ကျောက်တောင်ကမ်းပါး ပြိုကျပြီး ရေမဆေးသမား နှစ်ဦး သေဆုံး

ကချင်ပြည်နယ် ဖားကန့်မြို့နယ် ဆိပ်မူအုပ်စု ဘဇံချောက်မှော်က သက်တမ်းကုန်နေတဲ့ လုပ်ကွက်တစ်ခုမှာ စက်တင်ဘာ ၁ ရက်နေ့ မနက်ပိုင်းက ကျောက်တောင်ကမ်းပါးပြိုကျတာကြောင့် ကျောက်တူးနေတဲ့ တနိုင်တပိုင်ရေမဆေးသမား ၂ ဦးသေဆုံးပြီး ၄ ဦး ဒဏ်ရာရရှိခဲ့ပါတယ်။

သေဆုံးသူ ၂ ဦးကို မနေ့က သဂြိုၤဟ်လိုက်တယ်လို့ ဆိပ်မူမြို့ သင်္ခါလူမှုကူညီရေးအသင်းရဲ့ ဥက္ကဋ္ဌ ဦးခင်မောင် က ပြောပါတယ်။

ပေငါးရာလောက်မြင့်တဲ့ ကျောက်တောင်ကမ်းပါးပြိုကျမှုမှာ လူ ၁ ဦး နေရာမှာတင် ပွဲချင်းပြီးသေဆုံးပြီး ၁ ယောက်က ဖားကန့်ဆေးရုံရောက်ချိန်မှာ သေဆုံးခဲ့တာလို့ ဆိုပါတယ်။

ဖားကန့်ကျောက်စိမ်းတွင်းဒေသမှာ မိုးတွင်းကာလဆိုရင် ကျောက်တောင်ကမ်းပါးပြိုကျပြီး၊ ပွင့်လင်း ရာသီချိန် ဆောင်းနဲ့ နွေရာသီတွေမှာ စွန့်ပစ်မြေစာပုံပြိုကျလို့ မကြာခဏထိခိုက် သေဆုံးမှုတွေ ရှိနေတာဖြစ်ပါတယ်။

ဖားကန့်ကျောက်စိမ်းနယ်မြေမှာ မြန်မာနိုင်ငံဒေသအသီးသီးကနေ လာရောက်လုပ်ကိုင်နေကြတဲ့ ပြည် တွင်းရွှေ့ပြောင်းလုပ်သား နှစ်သိန်းဝန်းကျင်ရှိပြီး အဲဒီအထဲမှာ တနိုင်တပိုင် ရေမဆေး ကျောက်ရှာဖွေ တူးဖော်လုပ်ကိုင်နေကြသူတွေက အများဆုံးဖြစ်ပါတယ်။