ལྷོ་ཤར་ཨེ་ཤེ་ཡའི་མཐུན་ཚོགས་ནས་འབར་མའི་ཐོག་སྲིད་ཇུས།

༄༅༎ཨ་མི་རི་ཀའི་ཕྱི་སྲིད་དྲུང་ཆེ་ལྕམ་ཧི་ལ་རི་ཀི་ལིན་ཊེན་མཆོག་གིས་ལྷོ་ཤར་ཨེ་ཤེ་ཡའི་ཡུལ་གྲུའི་མཐུན་ཚོགས་ནས་འབར་མའི་ཐོག་དགོངས་བཞེས་གནང་དགོས་ཀྱི་ཡོད་ལུགས་གསུངས་ཡོད་པ་རེད།

དེ་ཡང་ཐའེ་བརྙན་འཕྲིན་ལས་ཁང་གིས་དེ་རིང་རེས་གཟའ་ལྷག་པའི་ཉིན་ཨ་རིའི་ཕྱི་སྲིད་དྲུང་ཆེ་ལྕམ་ཧི་ལ་རི་ཀི་ལིན་ཊེན་མཆོག་ལ་འབར་མའི་དྲག་པོའི་སྲིད་གཞུང་ནས་འབར་མའི་མང་གཙོའི་དབུ་ཁྲིད་ལྕམ་ཨང་སང་སུའི་ཀི་བཟང་བཙོན་ནས་གློད་བཀྲོལ་མ་གནང་བ་ཡིན་ན་འབར་མ་དེ་བཞིན་ལྷོ་ཤར་ཨེ་ཤེ་ཡའི་ཡུལ་གྲུའི་མཐུན་ཚོགས་ཁོངས་ནས་ཕྱིར་འབུད་གཏོང་དགོས་ཀྱི་རེད་དམ་ཞེས་བཅའ་འདྲི་གནང་བའི་སྐབས་ལྕམ་ཧི་ལི་རི་ཀི་ལིན་ཊེན་མཆོག་གིས་གལ་ཏེ་འབར་མའི་དྲག་པོའི་སྲིད་གཞུང་ནས་མང་གཙོའི་དབུ་ཁྲིད་ལྕམ་ཨང་སང་སུ་ཀི་བཟང་བཙོན་ནས་གློད་བཀྲོལ་མ་བཏང་བ་ཡིན་ན་གོང་ཞུས་མཐུན་ཚོགས་རྒྱལ་ཁབ་ཀྱི་སྲིད་ཇུས་འགྱུར་བ་གཏོང་རྒྱུའི་ཐད་ལ་དགོངས་བཞེས་གནང་དགོས་པ་ཞིག་ཆགས་ཀྱི་རེད་ཅེས་ལན་འདེབས་གནང་ཡོད་པ་རེད། ལྕམ་ཨང་སང་སུ་ཀི་བཟང་བཙོན་དུ་འཇོག་སའི་ཁང་པའི་ནང་ཉེ་ཆར་ཨ་མི་རི་ཀའི་མི་ཞིག་འཛུལ་བཞུགས་བྱས་པའི་ནག་ཉེས་ལ་བརྟེན་ནས་འབར་མའི་གཞུང་གིས་ཁྲིམས་གཏུགས་བྱས་པ་དེའི་ཐོག་ཨ་མི་རི་ཀའི་སྲིད་འཛིན་ཨོ་སྦ་མ་མཆོག་གིས་དེ་ནི་དྲང་བདེན་མིན་པའི་ཁྲིམས་གཏུགས་ཤིག་ཡིན་པའི་སྐྱོན་བརྗོད་གནང་བ་མ་ཟད་འབར་མའི་དྲག་པོའི་སྲིད་གཞུང་ནས་ལྕམ་ཨང་སང་སུ་ཀི་དང་དེ་བཞིན་འབར་མའི་མང་གཙོའི་དོན་གཉེར་བ་ཁག་ཅིག་འཛིན་བཟུང་བཙོན་འཇུག་བྱས་པའི་ཐོག་སྐྱོན་བརྗོད་གནང་བ་དང་སྦྲགས་ཨ་རིའི་གཞུང་ནས་འབར་མའི་ཐད་དཔལ་འབྱོར་གྱི་ཉེས་ཆད་བཏང་ཡོད་པ་རེད།