AAက ဖမ်းထားသူများ ပြန်လွတ်ရေး လှုပ်ရှားမှု

AA ဖမ်းဆီးခေါ်ဆောင်သွားသူတွေ ပြန်လွတ်မြောက်ရေးအတွက် ရဲပရဟိတ ကူညီရေးအဖွဲ့က ဦးဆောင်ပြီး မန္တလေးမြို့မှာ ၂၀၁၉ နိုဝင်ဘာ ၂၆ ရက်နေ့က ဆုတောင်းပွဲပြလုပ်စဉ်

ရက္ခိုင့်တပ်တော် AA က ဖမ်းဆီးခေါ်ဆောင်သွားသူများထဲမှာ မန္တလေးဘက်ကလည်း ပါဝင်ပါတယ်။ မန္တလေး၊ ပြည်ကြီးတံခွန်မြို့နယ်မှာ နေထိုင်တဲ့ ဒေါ်ခင်သန်းညွန့်က AA လက်ထဲ ရောက်နေတဲ့ သားဖြစ်သူ ဒုရဲအုပ် မျိုးကိုကို ရဲ့ အခြေအနေကို စိုးရိမ်နေပါတယ်။ အထိန်းသိမ်းခံနေရသူတွေ လွတ်မြောက်ရေးအတွက် ရည်ရွယ်တဲ့ လှုပ်ရှားမှု တစ်ခုလည်း မန္တလေးမှာ ဒီကနေ့ ပြုလုပ်ခဲ့ပါတယ်။.

ဒေါ်ခင်သန်းညွန့်က သားဖြစ်သူ ဒု ရဲအုပ် မျိုးကို ကို အဲဒီလို ဖမ်းဆီးခေါ်ဆောင်ခံရတာကို သတင်းမီဒီယာက တဆင့်သာ သိရှိရတယ်လို့ ပြောပါတယ်။  

ရခိုင်ပြည်နယ်ကို ပြောင်းရွေ့တာဝန်ထမ်းဆောင်နေရတာ သုံးနှစ်ကြာပြီဖြစ်တဲ့  ဒုရဲအုပ်မျိုးကိုကိုဟာ အဲဒီနေ့က  အပေါက်ဝရဲစခန်းကနေ စစ်တွေကို အမှုတွဲသွားပို့တဲ့ လမ်းခရီးမှာ ဖမ်းဆီးခေါ်ဆောင်ခံရတာဖြစ်တယ်၊ အချိန်အားဖြင့် ၂၈ ရက် ကြာသွားပြီလို့ ဒေါ်ခင်သန်းညွန့်က ပြောပြပါတယ်။

“ဓာတ်ပုံတွေ တက်လာတော့ အသက်ရှင်လျက်နဲ့ရှိတယ်ဆိုတာလေးတော့ သိထားပါတယ်။ ရှေ့ဆက်လည်း ဆုတောင်းပါတယ်။ ဒီနေ့ထိလည်း စားလို့လည်း မရဘူး၊ သွေးစိမ်ရှင်ရှင်ထွက်သလို ခံစားရတယ်။ ချွေးမလေးဆို ပူဆွေးသောကရောက်နေတယ်။   မန္တလေးက ပြည်ကြီးတံခွန်မှာနေတာပါ။ သားနဲ ပြည်သူပြည်သားတွေကို ဒေါ်အောင်ဆန်းစုကြည်၊ ဗိုလ်ချုပ်မင်းအောင်လှိုင်တို့ ကယ်ပေးပါ။  တာဝန်ကျတာ သုံးနှစ်ရှိလို့ ပြောင်းရခါနီးပြီ၊ အဲဒီနေ့က စစ်တွေဘက်ကို အမှုတွဲသွားပို့တာ။ လမ်းမှာ၊ ကားပေါ်မှာ တစ်ယောက်တည်း ဆွဲချခံရတာ။ တာဝန်နဲ့သွားရင်း ဖမ်းခံရတာ၊ တခါမှာ ဒီလိုမကြားဖူးပါဘူး”

ရဲတပ်ဖွဲ့ဝင်မိသားစု တစ်ယောက်ဖြစ်တဲ့ မထားယုခိုင် ကလည်း ဒီကနေ့ဆုတောင်းပွဲမှာ အခုလိုတောင်းဆို ခဲ့ပါတယ်။

"တပ်ဖွဲ့ဝင်အချင်းချင်း စိတ်ဓာတ်သာတူညီမျှခံစားရပါတယ်။ အဲဒီစိတ်ဓာတ်နဲ့ လာဝန်းရံတာပါ"

မကြာသေးခင်က AA ဖမ်းဆီးခေါ်ဆောင်သွားသူတွေထဲမှာ မီးသတ်သမားတစ်ဦး၊ အိန္ဒိယနိုင်ငံသားတစ်ဦးတို့ သေဆုံးခဲ့ပါတယ်။  သူတို့သေဆုံးတာဟာ ညှဉ်းပန်းနှိပ်စက်ခံရလို့ မဟုတ်ဘဲ တောင်အတက်အဆင်းရှိတဲ့လမ်း ခရီးသွားကြချိန်မှာ သေဆုံးတာလို့ AA က ပြောပါတယ်။ မေယုမြစ်အတွင်း အမြန်ရေယာဉ်ပေါ်ကနေ ဖမ်းဆီးခေါ် ဆောင်ခံရသူတွေထဲက တချို့သေဆုံးကြတာကတော့ တပ်မတော်က သူတို့ကို သွားရောက်ကယ်ဆယ်ချိန် ပစ်ခတ်မှုတွေကြောင့်လို့ သိရပါတယ်။

ရခိုင်ပြည်နယ်ထဲ တာဝန်ထမ်းဆောင်နေတဲ့ ဌာနဆိုင်ရာ ဝန်ထမ်းတချို့ဟာလည်း ရခိုင်ပြည်နယ် တိုက်ပွဲတွေနဲ့ ဆက်စပ်ပြီး AA အဖွဲ့ရဲ့ ဖမ်းဆီးထားတာခံနေရပါတယ်။

ရဲပရဟိတအဖွဲ့ကလည်း AA ရဲ့ဖမ်းဆီးခြင်းခံထားရတဲ့ နိုင်ငံဝန်ထမ်းတွေဟာ သုံ့ပန်းတွေမဟုတ်ပါဆိုတဲ့ ခေါင်းစဉ်နဲ့ မန္တလေးမြို့၊ မဟာမုနိဘုရားကြီးမှာ  ဒီကနေ့ မနက်ပိုင်းက ဆုတောင်းပွဲပြုလုပ်ခဲ့ပါတယ်။

တာဝန်ထမ်းဆောင်ရင်း အခုလိုဖမ်းဆီးခံထားရတဲ့  ရဲဝန်ထမ်းတွေနဲ့ နိုင်ငံဝန်ထမ်းတွေ အမြန်ဆုံး လွတ်မြောက် စေချင်တယ်လို့ ရဲပရဟိတအဖွဲ့ဥက္ကဋ္ဌ ကိုမြတ်သူဟိန်းက ပြောပါတယ်။

နိုင်ငံဝန်ထမ်းတွေက သုံ့ပန်းတွေမဟုတ်ပါဆိုတဲ့ ခေါင်းစဉ်နဲ့ဒီကနေ့မနက်ပိုင်းက မန္တလေးမြို့၊ မဟာမုနိ ဘုရားကြီးမှာ ရဲပရဟိတအဖွဲ့က ဆုတောင်းပွဲပြုလုပ်ခဲ့ပါတယ်။

ဒီကနေ့ ဆုတောင်းပွဲကို အင်အား ၁၀၀ ခန့်နဲ့ ပြုလုပ်ဖို့ ခွင့်ပြုမိန့်တင်ခဲ့ပေမဲ့  ဘုရားပေါ်မှာဖြစ်လို့ ခွင့်ပြုချက် မရရှိခဲ့တာကြောင့်  ရဲပရဟိတအဖွဲ့ဝင် ၆ ယောက်နဲ့ ပြုလုပ်ခဲ့ရတယ်လို့ သိရပါတယ်။

ရခိုင်တပ်မတော်အေအေနဲ့ မြန်မာစစ်တပ်တို့ဟာ  အခုနှစ်တွေအတွင်းမှာ တိုက်ပွားဖြစ်ပွားတာတွေ ခပ်စိတ်စိတ် ဖြစ်လာနေပြီး  အေအေဘက်ကလည်း အစိုးရသတင်းပေးဆိုကာ သံသယရှိသူတွေကို ဖမ်းဆီးတာတွေပြုလုပ် သလို မြန်မာစစ်တပ်ဘက်ကလည်း အေအေအဖွဲ့နဲ့ သက်ဆိုင်တယ်လို့ သံသယရှိသူတွေကို ဖမ်းဆီးစစ်ဆေး တာတွေပြုလုပ်ပါတယ်။

ပြီးခဲ့တဲ့နိုဝင်ဘာ ၁၂ ရက်စွဲနဲ့ ထုတ်ပြန်တဲ့ AA အဖွဲ့ရဲ့ ကြေညာချက်မှာ ရဲတပ်ဖွဲ့ဝင် ကိုးဦး၊ တပ်မတော်သား ခြောက်ဦး၊ အကျဉ်းဦးစီးဝန်ထမ်း တစ်ဦး၊ တပ်အင်ဂျင်နီယာ တစ်ဦး စုစုပေါင်း ၁၇ ဦးကို သုံ့ပန်းချင်း လဲလှယ် လိုကြောင်း ထုတ်ပြန်ခဲ့ပါတယ်။

သုံ့ပန်းလဲလှယ်ရေးနဲ့ ပတ်သက်ပြီးတော့ အစိုးရနဲ့ တပ်မတော်ဘက်က လက်မခံနိုင်ဘူးလို့ ငြင်းဆိုထားပါတယ်။

AA ရက္ခိုင့်တပ်တော်ရဲ့ လုပ်ရပ်တွေဟာ ဥပဒေနဲ့မညီတဲ့အတွက် AA က ကမ်းလှမ်းထားတဲ့  သုံ့ပန်းလဲ လှယ်ရေး အစီအစဉ်ကို လက်ခံမှာမဟုတ်ဘူးလို့ နိုဝင်ဘာလ၁၅ ရက်နေ့ကပြုလုပ်တဲ့ သမ္မတရုံး သတင်းစာရှင်းလင်းပွဲမှာ သမ္မတရုံး ပြောခွင့်ရသူ ဦးဇော်ဌေးက ပြောဆိုထားပါတယ်။