ရွေးကောက်ပွဲနေ့မှာ နိုင်ငံခြားသတင်းဌာန သတင်းထောက်တွေ နယ်ပို့ဖို့ စီစဉ်နေ

မဲပေးတဲ့နေ့မှာ ပြည်နယ်နဲ့တိုင်း (၁၄) ခုကို ၁၈ နေရာ ခွဲပြီး သွားရောက် လေ့လာနိုင်အောင် သွားလာ နေထိုင်ရေးကအစ အာဏာပိုင်တွေက စီစဉ်ပေးမှာ ဖြစ်ပြီး သတင်းရယူရာမှာ စည်းကမ်းကန့်သတ်ချက်တွေ အတော်များများ ထုတ်ပြန်ထားတယ်လို့ ရန်ကုန်အခြေစိုက် အမည်မဖော်လိုတဲ့ နိုင်ငံခြားသတင်းထောက် တဦးက RFA ကို ဒီကနေ့ ပြောပါတယ်။

သတင်းထောက်တွေအနေနဲ့ မဲရုံနဲ့ပေ (၁၅၀) ကျော် အကွာအဝေးကနေ သတင်းယူကြရမှာ ဖြစ်တဲ့အပြင် မဲ ပေးနေပုံတွေ၊ မဲေ ရတွက်နေပုံတွေနဲ့ နိုင်ငံတကာ သံတမန်တွေ လှည့်လည် ကြည့်ရှုနေပုံတွေကို အဝေးကနေ ကင်မရာ Zoom ကို အသုံးပြုပြီး ဓာတ်ပုံရိုက်ကူးခွင့် ပေးထားပေမယ့် လျှို့ဝှက် မဲဆန္ဒပြုနေပုံနဲ့ ပယ်မဲတွေကိုတော့ ဓာတ်ပုံရိုက်ခွင့် ပိတ်ပင်ထားတယ်လို့ သိရပါတယ်။

ပြည်ပအခြေစိုက် BMA မြန်မာသတင်းသမဂ္ဂ ဥက္ကဌ ဦးမောင်မောင်မြင့်ကတော့ စစ်အစိုးရက ပြည်တွင်းအခြေစိုက် သတင်းထောက်တွေ၊ သံတမန်တွေကို မဲရုံတွေအနီး သွားရောက် ကြည့်ရှုနိုင်အောင် အခုလို စီစဉ်တာဟာ ရွေးကောက်ပွဲကို လွတ်လပ် တရားမျှတမှု ရှိသယောင်၊ ထင်သာမြင်သာ ရှိသယောင် ဟန်ပြ ဖန်တီးတဲ့ လုပ်ရပ်သက်သက်သာ ဖြစ်ပြီး စစ်အစိုးရ အဆက်ဆက် ပြုလုပ်ခဲ့တဲ့ မူးယစ်ဆေးဝါး မီးရှို့ပွဲ သဘောမျိုးသာ ဖြစ်တယ်လို့ ဝေဖန်ပါတယ်။

နိုင်ငံခြားက လာရောက်မယ့် သတင်းထောက်တွေ၊ ရွေးကောက်ပွဲ စောင့်ကြည့်ရေး အဖွဲ့တွေကိုပါ ပိတ်ပင်ထားတဲ့အတွက် စစ်အစိုးရက လွတ်လပ်ပြီး တရားမျှတတဲ့ ရွေးကောက်ပွဲ ကျင်းပမယ်ဆိုတဲ့ ပြောဆိုမှုတွေအပေါ် လေ့လာသူတွေက သံသယ ရှိနေကြပါတယ်။ သွားရောက် လေ့လာခွင့်ရရှိတဲ့ ပြည်တွင်း သတင်းထောက်တွေကို အမျိုးမျိုး ကန့်သတ်ထားတဲ့အပြင် မဲလိမ်မဲခိုးမှုတွေ၊ မသမာမှုတွေကို ပြည်တွင်း သတင်း မီဒီယာတွေမှာ လွတ်လွတ်လပ်လပ် ဖော်ပြခွင့် ရမှာမဟုတ်ဘူးလို့ ရန်ကုန် သတင်းထောက်တွေက ပြောပါတယ်။

ရွေးကောက်ပွဲ သတင်းယူကြမယ့် ရန်ကုန်အခြေစိုက် သတင်းထောက်တွေဟာ နိုဝင်ဘာလ ၆ ရက်နေ့က စတင်ပြီး နယ်တွေကို ထွက်ခွာကြရမှာဖြစ်ပြီး နိုဝင်ဘာလ ၈ ရက်နေ့ မနက်မှာ ရန်ကုန်ကို ပြန်လည် ရောက်ရှိကြမယ်လို့လည်း သိရပါတယ်။