ཁམས་ནག་ཤོད་འབྲི་རུ་རྫོང་ཁོངས་ནས་བོད་མི་ལྔ་འཛིན་བཟུང་།

༄༅༎དེ་ཡང་ཟླ་༣ ཚེས་༩ ཉིན་བོད་མི་འཛོམས་ལྷ་དཀར་གཙོས་བློ་ཁ་མཐུན་པའི་མི་སྣ་མང་པོ་ཞིག་ནག་ཆུ་ཁུལ་ཐོག་ཏུ་ཡོད་པའི་“བསོད་ནམས་ཞིང་བོད་ལུགས་གསོལ་ཚིགས་ཁང་”ཞེས་པར་འཛོམས་ནས། རྒྱ་དམར་སྲིད་གཞུང་གིས་དམྱལ་བ་མི་ཡུལ་ལ་འཕོས་པ་ལྟ་བུའི་གསོད་རྡུང་མནར་གཅོད་སོགས་བྱས་ནས་མི་ལོ་ཧྲིལ་པོ་༥༣ དྲན་གསོའི་ཉིན་མོར་ཞི་རྒོལ་བྱེད་འཆར་དང་། འབོད་ཚིག་ནང་བོད་ལ་རང་དབང་དགོས་པ། རྒྱལ་བ་བསྟན་འཛིན་རྒྱ་མཚོ་བོད་ལ་ཕེབས་འཇུག་དགོས་པ། དགོན་པ་སྒོ་རྒྱབ་པ་རྣམས་ཕྱེ་དགོས་པ། གྲྭ་པ་རྣམས་ལ་སློབ་གཉེར་གྱི་རང་དབང་སྤྲོད་དགོས་པ། འགྲོ་བ་མིའི་ཐོབ་ཐང་དགོས་པ་སོགས་ཀྱི་སྐད་འབོད་བྱེད་འཆར་བྱས་ཡོད་འདུག
གནས་ཚུལ་མཁོ་སྤྲོད་པས་བརྗོད་དོན། བློ་ཕམ་དགོས་པ་ཞིག་ལ་གནས་ཚུལ་དེ་དག་རྒྱ་དམར་གསང་བའི་ཉེན་རྟོག་པས་ལས་འགུལ་སྤེལ་འཆར་དེ་སྔ་ཉིན་ནས་ཤེས་རྟོགས་བྱུང་སྟེ། ཟླ་ཐང་ཤང་ནས་ཡིན་པ་ཀརྨ་ཐར་ལམ་དང་། རྩ་ལ་ཤང་ནས་ཡིན་པ་སྲིད་དགའ་གཉིས་ཚེས་༩ མཚན་མོ་ཆུ་ཚོད་༣ པའི་ཐོག་འཛིན་བཟུང་བྱས་པ་དང་། ཚེས་༡༠ ཉིན་གྱི་ཞོགས་པ་ཆུ་ཚོད་༨ པ་ཙམ་ལ་འཛོམས་ལྷ་དཀར་ཡང་འཛིན་བཟུང་བྱས་ཡོད་འདུག དེ་བཞིན་ཚེས་༡༤ ཉིན་ཟླ་ཐང་ཤང་ནས་ཡིན་པ་འབྲུག་གྲགས་དང་། ཆགས་ཟེ་ཤང་ནས་ཡིན་པ་ཚེ་མགོན་གཉིས་གནས་ཚུལ་དེའི་རྐྱེན་པས་འཛིན་བཟུང་བྱས་ཡོད་འདུག ད་ལྟ་ཁོང་ཚོ་བཙོན་ཁང་གང་དུ་ཡོད་མེད་དང་། འཆི་གསོན་གང་བྱུང་གི་གནས་ཚུལ་སོགས་གསལ་པོ་ཤེས་རྟོག་ཐུབ་ཀྱི་མེད་པ་རེད་འདུག་ཅེས་འགྲེལ་བརྗོད་བྱས་སོང་། ཀརྨ་ཐར་ལམ་དང་། འཛོམས་ལྷ་དཀར་ནི་ཁམས་ནགས་ཤོད་འབྲི་རུ་རྫོང་ཟླ་ཐང་ཤང་ནས་ཡིན་པ་དང་། སྲིད་དགའ་ནི་རྩ་ལ་ཤང་ནས་ཡིན་པ་རེད།།