རྒྱལ་ཚོགས་དྲུང་ཆེ་ནས་འབར་མའི་གཞུང་ལ་འབོད་སྐུལ།

༄༅༎འཛམ་གླིང་མཉམ་འབྲེལ་རྒྱལ་ཚོགས་ཀྱི་སྤྱི་ཁྱབ་དྲུང་ཆེ་སྐུ་ཞབས་ སྦན་ཀི་མུན་ གྱིས་འབར་མའི་དྲག་པོའི་གཞུང་གིས་དྲག་ཆར་རླུང་འཚུབ་དང་ཆུ་ལོག་གི་གནོད་འཚེའི་གོད་ཆགས་ཕོག་པར་ཚོར་རྒྱལ་སྤྱིའི་རོགས་རམ་ཚོགས་པ་འབར་མའི་ནང་འགྲོ་བསྐྱོད་བྱེད་དུ་བཅུག་དགོས་པའི་འབོད་སྐུལ་གནང་ཡོད་པ་རེད།

དེ་རིང་འཛམ་གླིང་མཉམ་འབྲེལ་རྒྱལ་ཚོགས་ཀྱི་སྤྱི་ཁྱབ་དྲུང་ཆེ་དང་འབར་མའི་དྲག་པོའི་དབུ་ཁྲིད་རྣམ་གཉིས་ཆུ་ཚོད་གཉིས་རིང་ཛ་དྲག་གི་བཀའ་མོལ་གནང་བའི་རྗེས་སྤྱི་ཁྱབ་དྲུང་ཆེ་མཆོག་གིས་དྲག་པོའི་གཞུང་ལ་འབོད་སྐུལ་གནང་བ་ཞིག་ཡིན་ཞིང། ཡིན་ནའང་ཁོང་གིས་འབར་མའི་དབུ་ཁྲིད་ཀྱི་ངོས་ནས་རྒྱལ་སྤྱིའི་ཛ་དྲག་གི་རོགས་རམ་ཚོགས་པ་ཁག་གི་ཆེད་ལས་སྐུ་ཚབ་རང་འབྱུང་གི་གོད་ཆགས་ཚབས་ཆེ་ཕོག་ཡུལ་གྱི་ས་ཁུལ་ནང་འགྲོ་བསྐྱོད་བྱེད་དུ་བཅུག་རྒྱུའི་ཁས་ལེན་བྱས་ཡོད་མེད་སྐོར་ཁ་གསལ་འགྲེལ་བརྗོད་གནང་མེད་པ་རེད།

འབར་མའི་དྲག་པོའི་གཞུང་གིས་ཟླ་བ་འདིའི་ཕྱི་ཚེས་༢ དང་ ༣ ཉིན་རང་འབྱུང་གནོད་འཚེ་བྱུང་ཡུལ་ནང་ཉེན་སྐྱོབ་ཐུབ་པའི་མི་དམངས་ཚོར་རོགས་རམ་བྱེད་མཁན་གྱི་རྒྱལ་སྤྱིའི་རོགས་རམ་ཚོགས་པ་དང་ཆེད་ལས་མི་སྣ་གཅིག་ཀྱང་འགྲོ་བསྐྱོད་བྱེད་དུ་བཅུག་གི་མེད་པ་དང་དེ་རིང་བར་འབར་མའི་དྲག་ཆར་རླུང་འཚུབ་དང་ཆུ་ལོག་གི་གནོད་འཚེའི་ནང་ཉུང་མཐར་མི་དམངས་བདུན་ཁྲི་བརྒྱད་སྟོང་རྐྱེན་ལམ་དུ་ཕྱིན་པ་དང་མི་དམངས་ལྔ་ཁྲི་དྲུག་སྟོང་ཙམ་ད་དུང་རྙེད་སོན་བྱུང་མེད་ཅིང། ཉེན་སྐྱོབ་ཐུབ་པའི་མི་དམངས་ས་ཡ་གཉིས་དང་ཕྱེད་ཀ་ཡོད་པ་རྣམས་རང་འབྱུང་གི་གནོད་འཚེའི་འོག་འཐུང་ཆུ་དང་ཁོར་ཡུག་གཙང་མ་མེད་པ་སོགས་ཀྱིས་ནད་ཡམས་དང་བཀྲེས་ལྟོགས་ ལྷག་པར་དུ་དབྱར་དུས་ཀྱི་ཆར་ཞོད་ཀྱི་ཉེན་ཁའི་ཐོག་གནས་བཞིན་ཡོད་པ་རེད།