ချင်းအမျိုးသားတပ်ဦး တပ်ဖွဲ့ဝင် ၂ ဦးကို မတရားအသင်းဥပဒေနဲ့ အမှုဖွင့်

ကချင်လွတ်မြောက်ရေးတပ်မတော် KIA ဌာနချုပ် လိုင်ဇာမှာ အခြေခံစစ်သင်တန်း လေးလာကြာ တက်ရောက်ခဲ့တဲ့ ချင်းအမျိုးသားတပ်ဦး CNF က အသက် ၂၀ ကျော်အရွယ် တပ်ဖွဲ့ဝင် ၂ ဦးကို ရန်ကုန်တိုင်းရဲတပ်ဖွဲ့က ရဲအုပ်ကျော်ဝင်းနိုင်က မတရားအသင်းဥပဒေပုဒ်မ ၁၇ (၁) နဲ့ အခုလ ၂၃ ရက်နေ့က အမှုဖွင့်လိုက်ပါတယ်။

ဒဂုံမြို့သစ်တောင်ပိုင်းမြို့နယ် ၊သုံးခွရပ်ကွက်၊ အမှတ် ၂ လမ်း ၊ ဒီဇင်ဘာ အိမ်ယာဝင်းအတွင်း တိုင်ခန်းတစ်ခန်းမှာ နေထိုင်နေကြတဲ့ ဆလိုင်းနိုင်ထွန်းနဲ့ အောင်ရန်လင်း ဆိုသူနှစ်ဦးကို အခုလ ၂၂ ရက်နေ့က ရဲတပ်ဖွဲ့က ဝင်ရောက် စစ်ဆေးပြီး အမှုဖွင့်ထားတာဖြစ်ပါတယ်။

သူတို့နှစ်ဦးဟာ ၂၀၁၇ စက်တင်ဘာလအတွင်း CNF ကို ဝင်ရောက်ခဲ့ပြီး အောက်တိုဘာလမှာ KIA မှာ စစ်သင်တန်း တက်ရောက်ခဲ့ကြောင်း၊ KIA က ဖွင့်လှစ်မယ့်ဗိုလ်လောင်းသင်တန်းကို တက်ရောက်ဖို့ စောင့်ဆိုင်းနေစဉ်ကာလမှာ ဆက်လက်တာဝန် မထမ်းဆောင်လိုတော့တာကြောင့် တက္ကသိုလ် ပညာဆက်သင်ကြားဖို့ ရန်ကုန်ကို ထွက်ပြေးလာ တာဖြစ်ကြောင်း ရဲစစ်ချက်မှာ ဖော်ပြပါတယ်။

တရားလို ရဲအုပ်ကျော်ဝင်းနိုင်၊ တောင်ဒဂုံရဲစခန်းမှူး ဒုရဲမှူးမောင်မောင်နဲ့ တောင်ဒဂုံမြို့နယ်ရဲစခန်းတို့ကို RFA က ဆက်သွယ်မေးမြန်းရာမှာ အမှုဖွင့်တိုင်းကြားချက်နဲ့ ပတ်သက်လို့ ငြင်းဆိုမှုမရှိပေမယ့် အရေးယူ ဆောင်ရွက်နေမှုနဲ့ ပတ်သက်လို့ တစ်စုံတရာဖြေကြားတာ မရှိပါဘူး။

ချင်းအမျိုးသားတပ်ဦး CNF ရဲ့ ပြောရေးဆိုခွင့်ရှိသူ ဒေါက်တာဆလိုင်းလျန်မှုန်းဆာခေါင်းနဲ့ ဒေါက်တာရွှေခါး တို့ကို ဆက်သွယ်မေးမြန်းရာမှာ ဒီအကြောင်းကို သေချာမသိသေးကြောင်းနဲ့ ဖမ်းဆီးခံရသူတွေဟာ တပ်ဖွဲ့ဝင်တွေ ဟုတ်၊ မဟုတ် အတည်မပြုနိုင်သေးကြောင်းပြောပါတယ်။

CNF အနေနဲ့ စစ်ဆေးပြီးအတည်ပြုချက်ရပြီဆိုရင် ကြေညာချက် ထုတ်ပြန်သွားမှာဖြစ်ကြောင်း ပြောပါတယ်။