱི་ལོ་༡༩༠༩་ལོར་རྒྱ་མིའི་དམག་དཔོན་ཁྲའོ་ཨར་ཕེང་ཡིས་སྣེ་འཁྲིད་པའི་རྒྱ་མིའི་དམག་མི་བོད་ཀྱི་རྒྱལ་ས་ལྷ་སའི་རྒྱལ་མགོར་འབྱོར་བའི་གནས་ཚུལ་ཁྱབ་སྐབས་རྒྱལ་མཆོག་སྐུ་ཕྲེང་བཅུ་གསུམ་པ་ཆེན་པོ་མཆོག་གང་ཏོག་བརྒྱུད་ནས་རྒྱ་གར་ནང་ཕྱི་ལོ་༡༩༡༠་ལོར་ཞབས་སོར་འཁོད་གནང་བ་དང་ཕྱི་ལོ་༡༩༡༡་ལོར་རྒྱ་ནག་གི་མན་ཇུ་གོང་མ་གནས་དབྱུང་བཏང་སྟབས་ བོད་ནང་མན་ཆུ་གོང་མའི་དམག་མི་ཡོངས་རྫོགས་ཕྱིར་འབུད་བཏང་སྟེ་༸གོང་ས་སྐུ་ཕྲེང་བཅུ་གསུམ་པ་མཆོག་བོད་ལ་ཕྱིར་ཕེབས་བསྐྱངས་གནང་མཛད་ནས་ཕྱི་ལོ་༡༩༡༣་ལོར་བོད་རང་བཙན་གཙང་མ་ཡིན་པའི་དོན་ཚན་ལྡ་ལྡན་གྱི་ཡོངས་ཁྱབ་གསལ་བསྒྲགས་གནང་བ་མ་ཟད་ ད་ལྟའི་བོད་རྒྱལ་ཁབ་ཆེན་པོའི་རྒྱལ་གླུ་དེ་ལྗགས་རྩོམས་གནང་བ་དང་དེ་བཞིན་བོད་ནང་བཅོས་བསྒྱུར་མང་པོ་གཏོང་གནང་བཀྲིན་ཆེ་གནང་མཛད་པའི་གནས་ཚུལ་མདོར་ཙམ་ཞིག་ཀྱང་སྤེལ་གནང་འདུག།