ཁ་ཆེ་བ་ཚོས་ཡུ་གུར་མི་རིགས་ལ་རྒྱབ་སྐྱོར་བྱེད་དགོས་པའི་སྐུལ་མ།

༄༅༎ཨེལ་ཁེ་ཌའི་གནད་ཡོད་དམག་འཐབ་པ་ཨ་སྦུ་ཨ་ཡ་ཨེལ་ལི་སྦི་ཡིས་དྲག་རྩུབ་ཅན་གྱི་རྒྱ་ནག་ལ་ཡུ་གུར་མི་རིགས་ཚོས་ཆོད་དམག་རྒྱབ་དགོས་པ་དང་དེའི་ཐོག་འཛམ་གླིང་གི་ཁ་ཆེ་བ་ཚོས་རྒྱབ་སྐྱོར་གནང་དགོས་ཀྱི་རེད་ཅེས་འབོད་སྐུལ་ཡང་ཞུས་གནང་ཡོད་པ་རེད།

དེ་ཡང་ལི་སྦི་ཡིས་ཁ་ཆེའི་དྲ་རྒྱའི་བརྒྱུད་ལམ་ནང་དེ་རིང་རེས་གཟའ་ལྷག་པའི་ཉིན་གནས་ཚུལ་སྤེལ་བའི་ནང་འཛམ་གླིང་ནང་གི་ཁ་ཆེ་ཚོས་རྡོག་རྩ་གཅིག་སྒྲིལ་གྱི་ཐོག་ནས་དྲག་རྩུབ་ཅན་གྱི་རྒྱནག་དམར་ཤོག་རིང་ལུགས་ཀྱི་ནུས་སྟོབས་དེ་གཏོར་བཤིག་གཏོང་དགོས་ཀྱི་རེད་ཅེས་གསུང་ཡོད་པ་དང་ཆོས་ལ་ཡིད་ཆེས་མི་བྱེད་མཁན་རྒྱ་ནག་དེ་བཞིན་ཨུ་རུ་སུའི་སྤྱི་མཐུན་རྒྱལ་ཁབ་ནང་བཞིན་མར་ལྷུང་སྟེ་ཁ་བྲལ་འགྲོ་ཡི་རེད་ཅེས་དང་རྒྱ་ནག་གཞུང་གིས་ཁ་ཆེའི་ཆོས་ཀྱི་ཐོག་དྲག་གནོན་བྱེད་པ་སོགས་དྲག་རྩུབ་ཀྱི་ལས་འགུལ་འདྲ་མིན་སྤེལ་བཞིན་ཡོད་པ་དེ་འགོག་ཐབས་ཆེད་ང་ཚོས་དཀོན་མཆོག་གི་ལམ་བཟང་པོའི་ཐབས་ལམ་དང་ཆོས་ཀྱི་མཚོན་ཆ་འཁྱེར་ནས་རྒྱ་ནག་དང་མཉམ་དུ་གདོང་མཐུག་བྱེད་དགོས་ཀྱི་རེད། དེ་ནི་ཁ་ཆེ་བ་ཚོའི་དེ་རིང་གི་ལས་འགན་ཆེ་ཤོས་ཤིག་ཡིན་པ་དང་དེའི་ཐད་ལ་རྒྱལ་སྤྱིའི་ནང་ཡོད་པའི་ཁ་ཆེ་བ་ཚོས་ཤར་ཏུར་ཀི་སི་ཏན་ནང་ཡོད་པའི་ང་ཚོའི་སྤུན་མཆེད་ཚོའི་ཐུགས་འདོད་ལྟར་རྒྱབ་སྐྱོར་མཐའ་གཅིག་ཏུ་གནང་དགོས་ཀྱི་རེད་ཅེས་ལི་སྦི་ཡིས་དེ་རིང་ཁ་ཆེའི་དྲ་རྒྱའི་ཐོག་གནས་ཚུལ་གསལ་སྟོན་གནང་ཡོད་པ་རེད།