བོད་དཀར་མཛེས་ཁུལ་དུ་བོད་མི་གསུམ་འཛིན་བཟུང་བྱས་འདུག

༄༅༎བོད་ཀྱི་དཀར་མཛེས་ས་ཁུལ་གྱི་གསེར་རྟ་རྫོང་དུ་སྤྲུལ་སྐུ་ཞིག་དང་དགེ་འདུན་པ་གཉིས་ཀྱིས་བོད་ཀྱི་རྒྱལ་དར་ལག་ཏུ་འཛིན་ནས་ངོ་རྒོལ་གྱི་ལས་འགུལ་སྤེལ་བའི་སྐབས་ས་གནས་ཀྱི་རྒྱ་ནག་ཉེན་རྟོག་དམག་མིས་འཛིན་བཟུང་བྱས་པའི་གནས་ཚུལ་ཤེས་རྟོགས་བྱུང་ཡོད་པ་འདི་ག་རླུང་འཕྲིན་ཁང་ལ་གནས་ཚུལ་འབྱོར་བ་ལྟར་ན་ཕྱི་ཟླ་དྲུག་པའི་ཚེས་ཉི་ཤུ་བརྒྱད་ཀྱི་ཕྱིི་དྲོ་ཆུ་ཚོད་གཉིས་དང་སྐར་མ་བཅོ་ལྔའི་ཐོག་གསེར་རྟ་རྫོང་གི་ཁྲོམ་གཞུང་དུ་རྫོང་དེ་གའི་ནང་དུ་ཡོད་པའི་ནུབ་ཟུར་དགོན་པའི་སྤྲུལ་སྐུ་དགེ་འདུན་ཞུ་བ་ཞིག་དང་གྲ་པ་ས་གཞི་དང་གཡང་ཕྱུག་གཉིས་བཅས་བོད་རིགས་གསུམ་གྱིས་ངོ་རྒོལ་སྐད་འབོད་གནང་ནས་ཁོང་གསུམ་གྱིས་བོད་ཀྱི་རྒྱལ་དར་གནམ་དུ་འཕྱར་ནས་བོད་རང་བཙན་ཡིན་པ་དང་༸གོང་ས་མཆོག་ཕྱིར་བོད་ལ་ཕེབས་སུ་འཇུག་དགོས་པའི་སྐད་འབོད་དང་ཡིག་ཆ་འགྲེམས་སྤེལ་བྱས་འདུག

ཕྱི་ཟླ་གསུམ་པའི་ཚེས་བཅུ་ནས་བོད་ཆོལ་ཁ་གསུམ་གྱི་ཁུལ་དུ་བོད་མི་རྣམས་ཀྱིས་རྒྱ་ནག་གི་དབང་འཛིན་ལ་འདོད་པ་མེད་པའི་ངོ་རྒོལ་ཤུགས་ཆེ་གནང་ཡོད་པ་དང་ད་ལྟ་རྒྱ་ནག་གི་དམ་བསྒྲགས་འོག་ས་ཁུལ་མང་ཆེ་བའི་ནང་ངོ་རྒོལ་གྱི་གནས་ཚུལ་ཐོན་རྒྱུ་མེད་རུང་གསེར་རྟ་རྫོང་དང་དཀར་མཛེས་རྫོང་གཉིས་ཀྱི་ནང་བོད་མི་རྣམས་ཀྱི་མུ་མཐུད་ནས་ངོ་རྒོལ་གནང་གི་ཡོད་པའི་གནས་ཚུལ་འདི་ག་རླུང་འཕྲིན་ཁང་དུ་འབྱོར་བཞིན་དུ་འདུག།