ရှမ်းပါတီနဲ့ လက်နက်ကိုင်အဖွဲ့တွေ ပင်လုံအတွက် တိုင်ပင်

ရှမ်းပြည်နယ်က နိုင်ငံရေးပါတီတွေ၊ ရှမ်းလူမှုအဖွဲ့အစည်းတွေနဲ့ တိုင်းရင်းသား  လက်နက်ကိုင် အဖွဲ့အစည်းတွေရဲ့ ငြိမ်းချမ်းရေးအပေါ် သဘောထားတွေကို ၂၁ ရာစု  ပင်လုံညီလာခံမှာ တင်ပြနိုင်ဖို့အတွက် ဒီနေ့ တောင်ကြီးမြို့ မှာ  ဆွေးနွေးကြပါတယ်။

ရှမ်းပြည်နယ် တောင်ကြီးမြို့ တောင်ကြီးဟိုတယ်မှာ ပြုလုပ်တာဖြစ်ပြီး တက်ရောက်လာတဲ့ အဖွဲ့ အစည်းတွေရဲ့ အမြင်သဘောထားတွေကို ဆွေးနွေးခဲ့ကြတယ်လို့ ရှမ်းတိုင်းရင်းသားများ ဒီမိုကရေစီအဖွဲ့ချုပ်ပါတီက တွဲဖက်အတွင်းရေးမှူး ၂ ဦးစိုင်းကျော်ညွန့်က ပြောပါတယ်။

"အခုကျင်းပမယ့် ညီလာခံမှာ တက်ရောက်ဆွေးနွေးရရင်တော့ဖြင့် ကျနော်တို့ တက်ရောက်ခွင့်မရတဲ့ နိုင်ငံရေး ပါတီဖြစ်စေ၊ ဒါမှမဟုတ် ကျနော်တို့နဲ့ မိတ်ဖက် CSO အဖွဲ့အစည်းတွေဖြစ်စေ သူတို့ရဲ့ငြိမ်းချမ်းရေးအပေါ် မှာ နောက်ပြီးတော့ ပြည်ထောင်စု တည်ဆောက်ရေးအပေါ်မှာ သူတို့ရဲ့အကြံပြုချက်တွေအပေါ် ကျနော်တို့ က ဆွေးနွေးပြီးတော့ ကျနော်တို့ ပါတီတစ်ခုတည်းကို ပြောတာမဟုတ်ပါဘူး၊ တခြားမှာလည်း အနိုင်ရတဲ့ ပါတီတွေလည်းရှိတယ်၊ အဲ့ဒါရှမ်းပြည်နယ်မှာရှိတဲ့ ပါတီတွေအားလုံးရဲ့ အသံတွေလည်း ပါသွားအောင်ဆိုပြီး ကျနော်တို့ ရည်ရွယ်ကျင်းပရခြင်းဖြစ်ပါတယ်"

အမျိုးသားရင်ကြားစေ့ရေးနဲ့ ငြိမ်းချမ်းရေးအပေါ် အကြံပြုချက်များ၊ ဖက်ဒရယ်တည်ဆောက်ရေးဆိုင်ရာ မူဝါဒများနဲ့ အမျိုးသားတန်းတူရရှိရေး၊ ကိုယ်ပိုင်ပြဌာန်းခွင့်နဲ့ ဒီမိုကရေစီအဓိပ္ပါယ်ဖွင့်ဆိုခြင်းဆိုတဲ့ ခေါင်းစဉ် ၃ ခုကို ဆွေးနွေး ကြပါတယ်။

အဲ့ဒီဆွေးနွေးချက်တွေကို ၂၁ ရာစုပင်လုံညီလာခံမှာ တက်ရောက်ခွင့်ရမယ့် နိုင်ငံရေးပါတီတွေက ကိုယ်စားလှယ်တွေက တင်ပြနိုင်ရေးအတွက် ရည်ရွယ်တာဖြစ်ပါတယ်။

ဒီအစည်းအဝေးကို ရှမ်းပြည်ညီညွတ်ရေးကော်မတီက ဦးဆောင်ကျင်းပတာဖြစ်ပြီး မနက်ဖြန်မှာလည်း ဆက်လက်ဆွေးနွေးကြမှာ ဖြစ်ပါတယ်။

ဒီနေ့ အစည်းအဝေးကို ရှမ်းပြည်နယ်ထဲက နိုင်ငံရေးပါတီ ၁၉ ခု၊ ရှမ်းပြည်အခြေစိုက် အရပ်ဘက် လူမှုအဖွဲ့အစည်း ၁၀ ဖွဲ့နဲ့ တိုင်းရင်းသားလက်နက်ကိုင်အဖွဲ့တွေဖြစ်ကြတဲ့ RCSS/SSA ၊ SSPP/SSA စတဲ့ အဖွဲ့အစည်းတွေ တက်ရောက်ကြပါတယ်။

ဒီအစည်းအဝေးကို တက်ရောက်နေတဲ့ ရှမ်းတိုင်းရင်းသားများ ဒီမိုကရေစီအဖွဲ့ချုပ်က တွဲဖက်အတွင်းရေးမှူး ၂ ဦးစိုင်းကျော်ညွန့်ကို RFA သတင်းထောက် ကိုကျော်သူ က ဆက်သွယ်မေးမြန်းထားပါတယ်။