རྒྱ་གཞུང་ནས་བོད་ཀྱི་འགྲོ་བ་མིའི་ཐོབ་ཐང་ལ་སྲུང་བརྩི་ཞུ་དགོས།

༄༅༎དབྱིན་ཇིའི་སྲིད་བློན་མཆོག་ནས་རྒྱ་ནག་གཞུང་ནས་བོད་ནང་གི་བོད་མི་ཚོའི་འགྲོ་བ་མིའི་ཐོབ་ཐང་ལ་སྲུང་བརྩི་ཞུ་དགོས་པ་མ་ཟད་བོད་མིའི་དཀའ་རྙོག་གྲོས་མོལ་གྱི་ལམ་ནས་སེལ་དགོས་ཀྱི་རེད་ཅེས་གསུང་གླེང་གནང་ཡོད་འདུག།

རོའུ་ཀྲར་གསར་འགྱུར་ལས་ཁང་ནས་དེ་རིང་གནས་ཚུལ་སྤེལ་བར་ལྟར་ན། དབྱིན་ཇིའི་སྲིད་བློན་མཆོག་རིང་མིན་རྒྱལ་ས་པེ་ཅིང་དུ་ཨོ་ལིམ་པིག་རྩེད་འགྲན་གྱི་མཇུག་བསྡོམས་མཛད་སྒོའི་སྐབས་ཕེབས་ཀྱི་ཡོད་པའི་སྐབས་ཁོང་གིས་རྒྱ་ནག་དཔོན་རིགས་ཚོར་འགྲོ་བ་མིའི་ཐོབ་ཐང་ལ་སྲུང་བརྩི་ཞུ་དགོས་རྒྱུ་གལ་ཆེན་པོ་ཡིན་ལུགས་གསུངས་ཀྱི་ཡིན་ཞེས་འགྲེལ་བརྗོད་གནང་འདུག། དེ་ཡང་ཁོང་གིས་རེས་གཟའ་ལྷག་པའི་ཉིན་ གྲོས་ཚོགས་ཀྱི་འཐུས་མི་སྐུ་ཞབས་ནིག་ཀེ་ལེག་གིས་ སྲིད་བློན་མཆོག་ལ་རྒྱ་ནག་ལ་ཕེབས་ཀྱི་ཡོད་པའི་དུས་ཚོད་དང་བསྟུན་ནས་རྒྱ་ནག་གི་འགྲོ་བ་མིའི་ཐོབ་ཐང་ཐོག་དགོངས་ཚུལ་བཀའ་འདྲི་ཞུས་པའི་སྐབས་སྲིད་བློན་མཆོག་ནས། རྒྱ་ནག་མཉམ་འབྲེལ་བ་བྱེད་རྒྱུ་དང༌། ཨོ་ལིམ་པིག་རྩེད་འགྲན་ལ་རྒྱབ་སྐྱོར་བྱེད་རྒྱུ་ནི་ང་ཚོའི་རྒྱལ་ཁབ་ཀྱི་ཁེ་ཕན་ཞིག་རེད། ཡིན་ནའང་དེས་འགྲོ་བ་མིའི་ཐོབ་ཐང་བློས་བཏང་པར་མཚོན་གྱི་ཡོད་མ་རེད། རྒྱ་ནག་ནས་ད་བར་དཔལ་འབྱོར་དང་སྤྱི་ཚོགས་ཀྱི་གནས་སྟངས་ཡར་རྒྱས་ཡག་པོ་བཏང་ཡོད་རེད། ཡིན་ནའང་གནད་དོན་མང་པོ་ཞིག་ཐོག་ད་དུང་ཡར་རྒྱས་གཏོང་དགོས་ཀྱི་ཡོད་རེད། འགྲོ་བ་མིའི་ཐོབ་ཐང་ནི་ཨོ་ལིམ་པིག་རྩེད་འགྲན་གྱི་དུས་ཚོད་གཅིག་པུའི་སྐབས་མ་ཡིན་པར་རྒྱུན་དུ་ནས་དགོས་རྒྱུ་གལ་ཆེན་པོ་རེད་ལ་དེའི་ཐོག་རྒྱ་ནག་ལ་ཕེབས་པའི་སྐབས་ལྷུག་པོ་གསུངས་རྒྱུ་ཡིན་ཞེས་བཀའ་གནང་ཡོད་འདུག།

ཡང་སྲིད་བློན་མཆོག་ནས་ཉེ་ཆར་རྒྱ་ནག་གཞུང་འབྲེལ་ཤིན་ཧ་གསར་འགྱུར་ལས་ཁང་ནས་བཅར་འདྲི་དང་ལན་ཞུས་པའི་སྐབས་སུ། རྒྱ་ནག་གཞུང་ནས་བོད་ནང་གི་མི་མང་ཚོའི་འགྲོ་བ་མིའི་ཐོབ་ཐང་ལ་ངེས་པར་དུ་སྲུང་བརྩི་ཞུ་དགོས་ཀྱི་རེད་ལ་ང་ཚོའི་ངོས་ནས་བོད་ཀྱི་དཀའ་རྙོག་དེ་གྲོས་མོལ་གྱི་ལམ་ནས་སེལ་དགོས་པ་ལས་དྲག་ཤུགས་ཀྱིས་སེལ་རྒྱུ་མེད་ལུགས་གསུངས་ཡོད་འདུག།