པེ་ཅིང་དུ་བོད་དོན་རྒྱབ་སྐྱོར་བས་སླར་ཡང་སྐད་འབོད་བྱས་འདུག

༄༅༎ཕྱི་ཚེས་༢༡ཉིན་པེ་ཅིང་གི་ཨོ་ལིམ་པིག་རྩེད་འགྲན་གྱི་བྱིའུ་ཚང་དབྱིབས་ཅན་གྱི་རྩེད་རའི་ལྷོ་ཕྱོགས་སུ་བོད་རང་དབང་སློབ་ཕྲུག་ཚོགས་པའི་ཕྱི་རྒྱལ་མི་རིགས་ཡིན་པའི་ཚོགས་མི་བཞིས་བོད་ཀྱི་རྒྱལ་དར་འཕྱར་ནས་བོད་རང་བཙན་ཞེས་པའི་སྐད་འབོད་བྱས་ཡོད་འདུག

དེ་ཡང་བོད་རང་དབང་སློབ་ཕྲུག་ཚོགས་པས་གསར་བསྒྲགས་ཤིག་ཕྱིར་བསྒྲགས་བྱས་ཡོད་པའི་ནང༌། གོང་ཞུས་པེ་ཅིང་ཨོ་ལིམ་པིག་རྩེད་རྭའི་ཕྱི་ཕྱོགས་སུ་བོད་ཀྱི་རྒྱལ་དར་འཕྱར་ནས་བོད་རང་བཙན་གྱི་ངོ་རྒོལ་སྐད་འབོད་བྱེད་མཁན་མི་སྣ་བཞི་པོ་དེ་ནི་འཇར་མན་གྱི་མི་སེར་ཡིན་པའི་བོད་མི་ཞིག་དང༌ དེ་བཞིན་ཨ་རི་བ་གཉིས་དང་དབྱིན་ཇིའི་མི་གཅིག་བཅས་ཡིིན་པ་དང༌། ཁོང་རྣམ་པ་བཞིས་སྐད་འབོད་བྱས་མ་ཐག་པེ་ཅིང་ཉེན་རྟོག་པས་འཇུ་བཟུང་བྱས་ཡོད་པ་འཁོད་འདུག ཕྱིར་བསྒྲགས་དེའི་ནང་ད་དུང་འཁོད་པར་ པེ་ཅིང་ཉེན་རྟོག་ལས་ཁང་གིས་འདས་པའི་ཉིན་གྲངས་ཁ་ཤས་ནང་ངོ་རྒོལ་རྔམ་སྟོན་བྱེད་སྲིད་པའི་ས་ཁུལ་ཁག་ནང་དམ་བསྒྲགས་བྱེད་ཤུགས་ཆེ་རུ་བཏང་ཡོད་པ་འཁོད་འདུག རྒྱ་ནག་གཞུང་གིས་པེ་ཅིང་ཨོ་ལིམ་པིག་རྩེད་འགྲན་རིང་ས་ཁུལ་ཁག་གསུམ་ནང་ངོ་རྒོལ་གྱི་ལས་འགུལ་སྤེལ་ཆོག་པའི་གཏན་འབེབས་ས་ཁུལ་བཟོས་ཡོད་ལུགས་ཕྱིར་བསྒྲགས་བྱས་ཡོད་ན་ཡང༌། ས་ཁུལ་དེ་གསུམ་ནང་ངོ་རྒོལ་གྱི་ལས་འགུལ་སྤེལ་ད་བར་གཅིག་ཀྱང་བྱུང་མེད་ཅིང༌། དེ་གཙོ་བོ་ངོ་རྒོལ་གྱི་ལས་འགུལ་སྤེལ་བར་པེ་ཅིང་ཉེན་རྟོག་བདེ་འཇགས་ལས་ཁང་གི་ཆོག་མཆན་དགོས་ཀྱི་ཡོད་པ་དང༌། ངོ་རྒོལ་གྱི་ལས་འགུལ་སྤེལ་ཆོག་པའི་ཆོག་མཆན་ཞུ་མཁན་ཁག་༧༧ཙམ་བྱུང་ཡོད་ན་ཡང་ད་བར་གཅིག་ལ་ཡང་ཆོག་མཆན་ཐོབ་མེད་པ་རེད། བོད་རང་དབང་སློབ་ཕྲུག་ཚོགས་པས་ཨོ་ལིམ་པིག་རྩེད་འགྲན་སྤེལ་ནས་ད་བར་ཉིན་གྲངས་བཅུ་གྲངས་རིང་ངོ་རྒོལ་གྱི་ལས་འགུལ་ཐེངས་མང་པོ་ཞིག་སྤེལ་ཡོད་པ་དང༌། ངོ་རྒོལ་གནང་མཁན་སློབ་ཕྲུག་ཚོགས་པའི་ཚོགས་མི་མང་ཆེ་བ་ཕྱི་རྒྱལ་གྱི་མི་རིགས་ཡིན་པར་བརྟེན་ནས་ ཁོང་ཚོས་ངོ་རྒོལ་གནང་སྐབས་རྒྱ་ནག་ཉེན་རྟོག་པས་འཇུ་བཟུང་བྱས་ནས་དུས་ཐུང་ནང་རང་ཡུལ་དུ་ཕྱིར་སློག་གཏོང་གི་ཡོད་པ་རེད།