ယာယီသက်သေခံကဒ်ပြား လေး သိန်းနီးပါး လက်ခံရရှိ

ရခိုင်ပြည်နယ်မှာ သက်တမ်းကုန်ဆုံးတဲ့ ယာယီသက်သေခံကဒ်ပြားတွေကို ဒီနေ့ နောက်ဆုံးထား လက်ခံသိမ်း ဆည်းခဲ့ရာမှာ ကဒ်ပြားပေါင်း ၃၉၀,၀၀၀ ကျော်ကို လက်ခံရရှိခဲ့တယ်လို့ ရခိုင်ပြည်နယ်အစိုးရက ပြောပါတယ်။

ရခိုင်ပြည်နယ်မှာ ယာယီသက်သေခံကဒ်ပြား ကိုင်ဆောင်သူ ၆ သိန်း ၆ သောင်း ကျော်ရှိတာကြောင့် တဝက်ကျော် ပဲ လက်ခံရရှိတယ်လို့ ရခိုင်ပြည်နယ် လူဝင်မှု ကြီးကြပ်ရေးနဲ့ အမျိုးသားမှတ်ပုံတင်ရေးဦးစီးဌာန ညွှန်ကြားရေးမှူး ဦးခင်စိုးက ပြောပါတယ်။

"၃၉၂၂၈၅ ပါ၊ အဲ့ဒါက လက်ရှိကျနော်တို့ ၃ နာရီထိရတဲ့သတင်းပါ၊ ဘင်္ဂါလီ ကိုယ်စားလှယ်တွေကရော၊ ရပ်ကွက်အုပ်ချုပ်ရေးမှူးကရော၊ သူတို့ထဲမှာရှိတဲ့ သူအားလုံးကတော့ အကုန်အပ်ပြီးပါပြီတဲ့၊ ကျန်တဲ့သူ အားလုံးကတော့ ပျောက်တာနဲ့ သေတာတွေများပါတယ်တဲ့၊ တချို့ကျတော့လည်း ဒီမှာ ၂၀၁၂ မှာတုန်းက အရေးအခင်းဖြစ်တဲ့အချိန်တုန်းက ပြောင်းတာရွှေ့တာနဲ့ ကဒ်ပြားတွေမီးလောင်၊ ပျောက်ဆုံးတာတွေ များနေကြ တာပါတဲ့"

မြန်မာနိုင်ငံမှာ မတ်လ ၃၁ ရက်နေ့က သက်တမ်းကုန်ဆုံးသွားတဲ့ ယာယီသက်သေခံ လက်မှတ်တွေကို ဧပြီလ ၁ ရက်နေ့ကနေစတင်ပြီး ဒီနေ့မေလ ၃၁ ရက်နေ့ အထိ လက်ခံသိမ်းဆည်းခဲ့တာဖြစ်ပါတယ်။

ယာယီသက်သေခံကဒ်ပြား ပြန်အပ်သူတွေကို လက်ခံရရှိကြောင်း အထောက်အထား စာရွက်တွေ ထုတ်ပေးထား ပြီး အစိမ်းရောင်ကဒ်ပြားတွေ ထုတ်ပေးသွား မယ်လို့ ပြည်ထောင်စုဝန်ကြီး ဦးခင်ရီက ပြောထားပါတယ်။

ရခိုင်ပြည်နယ်အတွင်းမှာရှိတဲ့ မွတ်စလင်တွေကို စစ်အစိုးရလက်ထက် လွန်ခဲ့တဲ့ ၁၉၉၀ ခုနှစ်လောက်ကစတင်ပြီး ယာယီသက်သေခံကဒ်ပြားတွေထုတ်ပေးခဲ့တာဖြစ်ပါတယ်။