ཉི་ཧོང་མི་མང་གིས་རྒྱ་ནག་ལ་མི་དགའ་བའི་རྣམ་འགྱུར་བཏོན་པ།

༄༅༎ཉི་ཧོང་ནང་གི་གཡས་ཕྱོགས་ཀྱི་ལྟ་བ་འཛིན་མཁན་ཚོགས་སྡེ་ཁག་གི་སྣེ་ཁྲིད་འོག་ད་རེས་ཕྱི་ཚེས་༢གཟའ་སྤེན་པའི་ཉིན་ཉི་ཧོང་གི་རྒྱལ་ས་ཀྲོག་ཡོ་ལ་མི་གྲངས་གཅིག་སྟོང་ལྷག་ཙམ་འདུ་འཛོམས་ཀྱིས་རྒྱ་ནག་གིས་ཤར་་རྒྱ་ནག་རྒྱ་མཚོའི་མཚོ་གླིང་ལ་བཙན་འཛུལ་བྱེད་ཀྱི་ཡོད་པར་ངོ་རྒོལ་དང་འབྲེལ་ ཉི་ཧོང་རྒྱལ་ཡོངས་མི་མང་གིས་མཐུན་སྒྲིལ་རྡོག་རྩ་གཅིག་ཏུ་སྒྲིལ་ནས་རྒྱ་ནག་ལ་ཁ་གཏད་བྱེད་དགོས་པའི་འབོད་ཚིག་སྒྲོག་ནས་ངོ་རྒོལ་རྔམ་སྟོན་བྱས་ཡོད་པ་རེད།

ངོ་རྒོལ་ནང་མཉམ་བཞུགས་གནང་མཁན་གྱི་གྲས་སུ་ཉི་ཧོང་གི་མཁའ་ཏོག་སྲུང་སྐྱོབ་དམག་དཔུང་གི་དཔོན་རིགས་ཟུར་པ་དང་དེ་བཞིན་ཀྲོག་ཡོ་གྲོང་ཁྱེར་གྱི་ས་གནས་ཀྱི་དཔོན་རིགས་ཟུར་པ་ཉི་ཧོང་གི་ཆབ་སྲིད་ཚོགས་པ་ཁག་གི་དཔོན་རིགས་ཁག་ཅིག་དང་གྲོས་ཚོགས་འཐུས་མི་ཁག་ཅིག་ཡང་ཡོད་པ་དང་ ངོ་རྒོལ་ནང་བཞུགས་མཁན་ཚོང་ཉི་ཧོང་གི་གཞུང་འཛིན་ཚོགས་པས་རྒྱ་ནག་གཞུང་ལ་འཛིན་པའི་ཕྱི་འབྲེལ་སྲིད་བྱུས་དེ་ཧ་ཅང་གི་གུ་ཡངས་ཤིག་ཡིན་པར་སྐྱོན་བརྗོད་གནང་ཡོད་པ་དང་ ཉི་ཧོང་མི་མང་ཚོས་རང་ཉིད་ཀྱི་བདག་དབང་སྲུང་སྐྱོབ་མ་བྱུང་པ་ཡིན་ན་ ཉིན་ཞིག་རྒྱ་ནག་གིས་ཉི་ཧོང་གི་བདག་དབང་ཡོད་པའི་མཚོ་གླིང་ལ་བཙན་འཛུལ་བྱ་རྒྱུ་ཡིན་པའི་སྐོར་སོགས་གཏམ་བཤད་སྤེལ་ཡོད་པ་རེད་ ངོ་རྒོལ་གྱི་ལས་འགུལ་དེ་ཉི་ཧོང་གི་རྒྱལ་ས་ཀྲོག་ཡོ་གཅིག་པུ་མིན་པར་ ཉི་ཧོང་གི་གྲོང་ཁྱེར་ཁག་མང་པོ་ཞིག་ནང་དུ་དུས་གཅིག་ཏུ་སྤེལ་ཡོད་པ་དང་ ད་རེས་གཟའ་སྤེན་པའི་ཉིན་གྱི་རྒྱ་ནག་ལ་ངོ་རྒོལ་གྱི་ལས་འགུལ་དེའི་དམིགས་བསལ་ཁྱད་ཆོས་ཤིག་ནི་ དེའི་སྔོན་ཉི་ཧོང་ནང་གཡས་ཕྱོགས་ཀྱི་ལྟ་བ་འཛིན་མཁན་ཚོས་ངོ་རྒོལ་གྱི་ལས་འགུལ་སོགས་སྤེལ་བའི་སྐབས་མཉམ་བཞུགས་བྱེད་མཁན་མང་ཆེ་བ་ལོ་ན་རྒན་པ་དང་ཡང་ན་དར་མ་ཡིན་ཞིང་ ད་རེས་ཀྱི་ལས་འགུལ་དེའི་ནང་བཞུགས་མཁན་གྱི་གསུམ་ཆ་གཅིག་ལྷག་ཙམ་གཞོན་སྐྱེས་ཡིན་པ་དང་ དེ་བཞིན་བེུད་དང་ཤེས་ཡོན་ཅན་ཡང་མང་པོ་ཞིག་མཉམ་བཞུགས་གནང་ཡོད་པའི་ཐོག་ནས་ཉི་ཧོང་ནང་རྒྱ་ནག་ལ་མི་དགའ་མཁན་གྱི་མི་འབོར་མང་དུ་འགྲོ་གི་ཡོད་པ་མ་ཟད་ གཞོན་སྐྱེས་དང་ཤེས་ཡོན་ཅན་ནང་ལ་ཡང་རྒྱ་ནག་ལ་མི་དགའ་བའི་རྣམ་འགྱུར་བཏོན་མཁན་གྱི་མིའི་གྲངས་འབོར་མང་དུ་འགྲོ་བཞིན་ཡོད་པ་དེ་མཚོན་ཐུབ་རྒྱུ་ཡིན་པ་གནད་དོན་དབྱེ་ཞིབ་པ་ཚོས་གསུངས་ཀྱི་ཡོད་པ་རེད་ རྒྱ་ནག་གཞུང་གིས་ཉིན་ཤས་གོང་རྒྱ་ནག་གི་མི་སེར་ཚོ་ཉི་ཧོང་ནང་ཡུལ་བསྐོར་སྤྲོ་འཆམ་དུ་འགྲོ་མཁན་ཚོར་ཡིད་ཟབ་བྱེད་དགོས་པའི་ཉེན་བརྡ་བཏང་ཡོད་འདུག།