ཨ་རིའི་སྦཀ་ལི་གྲོང་སྡེ་ལས་ཁུངས་ཀྱིས་བོད་དོན་ཐོག་གྲོས་ཆོད།

༄༅༎བཙན་བྱོལ་བོད་གཞུང་གིས་དྲ་རྒྱའི་ཐོག་སྤེལ་བའི་གནས་ཚུལ་ནང་གསལ་ལྟར་ན་ ཕྱི་ཟླ་ ༡ ཚེས་ ༣༡ ཉིན་ ཨ་རིའི་ཀེ་ལི་ཕོར་ནི་ཡ་མངའ་སྡེའི་ཁུལ་གྱི་སྦཀ་ལི་ས་གནས་གྲོང་ཁྱེར་ལས་ཁུངས་ཀྱི་ཚོགས་ཆེན་སྐབས་ སྤྱི་མོས་ཐོག་ བོད་མི་ཚོས་བསྟུད་མར་རང་ལུས་མེར་སྲེག་བཏང་བའི་དོན་རྐྱེན་ཐོག་ གྲོས་ཆོད་ཅིག་བཞག་ཡོད་པ་རེད་  གྲོས་ཆོས་དེར་རྒྱབ་སྐྱོར་གནང་མཁན་ཁ་ལི་ཕོར་ནི་ཡའི་གཙུག་ལག་སློབ་གཉེར་ཁང་དང་སྦཀ་ལི་གཙུག་ལག་སློབ་གཉེར་ཁང་གི་འབུམ་རམས་པའི་ཕྱག་འཁྱེར་ཐོག་སློབ་གཉེར་གནང་བཞིན་པའི་སློབ་ཕྲུག་རྣམས་ཡིན་འདུག་ གྲོང་ཁྱེར་སྲིད་གཞུང་གིས་གྲོས་ཆོད་དེའི་ནང་ བོད་ནང་བོད་མིས་རང་ལུས་མེར་སྲེག་བཏང་བའི་དོན་རྐྱེན་དེས་ རྒྱ་ནག་གཞུང་གིས་བོད་མིའི་ཐོག་དམ་བསྒྲགས་ཅན་གྱི་སྲིད་བྱུས་འཛིན་བཞིན་ཡོད་པ་མངོན་ཐུབ་པ་ཞིག་དང་ ཨ་རིའི་སྲིད་འཛིན་སྦ་རཀ་ཨོ་སྦ་མ་མཆོག་ནས་རྒྱ་ནག་གཞུང་ལ་བོད་མི་ཚོར་སྤྱི་ཚོགས་ཀྱི་ཐོབ་ཐང་འདྲ་མཉམ་ཞིག་སྤྲོད་དགོས་པའི་སྐུལ་འདེགས་དང་ གནོན་ཤུགས་སྤྲོད་དགོས་ཞེས་གསལ་འདོན་བྱས་ཡོད་པ་རེད་ གྲོས་ཆོད་ཀྱི་འདྲ་བཤུས་མངའ་སྡེའི་གྲོས་ཚོགས་འཐུས་མི་རྣམས་དང་གཞུང་འབྲེལ་ལས་ཁུངས་ཁག་ལ་འབུལ་རྒྱུ་ཡིན་པ་མ་ཟད་ གྲོང་ཁྱེར་སེན་ཕེ་རན་སིསི་ཀོར་རྟེན་གཞི་བྱས་པའི་རྒྱ་ནག་གཞུང་ཚབ་ཁང་ལའང་གཏོང་རྒྱུ་ཡིན་འདུག་པ་བཅས་ཀྱི་གནས་ཚུལ་བཀོད་འདུག་།།