བོད་སྐྱེ་རྒུ་མདོའི་དགོན་རྙིང་ཞིག་ཉམས་གསོའི་འཆར་གཞི།

༄༅༎རྒྱ་ནག་གཞུང་གིས། ལོ་གཅིག་གི་གོང་ལ་བོད་ཀྱི་ཁམས་སྐྱེ་རྒུ་མདོར་ས་ཡོམ་གྱི་གནོད་འཚེ་ཚབས་ཆེ་བྱུང་བའི་སྐབས། བོད་ཀྱི་ལོ་རྒྱུས་ལྡན་པའི་དགོན་པ་རྙིང་པ་ཞིག་ལ་གནོད་སྐྱོན་སྡུག་པོ་བྱུང་ཡོད་པ་དེ། ཉམས་གསོ་བྱ་རྒྱུའི་འཆར་གཞི་ཡོད་པའི་སྐོར་དེ་རིང་རེས་གཟའ་མིག་དམར་ཉིན་ཤིང་ཧྰ་གསར་ཤོག་ཐོག་གནས་ཚུལ་སྤེལ་ཡོད་པ་རེད།

དེ་ཡང་རེས་གཟའ་ཟླ་བའི་ཉིན་ཡུ་ཧྲུས་ས་གནས་གཞུང་གིས་དཔོན་རིགས་ནས།

རྒྱ་ནག་གཞུང་གིས་རང་འབྱུང་ས་ཡོམ་གྱི་གནོད་འཚེའི་ནང་གནོད་སྐྱོན་ཕྱིན་པའི་མི་ལོ་༧༥༠ ལོ་རྒྱུས་ལྡན་པའི་རྟན་དགུ་དགོན་པ་ཉམས་གསོ་བྱ་རྒྱུའི་ཆོག་མཆན་ཐོབ་ཟིན་པ་དང༌། ཉམས་གསོའི་ལས་དོན་གང་མགྱོགས་འགོ་འཛུགས་རྒྱུའི་འཆར་གཞི་ཡོད་པའི་སྐོར་བཤད་ཡོད་ཅིང༌། ན་ནིང་ཕྱི་ཟླ་བཞི་པའི་ཚེས་༡༤ ཉིན་ཡུ་ཧྲུས་ས་ཁུལ་དུ་ས་ཡོམ་རྒྱབ་པའི་སྐབས། རྟན་དགུ་དགོན་པའི་འདུ་ཁང་དང་ཕྱག་དཔེ་ཁང་གི་རྩིག་པ་དང་ཐོག་ལོག་་པ་དང༌། མེ་སྐྱོན་ནང་ཕྱག་དཔེ་དང་སྐུ་ཐང་སྟོང་ཕྲག་མང་པོ་ཚིག་པ་མ་ཟད། དགེ་འདུན་པ་༢༣ རྐྱེན་ལམ་དུ་ཕྱིན་ཡོད་པ་རེད། རྟན་དགུ་དགོན་པ་དེ་ནི། ཡུ་ཧྲུས་ས་ཁུལ་དུ་རྩ་ཆེའི་དགོན་ཁག་གསུམ་ཡོད་པའི་ནང་ནས་གཅིག་ཡིན་ཞིང། ས་ཁུལ་དེའི་ཁུལ་དུ་བོད་མིའི་མི་འབོར་གསུམ་འབུམ་དང་ལྔ་ཁྲི་ཡོད་པར་བརྟེན་ནས་བོད་མི་གནས་སྡོད་བྱེད་ཡུལ་གྱི་ས་ཁུལ་ཞིག་ཡིན་པ་དང༌། དེའི་ནང་ནས་མང་ཆེ་བ་ནང་ཆོས་དད་པ་ཞུ་མཁན་ཡིན་པ་རེད། ཡུ་ཧྲུས་ཞིང་ཆེན་གྱི་རྩ་ཆེའི་རིག་དངོས་སྲུང་སྐྱོབ་ལས་ཁང་གི་འགན་འཛིན་གཞོན་པ་ཏོང་ཁྲི་ཆང་གིས། རྟན་དགུ་དགོན་པ་དེ་ནི་རིན་ཐང་འཇལ་ཐབས་མེད་པའི་རིག་དངོས་རྩ་ཆེ་ལྡན་པའི་ཁར་རིག་གཞུང་ཕྱུག་པའི་དགོན་པ་ཞིག་ཡིན་དུས། ཉམས་གསོ་བྱ་རྒྱུ་ཧ་ཅང་གི་ཁག་པོ་ཞིག་ཡིན་ནའང༌། རྩ་ཆེའི་རིག་གཞུང་གི་འབྱུང་ཁུངས་དེ་དག་མ་འོངས་པའི་མི་རབས་ཚོའི་ཆེད་དུ་སྲུང་སྐྱོབ་བྱ་རྒྱུ་ཡིན་པ་བཤད་ཡོད་པ་དང༌། དེ་བཞིན་རྟན་དགུ་དགོན་པའི་དགོན་བདག་བློ་གྲོས་ཉི་མ་རིན་པོ་ཆེས། རྒྱ་ནག་གཞུང་གིས་དགོན་པ་ཉམས་གསོའི་ཆེད་དུ་ཐོག་མར་རྒྱ་མིའི་སྒོར་མོ་ས་ཡ་༤ རོགས་རམ་བྱ་རྒྱུའི་ཁས་ལེན་བྱས་ལུགས་དང༌། དེ་དང་ཆབས་ཅིག་ཏུ་དགོན་པའི་ངོས་ནས་དགོན་པ་ཞིག་རལ་ཡོད་ས་དེར་དྲན་རྟེན་གྱི་གླིང་ཁ་ཞིག་འཛུགས་སྐྲུན་བྱ་རྒྱུར་མ་དངུལ་མཁོ་འདོན་བྱ་དགོས་ཀྱི་ཡོད་པའི་འགྲེལ་བརྗོད་གནང་ཡོད་པ་རེད།