ပြည်က ဝမ်းရောဂါ ကျေးလက်ကို ကူးစက်

မြို့ပေါ်ရပ်ကွက်တွေက သောက်သုံးရေတွင်းတွေ၊ အိမ်သာတွေပါ ရေနစ်မြုပ်ပြီးနောက် ပြီးခဲ့တဲ့ ဇူလိုင်လ ၁၁ ရက်နေ့ကစပြီး ဝမ်းပျက်ဝမ်းလျှောရောဂါ စတင်ပျံ့နှံ့လာတာဖြစ်ပါတယ်။

ဝမ်းရောဂါကြောင့် ပြီးခဲ့တဲ့ရက်ပိုင်းက ပြည်မြို့က ကုတင် ၅၀၀ ဆံ့ ဆေးရုံမှာ လူ ၁၀၀ ကျော် ဆေးကုသခံခဲ့ရပြီး တစ်ဦးသေဆုံးခဲ့ကာ အခုဆိုရင် ဆေးရုံမှာ ၃၇ယောက် ကျန်ရှိနေပါတယ်။

ရောဂါစဖြစ်ပွားတဲ့နေရာမှာ ရောဂါပျံ့နှံ့မှု မရှိတော့ပေမယ့် တခြားကျေးရွာတွေကို ကူးစက်နေတဲ့အတွက် ပြည် ခရိုင်ကျန်းမာရေးဦးစီးဌာနတွေ၊ မြို့နယ်အုပ်ချုပ်ရေးမှုးတွေ၊ လွှတ်တော်ကိုယ်စားလှယ်တွေက ရောဂါဖြစ်ပွား တဲ့ နေရာတွေမှာ အသိပညာပေးတာတွေ၊ ရေတွေမှာ ကလိုရင်းခတ်တာတွေ ၊ ရေသန့်ဖြန့်ဝေပေးတာတွေ လုပ်ပေးနေတာဖြစ်ပါတယ်။

ပြည်မြို့မှာ ရောင်းချနေတဲ့ မုန့်ဟင်းခါးဆိုင်၊ အသုပ်ဆိုင်၊ ဝက်သားထုတ်ထိုးဆိုင်နဲ့ ဝမ်းနူးစာ အရောင်းဆိုင်တွေကို ယာယီပိတ်ဖို့ ရပ်ကွက်နဲ့ ကျေးရွာအုပ်ချုပ်ရေးမှူးတွေက ပြီးခဲ့တဲ့နှစ်ရက်လောက်က ညွှန်ကြားထားပါတယ်။

ပဲခူးတိုင်း ပြည်မြို့မှာ ဝမ်းပျက်ဝမ်းလျှောရောဂါ စတင်ဖြစ်ပွားတဲ့ ရပ်ကွက်တွေမှာ ထပ်မံမကူးစက်တော့ပေမယ့် တခြားကျေးရွာတွေအထိ ပျံ့နှံ့နေတယ်လို့ ပဲခူးတိုင်း လွှတ်တော်ကိုယ်စားလှယ် ဦးကျော်ဇေယျ က  ပြောပါတယ်။