བོད་ཀྱི་ནག་ཆུ་སོག་རྫོང་དུ་བོད་མི་ན་གཞོན་གསུམ་འཛིན་བཟུང༌།

༄༅༎བོད་ཀྱི་ནག་ཆུ་སོག་རྫོང་ཁུལ་གྱི་ན་གཞོན་གསུམ་ཨིན་ཊར་དྲ་རྒྱའི་གནད་དོན་ཐོག་ནས་འཛིན་བཟུང་བྱས་ཡོད་པ་རེད།

དེ་ཡང་བཙན་བྱོལ་བོད་གཞུང་གི་དྲ་གནས་ཐོག་དེ་རིང་གནས་ཚུལ་སྤེལ་བར་གཞིགས་ན་ཉེ་ཆར་ཕྱི་ཟླ་བཅུ་པའི་ཚེས་གཅིག་རྒྱ་ནག་རྒྱལ་དོན་དུས་ཆེན་ཉིན་མོར་བོད་ཀྱི་ནག་ཆུ་སོག་རྫོང་ར་རྟ་གྲོང་ཚོ་ནས་ཡིན་པའི་གཞོན་སྐྱེས་གསུམ་ལ་དྲ་རྒྱ་ཟིན་བྲིས་སོགས་ཀྱི་སྟེང་༸གོང་ས་༸སྐྱབས་མགོན་ཆེན་པོ་མཆོག་གི་སྐུ་དཔར་དང་བཀའ་སློབ་བཞག་ཡོད་པ་དང་དེ་བཞིན་དྲ་རྒྱ་བརྒྱུད་དེ་ཕྱི་ཕྱོགས་སུ་འབྲེལ་བ་ཡོད་ཚུལ་ལ་བརྙད་དེ་གཞོན་སྐྱེས་དེ་གསུམ་འཛིན་བཟུང་བྱས་ཡོད་པ་རེད། ད་ཆ་འཛིན་བཟུང་བྱས་པའི་གཞོན་སྐྱེས་གསུམ་པོ་དེ་དག་ནི་སོག་རྫོང་ར་རྟ་གྲོང་ཚོ་ནས་ཡིན་པའི་རང་ལོ་ཉི་ཤུ་རྩ་ལྔ་སོན་པ་རྒྱལ་སེང་དང་རང་ལོ་ཉི་ཤུ་རྩ་བཞི་སོན་པ་ཉི་མ་དབང་ཕྱུག རང་ལོ་ཉི་ཤུ་རྩ་ལྔ་སོན་པ་ཡེ་ཤེས་ནམ་མཁའ་བཅས་ཡིན་པ་རེད། ན་གཞོན་དེ་རྣམས་འཛིན་བཟུང་བྱས་པའི་རྗེས་ད་བར་ནང་མི་སྤུན་མཆེད་སུ་འདྲ་ཅིག་དང་ཐུག་འཕྲད་བྱེད་དུ་བཅུག་མེད་པ་རེད་བཞག རྩ་བའི་རྒྱ་ནག་གཞུང་གིས་དེང་སྐབས་སོག་རྫོང་ཁུལ་གྱི་དགོན་སྡེ་དང་མང་ཚོགས་ཁྲོད་དུ་རྒྱལ་གཅེས་རིང་ལུགས་ཀྱི་བསམ་བློའི་སློབ་གསོ་ཞེས་པའི་ལས་འགུལ་མུ་མཐུད་སྤེལ་བཞིན་ཡོད་པ་མ་ཟད་སོག་བཙན་དག་དགོན་གྱི་རྒྱུན་སྲོལ་དབྱར་གནས་གྲོལ་རྗེས་སྤྲོ་སེང་གཏོང་སྲོལ་ཡོད་པ་དེ་དག་ཡང་བཀག་འགོག་བྱས་ཏེ་མུ་མཐུད་རྒྱལ་གཅེས་རིང་ལུགས་ཀྱི་བསམ་བློའི་སློབ་གསོའི་ལས་འགུལ་སྤེལ་སྟེ་སེར་སྐྱ་མི་མང་ཚོར་བསུན་བཙིར་ཤུགས་ཆེ་བཟོ་བཞིན་ཡོད་པ་རེད། གང་ལྟར་རྒྱ་ནག་གཞུང་གི་འབྲེལ་ཡོད་ཚན་པས་བོད་ནང་གཞོན་སྐྱེས་ཚོར་ཨིན་ཊར་དྲ་རྒྱ་བལྟ་ཀློག་བྱེད་རྒྱུའི་ཐད་དམ་བསྒྲགས་ཆེན་པོ་བྱེད་ཀྱི་ཡོད་པ་མ་ཟད་ལྷག་པར་དུ་རང་མོས་ཟིན་བྲིས་དང་དྲ་རྒྱའི་ཐོག་གླེང་མོལ་བྱ་ཡུལ་གང་སར་དམ་བསྒྲགས་ཆེན་པོ་བྱེད་བཞིན་པ་དང་ཆབས་ཅིག་གང་སར་སོ་བལྟ་བྱེད་མཁན་ཡང་བཙུགས་ཡོད་པ་རེད།