လူ့အခွင့်အရေးကော်မရှင်အဖွဲ့ဝင် တချို့ကို အရေးယူပေးဖို့အဆို လွှတ်တော်အတည်ပြု

ကော်မရှင်အဖွဲ့ဝင်တချို့ကို အရေးယူဖို့ ပြည်သူ့လွှတ်တော်က အတည်ပြုလိုက်ပြီဖြစ်တဲ့အတွက် တာဝန်ရှိ တဲ့ ကော်မရှင်ဝင်တချို့ကို ရာထူးကရပ်ဆိုင်းပြီး စုံစမ်းစစ်ဆေးရမှာဖြစ်တယ်လို့ ပြည်သူ့လွှတ်တော် ဥပဒေ ကြမ်းကော်မတီဥက္ကဌ ဦးထွန်းထွန်းဟိန် က ပြောပါတယ်။

"ပထမဆုံးက သူတို့ကို ရာထူးကနေရပ်စဲဖို့ အရေးကြီးတယ်၊ ရာထူးရပ်စဲပြီးတဲ့အခါမှသာ စုံစမ်းစစ်ဆေးရေး ပြန်ပြီးတော့လုပ်ရမယ်"

လူ့အခွင့်အရေး ချိုးဖောက်ခံရမှုတွေကို အကာအကွယ်မပေးခဲ့တဲ့ မြန်မာနိုင်ငံ အမျိုးသား လူ့အခွင့်အရေးကော်မရှင် အဖွဲ့ဝင်တချို့ကို ထိရောက်စွာ အရေးယူပေးဖို့ ပြည်ထောင်စု အစိုးရထံ တိုက်တွန်းကြောင်းအဆိုကို ပြည်သူ့ လွှတ်တော်ကိုယ်စားလှယ် ဦးဌေးဝင်းအောင် (ခ) ဦးပြုံးချို က ပြီးခဲ့တဲ့ စက်တင်ဘာလ ၂၂ရက်နေ့က တင်သွင်းခဲ့ တာဖြစ်ပါတယ်။

အဆိုကို ဆွေးနွေးသူအားလုံးက ထောက်ခံခဲ့ကြပြီး မဲခွဲဆုံးဖြတ်ရာမှာ အဆိုကို ထောက်ခံမဲ ၃၇၄မဲ၊ ကန့်ကွက်မဲ ၁မဲ နဲ့ အတည်ပြုလိုက်တာဖြစ်ပါတယ်။

မြန်မာနိုင်ငံ အမျိုးသားလူ့အခွင့်အရေးကော်မရှင်ကို ပြီးခဲ့တဲ့အစိုးရလက်ထက်မှာ ဖွဲ့စည်းခဲ့တာဖြစ်ပါတယ်။