རྒྱ་ནག་གི་དཔོན་རིགས་ཚོའི་དཔལ་འབྱོར་ལས་དོན་ལྷན་ཚོགས།

༄༅༎ད་རེས་གཟའ་མཇུག་ཏུ་རྒྱ་ནག་གི་ཆེས་མཐོའི་དབུ་ཁྲིད་རྣམས་རྒྱལ་ས་པེ་ཅིང་དུ་རྒྱལ་ཁབ་ཀྱི་དཔལ་འབྱོར་ལས་དོན་གྱི་ལྷན་ཚོགས་སྐོང་ཚོགས་བྱས་ཏེ་ལྷན་ཚོགས་དེ་ནི་རྒྱ་ནག་གི་དཔལ་འབྱོར་ཉམ་རྒུད་ཕྱིན་པ་དེ་ཕྱི་ལོ་ཉིས་སྟོང་བཅུ་ནང་བསྐྱར་གསོའི་ལས་དོན་གོང་མཐོར་ཇི་ལྟར་གཏོང་ཕྱོགས་སྐོར་ཐག་གཅོད་བྱ་རྒྱུ་ཡིན་པ་རེད།

དེ་རིང་རེས་གཟའ་ཉི་མའི་ཉིན་རྒྱ་ནག་གཞུང་གི་གསར་ཤོག་ཐོག་ལ། རྒྱ་ནག་གི་ཆེས་མཐོའི་དཔོན་རིགས་ཀྱི་ལྷན་ཚོགས་དེ་རེས་གཟའ་སྤེན་པ་འགོ་བཙུགས་ཏེ། གསང་བ་དམ་པོའི་སྒོ་ནས་ཚོགས་འདུ་ཚོགས་བཞིན་ཡོད་པ་ལྟར། ཁོང་ཚོས་རྒྱ་ནག་རྒྱལ་ནང་གི་དཔལ་འབྱོར་བསྐྱར་གསོའི་སྲིད་ཇུས་མུ་མཐུད་ཇི་ལྟར་ལག་བསྟར་བྱ་ཕྱོགས་དང། ཕྱི་ལོ་གསར་པའི་དཔལ་འབྱོར་གྱི་སྔོན་རྩིས་སྟབས་བདེ་རུ་གཏོང་ཕྱོགས་སྐོར་གྲོས་བསྡུར་བྱ་རྒྱུ་ཡིན་པའི་གནས་ཚུལ་སྤེལ་ཡོད་ཅིང། ཡིན་ནའང་གསར་ཤོག་དེའི་ཐོག་ལ་ལྷན་ཚོགས་དེའི་ནང་དེ་མིན་གྱི་གྲོས་མོལ་བྱ་རྒྱུའི་གྲོས་གཞི་ག་རེ་ཡོད་མེད་ཀྱི་ནང་དོན་ཞིབ་ཕྲའམ་ཚོགས་འདུ་དེ་ག་དུས་མཇུག་སྒྲིལ་གྱི་ཡོད་མེད་ཀྱི་སྐོར་གནས་ཚུལ་གང་ཡང་གསལ་པོ་བཀོད་མེད་པ་རེད།

ན་ནིང་རྒྱ་ནག་དབུས་གཞུང་གི་དཔལ་འབྱོར་ལས་དོན་གྱི་ལོ་རེའི་ལྷན་ཚོགས་དེ་ནི་ཉིན་མ་གསུམ་རིང་ཚོགས་ཡོད་པ་དང། ལྷན་ཚོགས་དེ་ནི་རྒྱ་ནག་གི་རྒྱལ་ནང་གི་དཔལ་འབྱོར་སྲིད་ཇུས་བཟོ་བའི་ལོ་རེའི་གལ་ཆེའི་ལྷན་ཚོགས་ཞིག་ཡིན་ཞིང། རྒྱུན་དུ་ལྷན་ཚོགས་དེའི་ནང་རྒྱ་ནག་གི་གལ་ཆེའི་མི་སྣ་སྲིད་འཛིན་ཧུའུ་ཇིན་ཐའོ་དང་སྲིད་བློན་ལྦེན་ཅ་པའོ་སོགས་མཉམ་ཞུགས་བྱེད་སྲོལ་ཡོད་པ་རེད། བར་ལམ་འཛམ་གླིང་གི་དཔལ་འབྱོར་འཕེལ་རྒྱས་དཀའ་ཚེགས་ཅན་ཏུ་གྱུར་བའི་སྐབས་རྒྱ་ནག་གི་དཔལ་འབྱོར་འཕེལ་རྒྱས་ལ་ཤུགས་རྐྱེན་ཐེབས་ཏེ་དཔལ་འབྱོར་གྱི་གནས་སྟངས་ཉམ་རྒུད་ཕྱིན་པ་དེ་སླར་གསོ་བྱ་རྒྱུར་རྒྱ་ནག་གཞུང་གིས་དཔལ་འབྱོར་བསྐྱར་གསོའི་དངུལ་འབབ་ཨ་རིའི་ཌོ་ལར་གྱི་འཛའ་ཐང་བྱས་ན་ཌོ་ལར་ཐེར་འབུམ་༥༨༦ གཏན་འབེབས་བྱས་ཏེ་ལོ་གཅིག་འགྲོ་གི་ཡོད་པ་དང། ཉེ་ཆར་ཕྱི་ཟླ་བཅུ་གཅིག་པའི་ནང་དཔོན་རིགས་ཚོས་དཔལ་འབྱོར་བསྐྱར་གསོའི་མ་དངུལ་དེ་དག་མ་འོངས་པའི་ཕྱི་ལོ་གསར་པའི་ནང་ལག་བསྟར་བྱ་རྒྱུ་ཡིན་པ་ཁས་ལེན་བྱས་ཡོད་པ་རེད།