AI စွဲချက်ကို အစိုးရ လူ့အခွင့်အရေး ကော်မရှင် ငြင်း

ဒီဇင်ဘာလ ၂၇ ရက်နဲ့ ၂၈ ရက်မှာ ကော်မရှင်ကိုယ်တိုင် အင်းစိန်ထောင်ကို သွားရောက်ပြီး အစာငတ်ခံ ဆန္ဒပြခဲ့တဲ့ အကျဉ်းသားသုံးဦးကို တွေ့ဆုံ မေးမြန်း ခဲ့တယ်လို့ ကြေညာချက်မှာ ဖော်ပြထားပါတယ်။

အစိုးရကော်မရှင် အနေနဲ့ ထောင်တွင်း အခြေအနေမှန်တွေကို သေသေချာချာ ဆန်းစစ်ဖို့ လိုနေသေးတယ်လို့ နိုင်ငံတကာ လွတ်ငြိမ်းချမ်းသာခွင့်အဖွဲ့ အာရှပစိဖိတ် ဆိုင်ရာ လက်ထောက် ညွန်ကြားရေးမှူး Donna Guest က အာအက်ဖ်အေကို ပြောပါတယ်။

တကယ့် အခြေအနေမှန်တွေ သိရဖို့ အကျဉ်းထောင်တွေထဲ သွားပြီး အကျဉ်းသား တစ်ဦးချင်းနဲ့ လွတ်လပ်စွာ တွေ့ဆုံမေးမြန်းခွင့် ရှိရမှာဖြစ်ကြောင်း၊ ဒါအပြင် အင်းစိန်အကျဉ်းထောင်ကို တစ်ကြိမ်တစ်ခါတည်း သွားရောက်လေ့လာပြီး ‘အခြေအနေ အားလုံး ကောင်းပါတယ်’ လို့ ကောက်ချက်ချလို့ မဖြစ်ကြောင်း သူက ပြောပါတယ်။ မိမိကိုယ်တိုင် AI အဖွဲ့ ကိုယ်စားလှယ်တစ်ဦး အနေနဲ့ အင်းစိန်အကျဉ်းထောင်ထဲကို အကြိမ်ပေါင်းများစွာ သွားရောက်လေ့လာခဲ့ကြောင်း၊ AI အဖွဲ့ အနေနဲ့ အဓိက စိုးရိမ်တဲ့အချက်က အင်းစိန် အကျဉ်းထောင်တွင်း တွေ့ဆုံမေးမြန်းခံရတဲ့ နိုင်ငံရေး အကျဉ်းသားတွေရဲ့ လုံခြုံရေး ဖြစ်ကြောင်း၊ သူတို့ ပြောပြချက်တွေနဲ့ ပတ်သက်လို့ ထောင်အာဏာပိုင်တွေ အနေနဲ့ ညှဉ်းပန်းနှိပ်စက်မှု မရှိပါဘူး ဆိုတဲ့ အာမ,ခံချက် ရှိဖို့လိုကြောင်း စသဖြင့် Donna Guest က ပြောသွားပါတယ်။