ကနီမြို့နယ်က မိသားစုအသတ်ခံရမှု တရားမျှတမှုရဖို့ ဆောင်ရွက်မယ်လို့ NUG ထုတ်ပြန်

RFA Burmese
2024.11.05
ကနီမြို့နယ်က မိသားစုအသတ်ခံရမှု တရားမျှတမှုရဖို့ ဆောင်ရွက်မယ်လို့ NUG ထုတ်ပြန် စစ်ကိုင်းတိုင်း ကနီမြို့နယ် ပညာရေးအဖွဲ့တာဝန်ခံ ဦးဝင်းဌေးအား တွေ့ရစဉ်။
Board of Kani Education

စစ်ကိုင်းတိုင်း ကနီမြို့နယ် ပညာရေးအဖွဲ့တာဝန်ခံ ဦးဝင်းဌေးနဲ့ သုံးလအရွယ် သမီးအပါအဝင် မိသားစုဝင်သုံးဦး သတ်ဖြတ်ခံရတာကို ကန့်ကွက်ရှုတ်ချကြောင်းနဲ့ တရားမျှတမှုရရှိရေး သက်ဆိုင်အဖွဲ့အစည်းတွေနဲ့ ပူးပေါင်းဆောင်ရွက်သွားမယ်လို့ အမျိုးသားညီညွတ်ရေးအစိုးရ (NUG) ပညာရေးဝန်ကြီးဌာနက နိုဝင်ဘာ ၅ ရက်နေ့မှာ ထုတ်ပြန်ပါတယ်။

ကနီမြို့နယ်၊ ပညာရေးအဖွဲ့တာဝန်ခံ ဦးဝင်းဌေးဟာ တပုန်းကျေးရွာနေအိမ်မှာ ဇနီးဖြစ်သူ ဒေါ်ခြိမ့်ခြိမ့်သဲဝေနဲ့ သုံးလအရွယ်သမီး မရွှေဝတ်ရည်လွှာတို့နဲ့အတူ နိုဝင်ဘာလ ၄ ရက်နေ့ညက ရက်ရက်စက်စက် သတ်ဖြတ်ခံခဲ့ရတာလို့လည်း ဆိုပါတယ်။

ဦးဝင်ဌေးနဲ့ သူမိသားစု သတ်ဖြတ်ခံရတဲ့အတွက် မိသားစုနဲ့ ထပ်တူ ဝမ်းနည်းကြောင်းနဲ့ ပညာရေးဝန်ကြီးဌာနအနေနဲ့ အမှုမှန်ပေါ်ပေါက်ရေးနဲ့ အမိန့်ပေးစေခိုင်းသူတွေ၊ ကျူးလွန်သူတွေအားလုံးကို ဖော်ထုတ်သွားမယ်လို့လည်း ရေးသားထားပါတယ်။

သူတို့သတ်ဖြတ်ခံရတာနဲ့ ပတ်သက်ပြီး အသေးစိတ်မှတ်တမ်းတင်ပြီး တရားမျှတမှုရရှိဖို့ ထိထိရောက်ရောက် ကြိုးပမ်းဆောင်ရွက်သွားမယ်လို့လည်း ရေးသားထားပါတယ်။ လက်ရှိအချိန်ထိ ဘယ်အဖွဲ့က သတ်ဖြတ်သွားတယ်ဆိုတာကို မသိရသေးပါဘူး။

၂၀၂၄ ခုနှစ် ဇန်နဝါရီလ ၁ ရက်နေ့ကနေ အောက်တိုဘာလ ၃၁ ရက်နေ့အထိ ဆယ်လအတွင်း စစ်ကိုင်းတိုင်းမှာ စစ်ကောင်စီရဲ့ သတ်ဖြတ်မှုကြောင့် အရပ်သား ၄၅၀ နီးပါး သေဆုံးခဲ့တယ်လို့ နိုင်ငံရေးအကျဉ်းသားများ ကူညီစောင့်ရှောက်ရေးအသင်း (AAPP) က နိုဝင်ဘာလ ၁ ရက်နေ့မှာ သတင်းထုတ်ပြန်ပါတယ်။

ဆက်နွယ်သောသတင်းများ
သတင်းများ
မှတ်ချက်ပေးပို့ရန်

မှတ်ချက်များကို အောက်ပါ ပုံစံတွင် ရေးသားနိုင်ပါသည်။ RFA ၏ အသုံးပြုခြင်းဆိုင်ရာ စည်းမျဉ်းစည်းကမ်းများနှင့် အညီ လိုအပ်လျှင် တည်းဖြတ်ပြီး ဖော်ပြပါမည်။ မှတ်ချက်များကို ရေးပြီးပြီးချင်း ချက်ခြင်း မြင်ရမှာ မဟုတ်ပါ။ တင်ပြထားသော မှတ်ချက်ပါ အကြောင်းအရာများ အတွက် RFA မှာ တာဝန်မရှိပါ။ ကျေးဇူးပြု၍ တခြား မှတ်ချက်ရေးသူများ၏ အမြင်ကို လေးစားပြီး အကြောင်းအရာကိုသာ အဓိကထား ရေးသားစေလိုပါသည်။