འབར་མའི་དཔུང་དམག་དང་གྱེན་ལོག་པའི་དབར་འཁྲུག་རྩོད།

༄༅༎འབར་མའི་གཞུང་འབྲེལ་རྒྱུད་ལམ་ཐོག་གཟའ་སྤེན་པའི་ཉིན་གནས་ཚུལ་སྤེ་བའི་ནང་འབར་མའི་ས་འཚམས་སུ་དྲག་ཟིང་གི་དོན་རྐྱེན་བྱུང་ཡས་དེ་བཞིན་ གྱེན་ལོག་ཤོག་ཁག་གིས་བཟོས་པ་ཞིག་ཡིན་པར་སྐྱོན་འཛུགས་བྱས་ཡོད་པ་རེད། 

གཟའ་འཁོར་སྔོན་མ་ནས་དེ་རིང་བར་འབར་མའི་ཀ་ཆིན་མངའ་སྡེའི་ཁུལ་དུ་ཀ་ཆིན་རང་དབང་དམག་དཔུང་ཞེས་པའི་གྱེན་ལོག་ཚོགས་པ་དང་། འབར་མའི་དམག་དཔུང་དབར་དྲག་ཟིང་བྱུང་ནས་དེ་རིང་གཟའ་སྤེན་པའི་ཉིན་ལ་ཡང་དྲག་ཟིང་གདོང་ཐུག་ཡོངས་སུ་འཚམས་འཇོག་བྱུང་མེད་པའི་སྐོར་འབར་མའི་དཔོན་རིགས་ནས་ར་ཁྲོད་བྱས་ཡོད་རེད། འབར་མའི་གཞུང་འབྲེལ་གསར་འགྱུར་རྒྱུད་ལམ་གྱིས་གནས་ཚུལ་སྤེལ་བའི་ནང་དྲག་ཟིང་གི་དོན་རྐྱེན་དེ་བཞིན་ གྱེན་ལོ་ཤོག་ཁག་གིས་གཞུང་གི་གློག་ཁང་འཛུགས་སྐྲུན་ལས་གཞིར་གཏོར་སྐྱོན་གཏོང་རྩིས་ལ་རྟེན་ནས་འབར་མའི་དམག་དཔུང་གིས་རང་སྲུང་ཆེད་ཁ་གཏད་འགོག་རྒོལ་བྱས་ལུགས་འཁོད་ཡོད་པ་རེད། འབར་མའི་དཔོན་རིགས་ཀྱིས་ཀྱང་  གྱེན་ལོག་ཤོག་ཁག་གིས་མངའ་ཁུལ་དེའི་ནང་གཟམ་པ་མང་པོར་གཏོར་སྐྱོན་བཏང་ལུགས་དང་མངའ་ཁུལ་གྱི་བདེ་འཇགས་གནས་སྟངས་ཧ་ཅང་དམ་དྲག་ཡོད་པར་བརྟེན་ནས་མི་སེར་མང་པོ་དམག་འཁྲུག་ལས་གཡོལ་ཐབས་ཆེད་ས་མཚམས་ཁུལ་དུ་བྲོས་བྱོལ་དུ་བསྐྱོད་ཀྱི་ཡོད་པ་བརྗོད་འདུག ཀ་ཆིན་རང་བཙན་དམག་དཔུང་ཞེས་པས་བརྗོད་ན། འབར་མ་གཞུང་གིས་མེ་འཕེན་ཐོག་མ་བྱས་ཡོད་པ་དང་། འབར་མ་གཞུང་གིས་མི་སེར་ལ་བཙན་དབང་ཐོག་ནས་དམག་དཔུང་ནང་ཞུགས་བཅུག་གི་ཡོད་པར་བརྟེན་ནས་མི་སེར་མང་པོ་གྱེན་ལོག་ཚོགས་པས་སྟངས་འཛིན་བྱེད་སའི་མངའ་ཁུལ་དེའི་ནང་བྲོས་བྱོལ་དུ་ཡོང་གི་ཡོད་པ་བརྗོད་འདུག ད་རེས་འབར་མའི་ས་འཚམས་ཁུལ་དུ་གྱེན་ལོག་ཤོག་ཁག་དང་འབར་མའི་དམག་དཔུང་དབར་མེ་འཕེན་བྱུང་ཡས་ཀྱི་རྒྱུ་རྐྱེན་གཙོ་བོ་ཞིག་ནི་འབར་མ་གཞུང་གིས་མངའ་ཁུལ་དེའི་བརྒྱུད་དུ་རྒྱ་ནག་དང་མཉམ་དུ་གློག་ཁང་གསར་རྒྱག་ལས་གཞི་སྤེལ་ནས་རྒྱ་ནག་ནས་ལས་མི་བརྒྱ་གྲངས་ལས་གཞི་དེའི་ནང་ལས་ཀ་བྱེད་མཁན་ཚོ་རྒྱ་ནག་ལ་ཕྱིར་ལོག་གཏོང་དགོས་པའི་གནད་དོན་དང་འབྲེལ་བ་ཆགས་ཀྱི་ཡོད་འདུག།