ကျဆုံးသူရုပ်အလောင်း ဘင်္ဂလားဒေ့ရှ်အရာရှိတွေထံ လွှဲပြောင်းပေးအပ်

မြန်မာ-ဘင်္ဂလားဒေ့ရှ်နယ်စပ်မှာ အခုလ ၂၈ ရက်နေ့ က ဖြစ်ပွားခဲ့တဲ့ ပစ်ခတ်မှုအတွင်း ကျဆုံးသွားသူတစ်ဦး ရဲ့ ရုပ်အလောင်းကို ဘင်္ဂလားဒေ့ရှ်အရာရှိတွေ လက်ထဲ ကို ဒီကနေ့ လွှဲပြောင်းပေးလိုက်ပြီလို့ သိရပါတယ်။

အဲဒီပစ်ခတ်မှုအတွင်း ပျောက်ဆုံးနေသူတစ်ဦးကို ဘင်္ဂလားဒေ့ရှ်အစိုးရဘက်က တောင်းဆိုထား တာဖြစ်ပြီး၊ ဒီကနေ့မှာတော့ မြန်မာ့တပ်မတော်က နယ်စပ်မှာ လွှဲပြောင်းပေးလိုက်တာလို့ မြန်မာနိုင်ငံ ရဲတပ်ဖွဲ့ ပြောခွင့်ရပုဂ္ဂိုလ် ဒုတိယရဲမှူးကြီး မင်းအောင် က ပြောပါတယ်။

"ကျနော်သိရသလောက် ၁၁ နာရီလောက်မှာ သူတို့လွှဲလိုက်တယ်လို့တော့ သိပါတယ်၊ သူတို့အဖွဲ့ထဲက လူကြီးတစ်ယောက် လာယူတယ်လို့ပြောပါတယ်၊ လွှဲပေးတာတော့ ကျနော်တို့ တပ်မတော်အဖွဲ့က လွှဲပေးတာပါ"

ရခိုင်ပြည်နယ် မောင်တောနယ်စပ် နယ်ခြားမှတ်တိုင်အမှတ် ၅၃၊ ၅၄ ကြားမှာ မြန်မာနယ်ခြားစောင့်ရဲတပ်ဖွဲ့နဲ့ ဘင်္ဂလားဒေ့ရ်ှ နယ်ခြားစောင့်တပ်ဖွဲ့(BGB)တို့အကြား မနေ့က ညနေ ၄ နာရီလောက်ကလည်း တိုက်ပွဲတစ်ကြိမ် ထပ်မံဖြစ်ပွားခဲ့ကြောင်း အမည်မဖော်လိုတဲ့ မောင်တောမြို့နယ် ရဲအရာရှိတစ်ဦးက RFA ကိုအတည်ပြု ပြောပါတယ်။

"မနေ့ကတော့ အဲဒီအလောင်းကို လွှဲပြောင်းပေးဖို့ ချိန်းတာပေါ့နော်၊ ချိန်းတော့ ဒီဘက်ကအဖွဲ့က လွှဲပေးဖို့စောင့်နေတာ၊ အဲဒီလွှဲပြောင်းယူမယ့်အဖွဲ့ရောက်လာပြီးတော့ စပစ်တယ်ပြောတာပဲ၊ အဲလိုနဲ့ အပြန်အလှန်ပစ်ကြတယ်ပြောတာပဲ"

မနေ့က ဖြစ်ပွားခဲ့တဲ့ တိုက်ပွဲဟာ အချိန် ၁၅ မိနစ်လောက်ကြာမြင့်ခဲ့ပြီး နှစ်ဖက်အကျအဆုံးမရှိကြောင်းလည်း အဲဒီရဲအရာရှိကပြောဆိုပါတယ်။

ဘင်္ဂလားဒေ့်ရှ်-မြန်မာနယ်စပ် တင်းမာမှုနောက်ဆုံးအခြေအနေတွေနဲ့ ပတ်သက်လို့ မောင်တောဒေသခံ ကုန်သည် ဦးလှမြင့်ကို RFA အဖွဲ့သား ကိုကျော်ကျော်အောင်က ဆက်သွယ်မေးမြန်း တင်ပြထားတာ နားဆင်နိုင်ပါတယ်။

ပစ်ခတ်မှုအတွင်း ကျဆုံးသွားသူတစ်ဦးရဲ့ ရုပ်အလောင်းကို ဘင်္ဂလားဒေ့်ရှ်အရာရှိတွေလက်ထဲ  လွှဲပြောင်းပေးလိုက်တာနဲ့ ပတ်သက်လို့ မြန်မာနိုင်ငံ ရဲတပ်ဖွဲ့ ပြောခွင့်ရပုဂ္ဂိုလ် ဒုတိယရဲမှူးကြီး မင်းအောင်ကို RFA အဖွဲ့သူ မသင်းသီရီ ဆက်သွယ်မေးမြန်းထားတာကိုလည်း နားဆင်နိုင်ပါတယ်။