བོད་མི་ལྔའི་ཐག་གཅོད་དུས་བཀག་དུས་འགྱངས་བྱས་འདུག

བལ་ཡུལ་རྒྱ་ནག་གཞུང་ཚབ་ཁང་གི་མདུན་འཇུ་བཟུང་བྱས་བའི་བོད་མི་ལྔའི་ཐག་གཅོད་དུས་བཀག་དུས་འགྱངས་བྱས་འདུག
དེ་ཡང་ཟླ་༣པའི་ཚེས༡༠བོད་མིའི་རང་དབང་སྒེར་ལངས་གསུམ་བཅུའི་དུས་དྲན་ཉིན་བལ་ཡུལ་ནང་དམ་བསྒྲཌ་ཡོད་མིན་ལ་མ་ལྟོས་པར། རྒྱལ་ས་ཀ་ཐ་མན་ཀྲོའུ་ནང་རྟེན་གཞི་བྱས་པའི་རྒྱ་ནག་གཞུང་ཚབ་ཡན་ལག་མཐོང་མཆན་ལས་ཁུངས་དང་། ཤིན་ཧ་གསར་ལས་ཁང་ཡོད་སར་གློ་བུར་བོད་དོན་ཞི་བའི་རྔམ་སྟོན་སྐད་འབོད་བྱས་རྐྱེན་འཇུ་བཟུང་བྱས་བའི་བོད་མི་ཕོ་མོ་མི་གྲངས་ལྔ་ཡོད་པ་སྤྱི་ཚེས༡༡ཉིན་ཉེན་རྟོག་བཀག་ཉར་ཁང་ནས་ཀ་ཐ་མན་ཀྲོའུ་རྫོང་སྡེ་ལས་ཁུངས་ལ་ཁྲིད་ཡོད་ཀྱང་། ཐག་གཅོད་གང་ཡང་མ་བྱུང་བར་ཁོང་ཚོའི་ཐག་གཅོད་དུས་ཚོད་བདུན་ཕྲག་གཅིག་གི་རིང་དུས་འགྱངས་བྱས་ནས་ Hanuman Dhokaཉེན་རྟོག་བཀག་ཉར་ཁང་ལ་སྤོར་སྐྱེལ་བྱས་ཡོད་པ་རེད་འདུག དེ་བཞིན་ཉིན་དེར་མཆོད་རྟེན་འཕགས་པ་ཤིང་ཀུན་སྐོར་ལམ་ནས་འཛིན་བཟུང་བྱས་བའི་བཙུན་མ་བཞི་བོ་འབྲུག་ཆེན་རིན་པོ་ཆེའི་བཙུན་དགོན་ནས་ཡིན་པའི་རྒྱ་གར་ལ་དྭགས་པ་ཡིན་པ་ར་སྤྲོད་བྱུང་རྗེས་ཉིན་དེའི་དགོང་དྲོར་གློད་བཀྲོལ་བཏང་ཡོད་པ་རེད་འདུག
གོང་གི་བོད་མི་ལྔ་བོས་གསུམ་བཅུའི་དུས་དྲན་ཉིན་ལག་ལ་བོད་ཀྱི་རྒྱལ་དར་འཕྱར་བཞིན་བོད་རང་བཙན་ཡིན། རྒྱ་མི་བོད་ནས་ཕར་རྒྱུགས་ཤིག བོད་མི་ཚོར་རང་དབང་སྤྲོད་རོགས། མཉམ་སྦྲེལ་རྒྱལ་ཚོགས་ང་ཚོར་དྲང་བདེན་དགོས་ཟེར་བ་སོགས་ཀྱི་རྔམ་སྟོན་སྐད་འབོད་བྱས་སྐབས་འཛིན་བཟུང་བྱས་བ་ཡིན་པ་དང་། ཁོང་ཚོ་ནི་བོད་མི་བསོད་ནམས་བཀྲ་ཤིས་དང་། བསོད་ནམས་ཆོས་སྒྲོན། སྐལ་བཟང་ཀུན་སྒྲོན། མིག་དམར། ཨ་དར་ལེགས་བཅས་ཡིན་པ་རེད།
སྤྱིར་བཏང་རྒྱ་ནག་གི་མངོན་ལྐོག་གཉིས་ཀྱི་གནོན་ཤུགས་ལ་བརྟེན་བལ་ཡུལ་གཞུང་གིས་དུས་རྒྱུན་རྒྱ་ནག་གཅིག་གི་སྲིད་ཇུས་རྒྱུན་འཁྱོངས་བྱེད་ཀྱི་ཡོད་པ་དང་མཉམ། བལ་ཡུལ་ནང་གི་བཙན་བྱོལ་བོད་མི་ཚོའི་འགྲོ་འདུག་སྤྱོད་གསུམ་ལ་དམ་དྲག་ཆེན་པོ་བྱེད་བཞིན་པ་མ་ཟད་། ལྷག་པར་བོད་མིའི་རང་དབང་སྒེར་ལངས་གསུམ་བཅུའི་དུས་དྲན་སླེབས་པར་ཉིན་ཤས་གོང་ནས་བལ་ཡུལ་གཞུང་གིས་བོད་མི་གནས་སྡོད་ས་གནས་གང་སར་དམ་དྲག་ཇེ་ཆེར་བཏང་ཡོད་པ་དང་། ཡུལ་དེའི་ནང་གི་ས་གནས་བོད་ཀྱི་གཞོན་ནུའི་ཚོགས་མི་དང་། བོད་དོན་དངས་བླངས་ལས་འགུལ་བ་སོགས་ཀྱིས་ལས་འགུལ་སྤེལ་བར་དོགས་ནས་དོགས་ཟོན་དང་རྗེས་འདེད་བྱེད་པ་སོགས་སུན་བཙུར་གྱི་དཀའ་ངལ་བཟོ་བཞིན་པ་རེད་འདུག
གསར་འགོད་པ་ཀླུ་འབུམ།