Facebook က ကာကွယ်ရေးဦးစီးချုပ်နဲ့ အကောင့်အတော်များများကို ပိတ်ပင်

တပ်မတော်ကာကွယ်ရေးဦးစီးချုပ် ဗိုလ်ချုပ်မှူးကြီးမင်းအောင်လှိုင်ရဲ့ ဖေ့စ်ဘွတ် စာမျက်နှာ အပါအဝင် တခြား ဖေ့စ်ဘွတ်အကောင့် ၁၈ ခု၊ ဖေ့စ်ဘွတ် စာမျက်နှာ Pages ၅၂ ခုနဲ့ အင်စတာဂရမ် Instagram အကောင့် ၁ ခုကို ဖေ့စ်ဘွတ်ကုမ္ပဏီကနေ ဖယ်ရှားပိတ်ပင်လိုက်ကြောင်း ဒီနေ့ သတင်းထုတ်ပြန် လိုက်ပါတယ်။

မြန်မာနိုင်ငံမှာ အမုန်းတရားတွေနဲ့ သတင်းအမှားတွေ ဖြန့်ဖြူးနေတာကို ကာကွယ်လိုတဲ့အတွက် လိုအပ်တဲ့ အရေးယူဆောင်ရွက်မှုတွေ လုပ်နိုင်ဖို့ Facebook က ကြိုးပမ်းနေရာမှာ နှောင့်နှေးကြန့်ကြာခဲ့ကြောင်းနဲ့ အခုတော့ ဖေ့စ်ဘွတ်ဘက်က တိုးတက်မှုကို ပြသနိုင်ပြီဖြစ်ကြောင်း ပြောပါတယ်။

အခု ပိတ်ပင်ခံရတဲ့ လူပုဂ္ဂိုလ်တွေ တာဝန်ရှိသူတွေနဲ့ အဖွဲ့အစည်းတွေဟာ လူ့အခွင့်အရေးချိုးဖောက်သူတွေ အဲဒီလိုချိုးဖောက်အောင် ပြုလုပ်သူတွေအဖြစ် UN Human Rights Council ကုလသမဂ္ဂ လူ့အခွင့်အရေးကောင်စီက အသိအမှတ်ပြုထားတဲ့ မြန်မာနိုင်ငံအရေးနဲ့ ပတ်သက်ပြီး အချက်အလက်ရှာဖွေရေးအဖွဲ့ Fact-Finding Mission က တွေ့ရှိထားကြောင်းလည်း ဖော်ပြထားပါတယ်။

ဖေ့စ်ဘွတ်ကို အသုံးချပြီး နောင်မှာ လူမျိုးရေး ဘာသာရေး မီးတောက်တွေ ဖြစ်လာအောင် မဖန်တီးနိုင်ရေးအတွက် အခုလို ကာကွယ်တားဆီးလိုက်တာဖြစ်ကြောင်း ဖေ့စ်ဘွတ်ကြေညာချက်မှာ ဖော်ပြထားပါတယ်။