မန္တလေး - မူဆယ် ကုန်တင်ခ ထက်ဝက်ကျော်မြင့်တက်

ရှမ်းမြောက် မူဆယ်ကိုသွားတဲ့လမ်းမှာ အခုရက်ပိုင်းမှာပဲ ကုန်ကားမောင်းသူနှစ်ဦး သေဆုံးခဲ့လို့ ကုန်ကား သမားတွေ မသွားရဲဖြစ်နေသလို ကုန်ပစ္စည်းတင်ပို့ခတွေ ဈေးတက်နေတာ ဖြစ်ပါတယ်။

အရင်က မန္တလေးကနေ မူဆယ်ကို ဖရဲ၊ သခွားမွှေး ကုန်ကား တစ်နေ့ကို အစီးရေ ရာချီရှိခဲ့ပေမယ့် အခုရက်ပိုင်းမှာ မူဆယ်ကို ကုန်ပို့လာတဲ့ သစ်သီးကုန်ကားစီးရေက ထက်ဝက်ခန့်လျော့ကျသွားပါတယ်။

အခုချိန်က မြန်မာနိုင်ငံကထွက်တဲ့ ဖရဲ၊ သခွားမွှေးကို တရုတ်ကဝယ်လိုအားရှိတဲ့ ရာသီဖြစ်တဲ့အချိန်မှာ အခုလို ကုန်သွယ်ရေးလမ်းကြောင်းတလျှောက်မှာ နယ်မြေမတည်ငြိမ်တာကြောင့် ကုန်စည်စီးဆင်းမှုမှာ နှောင့်နှေး ကြန့်ကြာမှုတွေဖြစ်ပြီး ကုန်ပို့ခဈေးနှုန်းတွေလည်း မြင့်တက်နေတာဖြစ်ပါတယ်။

တရုတ်-မြန်မာနယ်စပ် ကုန်သွယ်ရေးလမ်းကြောင်းမှာ အခုလ ၂၀ ရက်နေ့ကစပြီး ကချင်လွတ်မြောက်ရေး တပ်မတော် KIA ၊ အမျိုးသားဒီမိုကရက်တစ်မဟာမိတ်တပ်မတော်-ကိုးကန့်အဖွဲ့ MNDAA ၊ တအာင်းအမျိုးသား လွတ်မြောက်ရေးတပ်မတော် TNLA နဲ့ ရက္ခိုင့်တပ်မတော် AA တို့က ပူးပေါင်းထိုးစစ်ဆင်တိုက်ခိုက်ရာကနေ နယ်စပ်ကုန်သွယ်ရေးလမ်းကြောင်း ပြတ်တောက်သွားခဲ့ပါတယ်။