ကျမ်းသစ္စာကိစ္စ အမြန်ဆုံးပြေလည်အောင် NLD ဆောင်ရွက်နေ

အမျိုးသား လွှတ်တော်ကိုယ်စားလှယ် ရခိုင်တိုင်းရင်းသားများ တိုးတက်ရေးပါတီ ဥက္ကဋ္ဌ ဒေါက်တာ အေးမောင်နဲ့ မနေ့က တက္ကသိုလ်ရိပ်သာလမ်း နေအိမ်မှာ တွေ့ဆုံခဲ့ရာမှာ အဲဒီလို ပြောကြားလိုက်တာပါ။

ဒါ့အပြင် ဒေါ်အောင်ဆန်းစုကြည်နဲ့ အဓိက သဘောတူခဲ့တဲ့ အချက်သုံးချက်ကို ဒေါက်တာအေးမောင်က-

" တစ်အချက်က လွှတ်တော်ရဲ့ ရေရှည်ထိရောက်မှုနဲ့ နိုင်ငံကောင်းကျိုးကို ကြည့်ပြီး ဆက်လုပ်သွားမှာ ဖြစ်ပါတယ်။ နောက်တစ်ခုက တိုင်းရင်းသားပါတီများ စတဲ့ မိတ်ဖက်ပါတီများနှင့် တသီးပုဂ္ဂလလွှတ်တော် ကိုယ်စားလှယ်များက လိုလိုလားလားနှင့် လွှတ်တော်သို့ ပါဝင်လာစေခြင်းကို ကျေးဇူးအထူးတင်ရှိပါတယ်။ နောက် သုံးအချက်က အမြန်ဆုံးပြေလည်အောင် ဆောင်ရွက်ရန် နှစ်ဘက်လုံးမှ သဘောတူကြပါတယ် " လို့ပြောပြပါတယ်။

NLD အနေနဲ့ ပြည်ထောင်စုလွှတ်တော်ကို တက်ရောက်နိုင်ဖို့ လွှတ်တော်တွင်း ဝိုင်းဝန်းကြိုးပမ်းနေတဲ့ တိုင်းရင်းသားနဲ့ ဒီမိုကရေစီ (၁၃) ပါတီ အပါအဝင် တသီးပုဂ္ဂလအမတ်တွေ ကိုယ်စားပြုပြီး ဒေါက်တာ အေးမောင်က ဒေါ်အောင်ဆန်းစုကြည်ကို သွားရောက်တွေ့ဆုံခဲ့တာပါ။

ဒါ့အပြင် ဧပြီလ (၂၅) ရက်နေ့ကလည်း အတိုက်အခံ လွှတ်တော်ကိုယ်စားလှယ်တွေ စုပေါင်းပြီး ပြည်သူ့လွှတ်တော် ဥက္ကဋ္ဌ သူရ ဦးရွှေမန်းဆီကို ပြေလည်အောင် ဆောင်ရွက်ပေးဖို့ မေတ္တာရပ်ခံစာ ပေးပို့ခဲ့ကြပါတယ်။

ပြည်ထောင်စုလွှတ်တော်ရဲ့ တတိယအကြိမ်မြောက် အစည်းအဝေးဟာ ဒီကနေ့မှာ တရားဝင် ပြီးဆုံးမှာဖြစ်ပေမယ့် အမျိုးသား ပြည်သူ့လွှတ်တော် ဆွေးနွေးပွဲတွေကို မေလ (၁) ရက်နဲ့ (၂) ရက်နေ့တွေအထိ ဆက်လက်ကျင်းပဖို့ ရှိပါတယ်။