နယ်စပ်ဖြတ်ကျော် ရာဇဝတ်မှုတွေနှိမ်နင်းရေး မြန်မာနဲ့ပူးပေါင်းမှု တိုးမြှင့်မယ်လို့ တရုတ်ပြော

နှစ်နိုင်ငံ နယ်စပ်ဖြတ်ကျော် ရာဇဝတ်မှုတွေနှိမ်နင်းရေး နှစ်နိုင်ငံ ပူးပေါင်းဆောင်ရွက်မှုတွေ တိုးမြှင့်မယ်လို့ တရုတ်ပြည်သူ့လုံခြုံရေးဆိုင်ရာဝန်ကြီး Wang Xiaohong က စစ်ကောင်စီ ပြည်ထဲရေးဝန်ကြီး ဒုတိယဗိုလ်ချုပ်ကြီး ရာပြည့်နဲ့ ဧပြီလ ၂၅ ရက်နေ့က တရုတ်နိုင်ငံ ပေကျင်းမြို့မှာတွေ့ဆုံစဥ် ပြောဆိုပါတယ်။

ဒေသတွင်း လုံခြုံရေး၊ တည်ငြိမ်ရေးနဲ့ ဖွံ့ဖြိုးတိုးတက်မှုတွေ ရှိဖို့တွက် လောင်းကစားမှု၊ မူးယစ်ဆေးဝါး ရောင်းဝယ်ဖောက်ကားမှုတွေနဲ့ တခြား နယ်စပ်ဖြတ်ကျော်မှုခင်းတွေကို တိုက်ဖျက်ရေးအတွက် ပူးပေါင်းဆောင်ရွက်မှုတွေ တိုးမြှင့်သွားဖို့ အဆင့်သင့်ရှိတဲ့အကြောင်း Wang ပြောကြားခဲ့တယ်လို့ ဆင်ဟွာသတင်းက ဖော်ပြပါတယ်။

လက်ရှိမှာလည်း တရုတ်-မြန်မာ ပူးပေါင်းဆောင်ရွက်မှုတွေက အွန်လိုင်းလိမ်ဂိုဏ်းတွေနဲ့ ဆက်နွယ်တဲ့ ရာဇဝတ်မှုတွေကို နှိမ်နင်းရာမှာ ထင်ရှားတဲ့ အောင်မြင်မှုတွေ ရရှိတယ်လို့ သူကဆိုပါတယ်။

ဒုတိယဗိုလ်ချုပ်ကြီး ရာပြည့်ကတော့ နှစ်နိုင်ငံအကြား လုံခြံရေးနဲ့ တရားဥပဒေစိုးမိုးရေးဆိုင်ရာ ပူးပေါင်းဆောင်ရွက်မှုတွေကနေ ဒီထက်ပိုပြီး ရလဒ်ကောင်းတွေ ထွက်ပေါ်လာအောင် မြန်မာဘက်က ဆောင်ရွက်ဖို့ဆန္ဒရှိတဲ့အကြောင်း ပြောခဲ့တယ်လို့ ဆင်ဟွာသတင်းက ဖော်ပြပါတယ်။

တရုတ်-မြန်မာ ဆက်ဆံရေးကိုလည်း တရုတ်နိုင်ငံက မဟာဗျူဟာမြောက်ရှုထောင့်ကနေ အမြဲတမ်းရှုမြင်ပြီး နှစ်နိုင်ငံ ဆက်ဆံရေးတိုးတက်အောင် လုပ်ဆောင်နေတယ်လို့ Wang Xiaohong က ပြောပါတယ်။

နယ်စပ်ဒေသက အွန်လိုင်းငွေလိမ်ဂိုဏ်းတွေနဲ့ ဆက်စပ်လို့ တရုတ်နိုင်ငံသား ငါးသောင်းကျော် (၅၀,၇၇၂ဦး)ကို ၂၀၂၃ ခုနှစ် အောက်တိုဘာလ ၅ ရက်ကနေ ၂၀၂၄ မတ်လ ၅ ရက်ထိ ငါးလအတွင်းမှာ လွှဲပြောင်းပေးခဲ့ကြောင်း စစ်ကောင်စီက ထုတ်ပြန်ထားပါတယ်။