ဝ အဖွဲ့ကို နားလည်မှုလွဲမှားတဲ့ အတွက် တောင်းပန်ထားကြောင်း အစိုးရပြော

၂၁ ရာစုပင်လုံညီလာခံကနေ UWSA ၀ အဖွဲ့ထွက်ခွာသွားတာဟာ နားလည်မူလွဲမှားမူဖြစ်တဲ့ အတွက် တောင်းပန်ကြောင်းနဲ့ နောက်ထပ်ကျင်းပမယ့် ၂၁ ရာစုပင်လုံ ညီလာခံတက်ရောက်နိုင်ဖို့ NCA လမ်းကြောင်း အတိုင်းသွားမှာဖြစ်ကြောင်း သမ္မတရုံးဝန်ကြီးဌာန ပြောရေးဆိုခွင့်ရှိသူ ဦးဇော်ဌေး ကပြောပါတယ်။

ဝပြည်သွေးစည်းညီညွတ်ရေးပါတီ UWSP က စက်တင်ဘာလ ၂ ရက်နေ့ ရက်စွဲနဲ့ ၂၁ရာစု ပင်လုံညီလာခံကနေ ဘာကြောင့် ထွက်ခွာသလဲဆိုတာနဲ့ ပတ်သက်ပြီး ကြေညာချက် ထုတ်ပြန်လိုက်ပါတယ်။ အဲဒီအပေါ် အစိုးရရဲ့ သဘောထားကို မေးမြန်းရာမှာ ဦးဇော်ဌေးက အခုလို ပြောပါတယ်။

"၀ ပြည်သွေးစည်းညီညွတ်ရေးပါတီ UWSP ဥက္ကဌ ဦးပေါက်ယူချန်းဆီ လိပ်မူပြီး ဖြစ်သွားတဲ့အစီအစဉ် အတွက် တောင်းပန်တဲ့ စာလွှာကို ကျွန်တော်တို့ ပေးပို့ ခဲ့ပါတယ်။ သူတို့ထုတ်ပြန်ချက်နဲ့ ပတ်သက်လို့ ကတော့ စိတ်မကောင်းဖြစ်ရတယ်၊ နောက်နောင်မှာ ဒီလိုမျိုးခံစားချက်တွေ မဖြစ်ရအောင် ပိုပြီးဂရုစိုက် ရမယ်ဆိုတာ ကျွန်တော်တို့ ညီလာခံပြီး ပြုလုပ်တဲ့ ပြန်လည်သုံးသပ်ရေး အစည်းအဝးမှာ ပြောကြဆိုကြ လုပ်ခဲ့ကြပါတယ်"

UWSA ၀ အဖွဲ့က နေပြည်တော်မှာ ပြုလုပ်တဲ့ ၂၁ ရာစုပင်လုံညီလာခံက ထွက်ခွာခဲ့တာဟာ ညီလာခံ အစီအစဉ် တရားမျှတမူမရှိတာနဲ့ ပွင့်လင်းမြင်သာမူ မရှိတာကြောင့်လို့ ကြေညာချက်မှာ ပါရှိပါတယ်။

အဲဒီလို ထွက်ခွာခဲ့ပေမယ့် ဒေါ်အောင်ဆန်းစုကြည်ဦးဆောင်ပြုလုပ်တဲ့ ပင်လုံညီလာခံကို ထောက်ခံကြောင်းနဲ့ ငြိမ်းချမ်းရေးကို လိုလာကြောင်း ပြောထားပါတယ်။