རྒྱ་ནག་གིས་རང་གི་དམག་དོན་ཐད་བློ་འཚབ་བྱེད་བཞིན་འདུག

རྒྱ་ནག་གི་ངོས་ནས་རང་ཉིད་སྲུང་སྐྱོབ་ཆེད་དགོས་ངེས་ཀྱི་ལས་དོན་སྤེལ་རྒྱུའི་ཆོད་སེམས་བརྟན་པོ་ཡོད་ལུགས་བརྗོད་འདུག
ཨ་རིས་ལྷོ་ཀོ་རི་ཡའི་ནང་ཨ་རིས་བཟོས་པའི་མེ་ཤུགས་འཕུར་མདེལ་འགོག་སྲུང་གི་འཕྲུལ་ཆས་གསར་འཛུགས་བྱ་རྒྱུ་དེས་རྒྱ་ནག་གི་དམག་དོན་སྟོབས་ཤུགས་ཉམས་ཆག་གཏོང་སྲིད་པའི་བློ་འཚབ་དང་བཅས་རྒྱ་ནག་གི་ངོས་ནས་རང་ཉིད་སྲུང་སྐྱོབ་ཆེད་དགོས་ངེས་ཀྱི་ལས་དོན་སྤེལ་རྒྱུའི་ཆོད་སེམས་བརྟན་པོ་ཡོད་ལུགས་བརྗོད་འདུག
དེ་ཡང་རྒྱ་ནག་ཕྱི་སྲིད་ལས་ཁང་གི་མགྲིན་ཚབ་པ་ Geng Shuangགིས། འདི་ཚེས་༧་ཉིན་པེ་ཅིན་དུ་ཚོགས་པའི་རྒྱུན་ལྡན་གྱི་གསར་འགོད་ལྷན་ཚོགས་ཐོག་གསར་འགོད་པའི་དྲི་བར་ལན་འདེབས་བྱེད་སྐབས། རྒྱ་ནག་གཞུང་གིས་ཨ་རི་དང་ལྷོ་ཀོ་རི་ཡ་གཉིས་ནས་(THAAD)་མེ་ཤུགས་འཕུར་མདེལ་འགོག་སྲུང་ཀྱི་འཕྲུལ་རིག་གསར་འཛུགས་བྱ་རྒྱུའི་ལས་གཞིར་ངོ་རྒོལ་མཐའ་གཅིག་ཏུ་ནས་བྱེད་རྒྱུ་ཡིན་པ་བརྗོད་འདུག
གཟའ་ཟླ་བའི་ཉིན་ཨ་རིའི་ཞི་བདེ་རྒྱ་མཚོའི་ཁུལ་གྱི་མཚོ་ཐོག་དམག་དཔོན་གིས། ཨ་རིའི་མཚོ་ཐོག་དམག་དཔུང་གིས་ལྷོ་ཀོ་རི་ཡའི་ནང་ཆེས་དེང་དུས་ཀྱི་མེ་ཤུགས་ཕུར་མདེལ་དང་འབྲེལ་བའི་མ་ལག་THAAD་གསར་བཙུགས་བྱ་རྒྱུ་དང་། དེའི་དམིགས་ཡུལ་གཙོ་བོ་ནི་ཨ་རིའི་མཐུན་ཕྱོགས་རྒྱལ་ཁབ་ལ་བྱང་ཀོ་རི་ཡའི་གཏོར་རྒོལ་ལས་སྲུང་སྐྱོབ་བྱ་རྒྱུའི་ཆེད་དུ་ཡིན་པའི་སྐོར་གསུངས་ཡོད་པ་རེད།
གཟའ་ཟླ་བའི་ཉིན་བྱང་ཀོ་རི་ཡས་མེ་ཤུགས་འཕུར་མདའ་བཞི་ཙམ་ལ་ཚོད་ལྟ་བྱས་ཡོད་ཅིང་། མེ་ཤུགས་འཕུར་མདའ་གསུམ་ཉི་ཧོང་གི་འཚོ་རྒྱུད་ཁུལ་དུ་ལྷུང་ཡོད་པ་རེད། རྒྱ་ནག་གཞུང་གིས་ལྷོ་ཀོ་རི་ཡའི་ནང་མེ་ཤུགས་འཕུར་མདེལ་དང་འབྲེལ་བའི་སྲུང་སྐྱོབ་ཀྱི་ལས་གཞི་སྤེལ་རྒྱུར་ངོ་རྒོལ་ཆེད་ཨ་རིས་ལྷོ་ཀོ་རི་ཡའི་ནང་མེ་ཤུགས་འཕུར་མདེལ་འོག་སྲུང་གི་འཕྲུལ་ལས་འཇོག་ཡུལ་ས་ཆ་ཚོང་འགྱུར་བྱེད་མཁན་ལྷོ་ཀོ་རི་ཡའི་Lotte་ཚོང་དོན་ལས་ཁང་གིས་རྒྱ་ནག་ནང་ཚོང་ལས་སྤེལ་རྒྱུར་འགོག་རྐྱེན་དང་གནོན་ཤུགས་སྤྲོད་ཀྱི་ཡོད་ཅིང་། རྒྱ་ནག་ཕྱི་སྲིད་ལས་ཁང་གི་མགྲིན་ཚབ་པ་ Geng Shuangགིས་འབྲེལ་ཡོད་ཁག་གིས་ནོར་འཁྲུལ་གྱི་ལམ་ཁའི་ཐོག་མདུན་སྐྱོད་མ་བྱས་པར་སྲུང་སྐྱོབ་ཀྱི་ལས་གཞི་འཛུགས་རྒྱུ་འཚམས་འཇོག་དགོས་ལུགས་བཤད་ཡོད་པ་ལས་རྒྱ་ནག་གཞུང་གིས་དེའི་ཐོག་ཁ་གཏད་ཀྱི་ཐབས་ལམ་གང་འདྲ་འཛིན་མིན་སོགས་གནས་ཚུལ་ཞིབ་ཕྲ་ཁ་གསལ་བཏོན་མེད་པ་རེད།

གསར་འགོད་པ་འཆི་མེད།