တိုင်းရင်းသားကျေးရွာတွေ တည်ဆောက်ပေးမည်

ရခိုင်ပြည်နယ် မောင်တောဒေသမှာ မြို၊ ခမီ၊ သက်၊ ဒိုင်းနက် စတဲ့ တိုင်းရင်းသားလူမျိုးစုတွေအတွက် တိုင်းရင်းသားကျေးရွာတွေ ထပ်မံတည်ဆောက်ပေးသွားဖို့ရှိတယ်လို့ ရခိုင်ပြည်နယ်အစိုးရအဖွဲ့ အတွင်းရေးမှူး ဦးတင်မောင်ဆွေက ပြောပါတယ်။

တိုင်းရင်းသားလူနည်းစုတွေရဲ့ ရိုးရာမပျောက်ပျက်စေဖို့အတွက် တိုင်းရင်းသားကျေးရွာတွေကို ထပ်တိုး တည်ဆောက်ပေးသွားမှာဖြစ်တယ်လို့ ဦးတင်မောင်ဆွေက ပြောပါတယ်။

"ထပ်တိုးဖို့ဆိုတာက မြို၊ ဒိုင်းနက်၊ ခမီပေါ့ အဲ့မှာရှိတဲ့ လူနည်းစုတိုင်းရင်းသားတွေကို သူတို့ရဲ့ ရိုးရာယဉ်ကျေးမှု အမွေ မပျောက်ပျက်အောင် သူတို့ကို ကူညီထောက်ပံ့တဲ့အနေနဲ့ အိမ်ခြေ ၅၀ ၊ ၁၀၀ ရှိတဲ့ ကျေးရွာတွေကို ဆောက်လုပ်ပေးသွားမှာဖြစ်ပါတယ်"

မြို၊ ခမီ၊ သက်၊ ဒိုင်းနက် စတဲ့ တိုင်းရင်းသားလူမျိုးစုတွေဟာ တောတောင်ကို အမှီပြုနေထိုင်ကြတာဖြစ်တဲ့အတွက် သူတို့နဲ့ကိုက်ညီမယ့်နေရာဒေသကို ရှာဖွေတည်ဆောက်ပေးသွားမှာဖြစ်တယ်လို့ ပြောပါတယ်။

တည်ဆောက်မယ့် ကျေးရွာအရေအတွက်ကိုတော့ အသေးစိတ်စီမံဆောင်ရွက်နေဆဲဖြစ်ပြီး ဒီနှစ်အတွင်း အကောင်ထည်ဖော်နိုင်အောင် ဆောင်ရွက်နေတယ်လို့ပြောပါတယ်။

လတ်တလောမှာ ရခိုင်ပြည်နယ်အတွင်း အစိုးရက ဖော်ဆောင်ပေးထားတဲ့ တိုင်းရင်းသားကျေးရွာ ၂၀ ကျော်ရှိတယ်လို့ သိရပါတယ်။