སྤྱི་ལོ་༢༠༡༥ལོའི་ནོ་བེལ་ཞི་བདེའི་གཟེངས་རྟགས།

༢༠༡༥ལོའི་ནོ་བེལ་ཞི་བདེའི་གཟེངས་རྟགས་དེ་བཞིན་(Tunisia)རྒྱལ་ཁབ་ཀྱི་རྒྱལ་ཡོངས་གྲོས་མོལ་ལྷན་ཚོགས་ཞེས་པར་འབུལ་གཏན་འཁེལ་བ།
དེ་ཡང་ནོར་ཝེ་རྒྱལ་ས་(Oslo)རྟེན་གཞི་བྱས་པའི་ནོ་བེལ་བྱ་དགའ་ཚོགས་ཆུང་གིས་ ༢༠༡༥ལོའི་ནོ་བེལ་ཞི་བདེའི་གཟེངས་རྟགས་དེ་བཞིན་༢༠༡༡ལོར་(Tunisia)ཁ་ཆེའི་རྒྱལ་ཁབ་ནང་(Jasmine Revolution)འམ་དཔྱིད་ཀའི་གསར་བརྗེ་ཆེན་པོ་ཞེས་པའི་གྱེན་ལངས་སྐབས་དམངས་གཙོའི་ལས་འགུལ་སྣེ་འཁྲིད་བྱ་མཁན་(National Dialogue Quartet)ཞེས་(Tunisia)འི་ངལ་རྩོལ་མཉམ་སྦྲེལ་ཚོགས་པ་དང་། (Tunisia)བཟོ་ལས་ཚོགས་པ། (Tunisia)འགྲོ་བ་མིའི་ཐོབ་ཐང་ཚོགས་པ། དེ་བཞིན་(Tunisia)ཁྲིམས་རྩོད་པའི་མཐུན་ཚོགས་བཅས་ལས་གྲུབ་པའི་རྒྱལ་ཡོངས་གྲོས་མོལ་ལྷན་ཚོགས་ཞེས་པར་འབུལ་རྒྱུའི་གསལ་བསྒྲགས་གནང་འདུག  
ནོ་བེལ་ཞི་བདེ་ཚོགས་ཆུང་གིས་གསུངས་དོན་ལྟར་ན། གོང་གསལ་ཚོགས་པ་དེ་དག་གིས་Tunisiaནང་གསར་བརྗེ་གྱེན་ལངས་བྱུང་པའི་གནས་སྟངས་སྐབས། རྙོག་གླེང་དེ་དག་ཞི་མོལ་འགྲིགས་འཇགས་ཀྱི་ལམ་ནས་སེལ་ཐབས་ཙམ་མ་ཟད། ཆབས་ཅིག་རྒྱལ་ཁབ་ཀྱི་ངོ་བོ་དེ་ རང་དབང་དམངས་གཙོའི་ཁ་ཕྱོགས་སུ་སྣེ་འཁྲིད་བྱས་པ་བརྒྱུད་དཀྱིལ་ཤར་ཡུལ་གྲུ་དང་། ནུབ་ཨ་ཧྥེ་རི་ཀ་བཅས་པའི་རྒྱལ་ཁབ་ཁག་ནང་། ཞི་བདེ་དང་། དམངས་གཙོའི་རང་དབང་འཐབ་རྩོད་བྱེད་མཁན་རྣམས་ལ་མིག་དཔེ་དང་། སེམས་འགུལ་གྱི་ཤུགས་རྐྱེན་གཏིང་ཟབ་བྱུང་བར་ངོས་འཛིན་བྱས་པ་མ་ཟད། ད་ལྟའི་Tunisiaརྒྱལ་ཁབ་ནང་གི་དམངས་གཙོའི་འཕེལ་རིམ་དེ་བཞིན་སྲ་བརྟན་དུ་གནས་རྒྱུའི་སེམས་ཤུགས་ཀྱི་སྐུལ་སློང་འཕེལ་ཐབས་ཆེད་ཡིན་པ་གསལ་འདོན་གནང་འདུག
༢༠༡༡ལོར་Tunisiaརྒྱལ་ཁབ་ནང་མང་ཚོགས་རང་བཞིན་ལྡན་པའི་གསར་བརྗེའི་གྱེན་ལངས་རྐྱེན་པས་སྲིད་དབང་གཅིག་སྡུད་ཀྱི་ལམ་ལུགས་མེད་པ་བཟོ་ཐུབ་ཡོད་པ་མ་ཟད། གསར་བརྗེ་གྱེན་ལངས་དེའི་ཤུགས་རྐྱེན་འོག་Syriaདང་། Saudi Arabia Iranལ་སོགས་པའི་དཀྱིལ་ཤར་དང་། ནུབ་ཨ་ཧྥེ་རི་ཀའི་རྒྱལ་ཁབ་ཁག་ནང་། སྲིད་དབང་གཅིག་སྡུད་ཀྱི་ལམ་ལུགས་ལ་མང་ཚོགས་ནས་ངོ་རྒོལ་གྱེན་ལངས་ཀྱི་གནས་ཚུལ་གཅིག་མཇུག་གཉིས་མཐུད་བྱུང་དང་བྱུང་མུས་བཞིན་པ་རེད།  
གནས་ཚུལ་ནང་གསལ་ལྟར་ན། ཐེངས་འདིའི་ནོ་བེལ་ཞི་བདེའི་གཟེངས་རྟགས་བཞེས་མཁན་གྱི་འོས་མིའི་མཚན་གཞུང་ཁོངས་སུ་ཇར་མན་སྲིད་བློན་Angela Merkelམཆོག་དང་། ཡི་ཤུ་གནམ་བདག་ཆོས་ལུགས་ཀྱི་བླ་ཆེན་Pope Francisཨ་རིའི་ཕྱི་སྲིད་དྲུང་ཆེ་John Kerryསོགས་གཙོས་པའི་འོས་མི་༢༧༣བྱུང་ཡོད་པ་རེད

གསར་འགོད་པ་དོན་གྲུབ་རྣམ་རྒྱལ།