ဗီဇာသက်တမ်းကုန် မြန်မာ အလုပ်သမားတွေကို ထိုင်းရဲတွေ စတင်ဖမ်းဆီး

ထိုင်းနိုင်ငံမှာ အလုပ်လုပ်ကိုင်နေတဲ့ မြန်မာရွှေ့ပြောင်း အလုပ်သမားတွေအတွက် ထုတ်ပြန်ထားတဲ့မူဝါဒဟာ ရှင်းလင်းပြတ်သားမှုမရှိတဲ့အတွက် ဗီဇာသက်တမ်းကုန် သွားတဲ့ မြန်မာအလုပ်သမားတွေ စတင်အဖမ်းခံနေ ရပြီလို့ ထိုင်းအလုပ်သမားအဖွဲ့တွေက ပြောပါတယ်။

ထိုင်းနဲ့ မြန်မာအစိုးရတွေ သဘောတူလက်မှတ်ရေး ထိုးထားတဲ့ နှစ်နိုင်ငံနားလည်မှုစာချွန်လွှွာအရ ထိုင်းနိုင်ငံမှာ ၄ ကြာ နေထိုင်ပြီးသွားတဲ့ မြန်မာ အလုပ်သမားတွေ  မိခင်နိုင်ငံကို ပြန်ကြရ မှာဖြစ်ပြီး၊ မြန်မာနိုင်ငံမှာ ၃ နှစ် ပြန်လည်နေ ထိုင်ပြီးမှသာ ထိုင်းနိုင်ငံမှာ နောက်ထပ်တစ်ကြိမ် သွားရောက်အလုပ်လုပ်ကိုင်ခွင့်ရှိမှာ ဖြစ်ပါတယ်။

ဒါပေမဲ့ ၄ နှစ်ကြာ နေထိုင်ပြီးသွားတဲ့ မြန်မာ အလုပ်သမားတွေ နိုင်ငံကိုပြန်စရာမလိုဘဲ ထိုင်းနိုင်ငံ မှာ ဆက်လက်နေထိုင် အလုပ်လုပ်ကိုင်ခွင့်ပြုမယ့် အစီအစဉ်တစ်ခုကို ထိုင်းအလုပ်သမားဝန်ကြီးဌာနက ထိုင်းအစိုးရအဖွဲ့ထံ အဆိုပြုတင်ပြထားပါတယ်။ အဲဒီအစီအစဉ်သစ်တင်ပြပြီး မကြာခင်မှာပဲ ထိုင်းအောက်လွှတ်တော် ဖျက်သိမ်းလိုက်မှု၊ လက်ရှိအစိုးရအနေနဲ့ အိမ်စောင့်အစိုးရအဖွဲ့အဖြစ် အသွင်ပြောင်းသွားမှုစတဲ့ အခြေအနေတွေကြောင့် ၄ နှစ် ဗီဇာသက်တမ်းကုန်သွား တဲ့ မြန်မာအလုပ်သမားတွေကို ထိုင်းအာဏာပိုင်တွေက စတင်ဖမ်းဆီးနေတာဖြစ်တယ်လို့ ဘန်ကောက်မြို့ စမုတ်စခွန်မြို့နယ်အခြေစိုက် LPN အလုပ်သမားအခွင့်အရေး မြှင့်တင်ရေးကွန်ရက်အဖွဲ့က ပြောပါတယ်။

ထိုင်းအလုပ်သမားဝန်ကြီးဌာနက တင်သွင်းတဲ့ အဆိုပြုချက်ကိုခွင့်ပြုဖို့  ဝန်ကြီးချုပ်ယင်လတ်ရဲ့ အိမ်စောင့်အစိုးရမှာ အခွင့်အာဏာမရှိတဲ့အတွက် ကြန့်ကြာနေတာလည်း ဖြစ်ပါတယ်။ မြန်မာအာဏာပိုင်တွေက လုပ်သက် ၄ နှစ်ရှိ မြန်မာအလုပ်သမားတွေ ထိုင်းနိုင်ငံမှာ ဖမ်းဆီးအရေးယူမခံရဘဲ အလုပ်လုပ်ကိုင်နိုင်တယ် လို့ ပြောနေပေမယ့် ထိုင်းရဲတွေရဲ့ ဖမ်းဆီးမှုကို ခံနေကြရဆဲဖြစ်တယ်လို့ အလုပ်သမားအခွင့်အရေး မြှင့်တင်ရေး ကွန်ရက်အဖွဲ့ ညွှန်ကြားရေးမှူးက ပြောပါတယ်။

မြန်မာအလုပ်သမားတွေကို အခုလိုဖမ်းဆီးပြီး ပြန်ပို့နေမယ်ဆိုရင် ထိုင်းနိုင်ငံရဲ့စီးပွားရေးကို ဆိုးဆိုးဝါးဝါး ထိခိုက်လာနိုင်စရာရှိတာကြောင့် ဖမ်းဆီးတာတွေရပ်တန့်ဖို့ ထိုင်းအလုပ်သမားဝန်ကြီးဌာနက ထိုင်းရဲတပ်ဖွဲ့ကို မေတ္တာရပ်ခံထားတယ်လို့လည်း သိရပါတယ်။