མིཡན་མར་གྱི་ནང་པའི་དགེ་འདུན་པ་ཞིག་འཛིན་བཟུང་བྱས་འདུག

མིཡན་མར་(Myanmar)་ཡུལ་གྱི་ནང་པའི་དགེ་འདུན་པ་ཞིག་གི་ལག་ནས་བཟི་སྨན་དུག་རྫས་འབོར་ཆེ་ཐོན་ཏེ་འཛིན་བཟུང་བྱས་ཡོད་འདུག
དེ་ཡང་མཡན་མར་(Myanmar)ནང་བཟི་སྨན་དུག་རྫས་ཚོང་འགྲེམ་བཀག་འདོམས་གྱི་འབྲེལ་ཡོད་དཔོན་རིགས་Muang Muang Yin གྱིས་གནས་ཚུལ་ཕྱི་བསྒྲགས་བྱས་པར་གཞིགས་ན། ཟླ་བ་འདིའི་ཚེས་༥་རེས་གཟའ་ཉི་མའི་ཉིན་ནང་པའི་དགེ་འདུན་པ་ཞིག་གིས་སྣུམ་འཁོར་བཟི་སྨན་དུག་རྫས་འོར་འདྲེན་བྱེད་ཀྱི་ཡོད་པའི་སྐོར་གཞུང་ལ་བརྡ་ལན་སྤྲོད་མཁན་བྱུང་བར་སོང༌། ཉེན་རྟོག་པས་ནང་པའི་དགེ་འདུན་པ་དེ་མཡན་མར་དང་བྷང་ལ་དྷེཤའི་ས་མཚམས་འཁེལ་སའི་Rakhine་མངའ་སྡེའི་ས་གནས་ཤིག་ཏུ་སྣུམ་འཁོར་ནང་འགྲུལ་བསྐྱོད་བྱས་སྐབས་བཀག་སྟེ་སྔོག་བཤེར་བྱས་སྐབས། དགེ་འདུན་པ་དེའི་སྣུམ་འཁོར་ནང་ནས་ Methamphetamine་ཟེར་བའི་གཟི་སྨན་དུག་རྫས་རིལ་བུ་བཞི་འབུམ་ཐོན་ཡོད་པ་དང༌། དེ་ནས་ཉེན་རྟོག་པས་དགེ་འདུན་པ་དེ་ཡི་ཁང་ཁྱིམ་སྔོག་བཤེར་བྱས་པར་གོང་ཞུས་ཉལ་ཐ་གྱི་རིལ་བུ་ས་ཡ་བཞི་དང་ཉིས་འབུམ་དང༌། མཡན་མར་གྱི་ཤོར་སྒོར་ས་ཡ་གཅིག་བཅས་ཐོན་ཡོད་པར་སོང༌། དགེ་འདུན་པ་དེ་ཉེན་རྟོག་པས་འཛིན་བཟུང་བྱས་ཡོད་པ་ལས་འཛིན་བཟུང་བྱས་པའི་དགེ་འདུན་དེ་ཡི་མིང་དང་ལོ་རྒྱུས་སོགས་གང་ཡང་བཀོད་མི་འདུག
སྤྱིར་བཏང་མཡན་མར་ནི་འཛམ་གླིང་ཁྱོན་ཡོངས་ཀྱི་ནང་ནས་Methamphetamine་དང་ཨ་ཕིམ་ཟེར་བའི་ཉལ་ཐ་ཐོན་ཁུངས་ཆེ་ཤོས་གྲས་ཡིན་ཡང༌། ནང་པའི་དགེ་འདུན་པ་ཞིག་གི་ལག་ནས་འདི་ལྟབུའི་ཉལ་ཐ་ཕོན་ཆེན་པོ་ཐོན་པ་དེར་གཞུང་འབྲེལ་དཔོན་རིགས་ཚོ་ཧང་སངས་དགོས་པ་ཞིག་བྱུང་ཡོད་པ་མའན་མར་ཆོས་དོན་ལྷན་ཁང་གི་འགན་འཛིན་Soe Min Tun་གྱིས་གསུངས་འདུག།

གསར་འགོད་པ་ངག་ཆོས།