ရခိုင်စစ်ရှောင်တို့ကို ကျောင်းသားသမဂ္ဂ တိုက်ရိုက်လှူခွင့်မရ

ရခိုင်ပြည်နယ် မင်းပြားမြို့နယ်က စစ်ဘေးရှောင်တွေကို လှူဒါန်းဖို့သွားတဲ့ ပခုက္ကူကျောင်းသားမဂ္ဂ အဖွဲ့ဟာ ဒုတိယအကြိမ် တားမြစ်ခံနေရပြီး စစ်ဘေးရှောင်တွေကို တိုက်ရိုက်လှူဒါန်းခွင့်မရခဲ့ဘူးလို့ ပခုက္ကူကျောင်းသားမဂ္ဂအဖွဲ့ အတွင်းရေးမှူး ကိုမျိုးသူအောင်က RFA ကို ပြောပါတယ်။

ပခုက္ကူကနေ အောက်တိုဘာ ၁၇ ရက်နေ့က ထွက်ခွာလာတဲ့ ပခုက္ကူ ကျောင်းသားမဂ္ဂအဖွဲ့ဟာ အမ်းမြို့အဝင်ဂိတ်မှာ ပြီးခဲ့တဲ့ရက်ပိုင်းက တားမြစ်ခံခဲ့ရပြီးနောက် ရခိုင်ပြည်နယ် လွှတ်တော် ဥက္ကဋ္ဌ ဦးစံကျော်လှ ထောက်ခံချက်နဲ့ မနေ့က နေ့လယ်ပိုင်းမှာ ဆက်လက်ထွက်ခွာနိုင်ခဲ့ပေမယ့် ညဘက်မှာတော့ ထပ်ပြီးတားမြစ်ခံရတာဖြစ်ပါတယ်။

လွှတ်တော် ဥက္ကဋ္ဌက မင်းပြားမြို့ပေါ်အထိပဲ အကူအညီပေးနိုင်တာကြောင့် စစ်ဘေးဒုက္ခသည်တွေထံသို့ သွားရောက်ခွင့် မရတာလို့ သိရပါတယ်။

မင်းပြားမြို့နယ် အထွေထွေအုပ်ချုပ်ရေးမှူးက လုံခြုံရေးအရဆိုပြီး မနေ့ည ၇ နာရီက မင်းပြားမြို့ထဲမှာ တားမြစ်ခဲ့တာဖြစ်ပါတယ်။

စစ်ဘေးရှောင်တွေအတွက် လှူဒါန်းမယ့်ပစ္စည်းတွေကို အစိုးရက ဖွဲ့စည်းထားတဲ့ အကူအညီပေးရေးအဖွဲ့ထံကိုသာ အပ်နှံခဲ့ဖို့ အုပ်ချုပ်ရေးမှူးက ပြောတယ်လို့ ပခုက္ကူ ကျောင်းသားမဂ္ဂအဖွဲ့ အတွင်းရေးမှူး ကိုမျိုးသူအောင်က ပြောပါတယ်။

"တပ်မတော်ကစောင့်တဲ့ဂိတ်တွေရဲ့ ဟိုဘက်ကို ကျော်မသွားဘူးဆိုတော့ ကျွန်တော်တို့က ဒီတပ်မတော် ကစောင့်တဲ့ ဂိတ်တွေရဲ့ဟိုဘက်က အခြေအနေကို ကျွန်တော်တို့ လုံးဝကြည့်လို့မရဘူး။ အဲဘက်မှာရှိနေ တဲ့ပြည်သူတွေ ဘယ်လိုခံစားနေရလဲဆိုတာ မသိရဘူး။ ရခိုင်ပြည်ဒေသဟာ လူ့အခွင့်အရေး လုံးဝကင်းမဲ့ဇုန်လို့ ပြောလို့ရတဲ့ အခြေအနေရောက်သွားပြီ။ ဒီရွာမှာဆိုရင် ဖြတ်လေးဖြတ်နဲ့ ဖြတ်ထားတယ်။ လမ်းပန်းဆက် သွယ်ရေးဖြတ်တယ်။ အင်တာနက်လည်း ဖြတ်ထားတယ်။ ကျန်းမာရေးတောင်မှ ရိုးရာနည်းတွေနဲ့ ကုသနေရတဲ့ အခြေအနေမှာရှိတယ်"

ဒီအဖွဲ့ဟာ ပြည်နယ်အစိုးရအဖွဲ့ရဲ့ တရားဝင်ခွင့်ပြုချက်လည်း မရထားဘူးလို့ ဆိုပါတယ်။

ကျောင်းသားတွေကတော့ မင်းပြားမြို့ရဲ့ အရှေ့မြောက်ဘက်ခြမ်းက စစ်ဘေးသင့်ရွာတွေဖြစ်တဲ့ မင်းဖူးအုပ်စုနဲ့ ဖုံသာအုပ်စုမှာရှိတဲ့ စစ်ဘေးဒုက္ခသည်တွေကို ဆန်၊ ဆီ စားနပ်ရိက္ခာနဲ့ အဝတ်အထည်တွေ ကိုယ်တိုင်သွားရောက် လှူဒါန်းလိုတာဖြစ်ပါတယ်။

ဒီရွာမှာဆိုရင် ဖြတ်လေးဖြတ်နဲ့ ဖြတ်ထားတယ်

ပြည်နယ်အစိုးရက ခွင့်မပြုလို့ သွားခွင့်မရတဲ့အတွက် ရခိုင် အမျိုးသားပါတီ၊ ချင်းကျောင်းသားသမဂ္ဂနဲ့ အစိုးရအဖွဲ့တို့က တဆင့်သာ လှူဒါန်းရမှာပါ။

ဒီရွာတွေကို ရောက်ဖို့အတွက် မင်းပြားမြို့ကနေ စက်လှေနဲ့ ၁ နာရီကျော်ခန့် သွားရမှာဖြစ်ပြီး တပ်မတော်ရှိတဲ့ ရာမောင်တံတားဂိတ်ကိုဖြတ်ပြီး သွားရတာပါ။

ဒီရက်ပိုင်းအတွင်း မြောက်ဦးနဲ့ ကျောက်တော်တို့မှာ ဖြစ်ပွားခဲ့တဲ့အတွက် လုံခြုံရေးအရ စစ်ဆေးရေး တင်းကြပ်ထားတာလို့ အနောက်ပိုင်းတိုင်းစစ်ဌာနချုပ် တိုင်းဦးစီး ဗိုလ်မှူးကြီး ဝင်းဇော်ဦးက ပြောပါတယ်။

"မင်းပြားနဲ့ မြောက်ဦးကြားက လမ်းပေါ်မှာတော့ မအေးချမ်းဘူးလေ။ စေတနာနဲ့ လုံခြုံရေးကြောင့် တားတာဖြစ်မှာပါ။ အခြားရည်ရွယ်ချက်တော့ မရှိပါဘူး"

အဲဒီဒေသမှာရှိတဲ့ ကျေးရွာပေါင်း ၃၀ ကျော်က လူပေါင်း တစ်သောင်းကျော်ခန့်ကတော့ စစ်ဘေးကြောင့် လယ်လုပ်စားလို့ မရတော့တဲ့အတွက် စားနပ်ရိက္ခာ အခက်အခဲဖြစ်နေတယ်၊ လာရောက်ထောက်ပံ့သူတွေလည်း ကန့်သတ်ခံနေရတယ်လို့ စစ်ဘေးရှောင်တွေကို အကူအညီပေးတဲ့လုပ်ငန်း ဆောင်ရွက်တဲ့ ကိုအမ်းသားကြီးက ပြောပါတယ်။

"အစိုးရကထောက်ပံ့တာတော့ မတွေ့ပါဘူး။ ထောက်ပံ့မယ်လို့ ပြောတာတွေလည်း မတွေ့ဘူး။ ပြည်သူတွေက ထောက်ပံ့ဖို့သွားရင်လည်း အစိုးရက တားတာရှိပါတယ်။ ပြည်သူတွေကို သွားမယ်ဆိုရင် မသွားနဲ့ဆိုပြီး လုံခြုံရေးအကြောင်းပြ၊ အကြောင်းအမျိုးမျိုးနဲ့ ပြည်သူတွေကို တားဆီးပိတ်ပင်တာတွေ ရှိပါတယ်"

စစ်ရှောင်တွေအတွက် လိုအပ်နေတဲ့ ရိက္ခာတွေအတွက် အရပ်ဖက်အဖွဲ့အစည်းတွေ အလှူရှင်တွေက ကူညီဖြည့်ဆည်းပေးရာမှာ အစိုးရရဲ့ခွင့်ပြုချက်နဲ့သာ အကူအညီပေးရမယ်ဆိုပြီး ပြီးခဲ့တဲ့ ဧပြီလ ပထမပတ်က ညွှန်ကြားချက်တစ်ရပ် ထုတ်ပြန်ခဲ့တာပါ။ နေရပ်စွန့်ခွာထွက်ပြေးနေရသူတွေဟာ စားနပ်ရိက္ခာ လိုအပ်နေပြီး အစိုးရက လက်တွေ့မှာ ကူညီတာ နည်းပါးနေသေးသလို အရပ်ဖက်က အကူအညီတွေ တားဆီးခံရတဲ့ အခြေအနေလည်း ရှိနေပါတယ်။

တိုက်ပွဲစဖြစ်ချိန်ကာလကတည်းက ဒီနေ့အချိန်အထိ နိုင်ငံတော်က သတ်မှတ်ပေးထားတဲ့ နှုန်းအရ ထောက်ပံ့ကူညီ တာတွေ လုပ်နေပေမယ့် လမ်းပန်းဆက်သွယ်မှု အခက်အခဲနဲ့ လုံခြုံရေး ခွင့်မပြုတဲ့နေရာတွေကိုတော့ အကူအညီ မရောက်နိုင်ဘူးလို့ ရခိုင်ပြည်နယ် သဘာဝဘေးအန္တရာယ် စီမံခန့်ခွဲရေး ဦးစီးဌာန ဦးစီးအရာရှိ ဦးရဲမင်းဦးက ပြောပါတယ်။

"မင်းပြားဆိုရင် မြောက်ဦးခရိုင်အထဲမှာ ပါတယ်လေ။ မြောက်ဦးခရိုင်က ဆောင်ရွက်ရမယ့်အလုပ်ပေါ့။ မြောက်ဦးခရိုင် ဦးစီးမှူးရုံးကနေပြီး မင်းပြား၊ မြောက်ဦး၊ ကျောက်တော်၊ မြေပုံ၊ ကန်းထောင်းကြီးအထိ အဲဒီမှာရှိတဲ့ ဒုက္ခသည်တွေကို နိုင်ငံတော်က သတ်မှတ်ပေးထားတဲ့ နှုန်းထားအရ ထောက်ပံ့ကူညီရမယ်ဆိုတဲ့ မူအတိုင်း မြောက်ဦးခရိုင် ဦးစီးမှူးရုံးကနေ ဆောင်ရွက်ပေးနေတာတွေတော့ ရှိပါတယ်"

အစိုးရက စစ်ဘေးရှောင်တစ်ဦးကို ကျပ် ၉ ထောင်နှုန်းနဲ့ လစဉ်ထောက်ပံ့ပေးနေတာလို့ သိရပါတယ်။

ရခိုင်ပြည်နယ်အတွင်း တနှစ်နီးပါးကြာလာပြီဖြစ်တဲ့ AA နဲ့ တပ်မတော်တို့ကြား တိုက်ပွဲကြောင့် စစ်ဘေးရှောင် သုံးသောင်းခန့်ရှိတယ်လို့ အစိုးရစာရင်းတွေအရ သိရပြီး၊ ရခိုင်တိုင်းရင်းသား မျိုးနွယ်စုများ အစည်းအရုံး REC စာရင်းတွေအရကတော့ နေရပ်စွန့်ခွာ ထွက်ပြေးနေရသူ ခုနှစ်သောင်းနီးပါး ရှိနေပါတယ်။

အခုလို အကူအညီပေးရေးအဖွဲ့တွေ လွတ်လပ်စွာသွားလာလှူဒါန်းခွင့် မရှိတာကြောင့် စစ်ဘေးရှောင်တွေဟာ စားနပ်ရိက္ခာအခက်အခဲ ပိုမိုကြုံတေ့ွနေရတာလို့ လူမှုကူညီရေး အဖွဲ့တွေက ပြောကြပါတယ်။