အပစ်ခတ်အမြန်ရပ်ဖို့ EU သံအမတ်ကြီးတွေ တောင်းဆို

ကချင်ပြည်နယ်၊ ရှမ်းပြည်နယ်မြောက်ပိုင်းနဲ့ ကရင်ပြည်နယ်ဒေသတချို့မှာ အရပ်သားပြည်သူတွေရဲ့ အသက်အိုးအိမ် ကို ကာကွယ်စောင့်ရှောက်နိုင်ဖို့ လက်နက်ကိုင် အဖွဲ့အစည်းတွေအနေနဲ့ အပြန်အလှန် ရင်ဆိုင်တိုက်ခိုက်တာတွေ အမြန်ရပ်နားကြဖို့ NCA တရားဝင် အသိသက်သေတွေဖြစ်ကြတဲ့ မြန်မာနိုင်ငံဆိုင်ရာ ဥရောပသမဂ္ဂ ကိုယ်စား လှယ်တွေနဲ့ သံအမတ်ကြီးတွေက ဒီကနေ့ တောင်းဆိုလိုက်ပါတယ်။

ကချင်၊ ရှမ်းပြည်နယ်မြောက်ပိုင်းနဲ့ ကရင်ပြည်နယ်တွေမှာ လက်နက်ကိုင် စစ်မက်ဖြစ်ပွားနေတာတွေ တစတစ အရှိန်မြင့်တက်လာနေတဲ့အတွက် အရပ်သားတစ်သောင်းကျော် နေရပ်စွန့်ခွါ ထွက်ပြေးနေရကြောင်း၊ ပဋိပက္ခဖြစ် ပွားရာ နယ်မြေဒေသမှာရှိတဲ့ ဒေသခံ ရပ်ရွာလူထု အသိုင်းအဝိုင်းရဲ့ အခြေအနေဟာ အလွန်စိုးရိမ်ဖွယ် ရာဖြစ်နေကြောင်း၊ ဒေသခံတွေအနေနဲ့ အသက်အိုးအိမ် ပိုင်ဆိုင်မှုနဲ့ လုပ်ငန်းတွေပါ ဆုံးရှုံးနေရကြောင်း၊ တိုက်ပွဲတွေမှာ တိုက်ခိုက်ရေး အင်အားအလွန်အမင်း သုံးစွဲခြင်း၊ အရပ်သားများ ဘေးလွတ်ရာ ထွက်ပြေးနိုင်ဖို့ အတားအဆီးတွေ များလွန်းနေခြင်း၊ လူသားချင်းစာနာမှု အကူညီ အငြင်းပယ်ခံရခြင်းစတဲ့ သတင်းတွေ ကြားသိနေရတဲ့အတွက် စိုးရိမ်ကြောင်းလည်း ဒီကနေ့ ထုတ်ပြန်တဲ့ EU သံအမတ်ကြီးတွေရဲ့ ကြေညာချက်မှာ ဖော်ပြထားပါတယ်။