ထိုင်းမှာ တရားမဝင် အလုပ်သမားတွေကို ဖမ်းဆီးမှု ယာယီရပ်ဆိုင်း

"အဓိကကတော့ အလုပ်ရှင်မတူတဲ့ အလုပ်သမားတွေကလည်း အလုပ်ရှင်အချိန်မီပြောင်းလို့ရအောင်၊ အဓိကတော့ သူတို့လက်ရှိ ပြီးခဲ့တဲ့ရက်ပိုင်းအတွင်းက ဖမ်းနေတဲ့အဖမ်းဆီးတွေကို ခဏရပ်မယ်ဆို တာတော့ ပါတာပေါ့။ ရက်ကတော့ ဘယ်နေ့နောက်ဆုံးဆိုတာတော့ မတွေ့ရဘူး။ အနည်းဆုံးကတော့ တလလောက်ကတော့ ကျနော်တို့ ဒီလက်မှတ်တွေ၊ စာရွက်စာတန်းတွေလုပ်ဖို့ အချိန်ပေးမယ့်သဘော ရှိတယ်။ ရပ်ဆိုင်းတယ်ဆိုတဲ့ သဘောပဲ ကြေညာတာပါ။ အတိအကျကြီး ဘယ်နေ့ ဘယ်ရက်အထိ ဖမ်းမယ် ဆီးမယ်ဆိုတာတော့ မပါသေးဘူးခင်ဗျ။"

ထိုင်းနိုင်ငံ ဝန်ကြီးချုပ်က ဥပဒေသစ်ကို ခေတ္တရပ်ဆိုင်းတယ်ဆိုပြီး အလုပ်သမားဝန်ကြီးဌာနက မနေ့က ထုတ်ပြန်လိုက်တာဖြစ်ပါတယ်။

တရားဝင်လက်မှတ်ကိုင်ဆောင်ထားတဲ့ အလုပ်သမားတွေထဲမှာ လက်မှတ်ထဲမှာပါတဲ့ အလုပ်ရှင်နဲ့ လက်ရှိ အလုပ်ရှင် မတူရင် ပြန်ပြောင်းဖို့ ၊ ယာယီနိုင်ငံကူးလက်မှတ်ကိုင်ထားတဲ့ အလုပ်သမားတွေ၊ MOU နိုင်ငံကူး လက်မှတ်ကိုင်ဆောင်ထားသူတွေကလည်း အလုပ်လုပ်ခွင့်ပါမစ်လုပ်ကြဖို့ ထိုင်းအစိုးရက တိုက်တွန်းထားပါတယ်။

ပြီးခဲ့တဲ့ ရက်ပိုင်းက ဖမ်းဆီးမှုတွေ များလာတာကြောင့် တရားမဝင် အလုပ်လုပ်နေကြတဲ့ ထောင်နဲ့ချီတဲ့ မြန်မာ အလုပ်သမားတွေဟာ မြဝတီ မဲဆောက်နယ်စပ်ဘက်ကနေ ပြန်လာတာများသလို တခြားနယ်စပ်ဂိတ်တွေ ကနေလည်း ပြန်လာနေကြပါတယ်။

ထိုင်းအစိုးရက တရားမဝင်အလုပ်သမားတွေနဲ့ ပတ်သက်တဲ့ ဥပဒေသစ်ကို ဇွန်လ ၂၀ ရက်နေ့က ပြဌာန်းခဲ့ပါတယ်။ အဲဒီ ဥပဒေအရ ဖမ်းဆီးခံရရင် တရားမဝင် အလုပ်သမားတွေအနေနဲ့ ထိုင်းဘတ်ငွေ ၂ ထောင်ကနေ ၄ သိန်းအထိ ဒဏ်ရိုက်ခံရနိုင်တာဖြစ်ပြီး ထောင်ဒဏ်အနေနဲ့လည်း ၅ နှစ်အထိ ချမှတ်ခံရနိုင်ပါတယ်။

အဲဒီဥပဒေ ပြဌာန်းပြီးနောက်ပိုင်းမှာ ထောင်နဲ့ချီတဲ့ မြန်မာအလုပ်သမားတွေ အဖမ်းခံထားရပြီး အတော်များများဟာ လည်း တောတွေထဲမှာ ထွက်ပြေးတိမ်းရှောင်နေကြရတယ်လို့ မြန်မာရွှေ့ပြောင်းလုပ်သားတွေကို ကူညီပေးနေတဲ့ အဖွဲ့တွေက ပြောပါတယ်။