ငြိမ်းချမ်းရေးရန်ပုံငွေကို ချွေတာဖို့ နိုင်ငံတော်အတိုင်ပင်ခံပုဂ္ဂိုလ်ပြော

နိုင်ငံတော်အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်ဟာ ငြိမ်းချမ်းရေးလုပ်ငန်းစဉ် ရန်ပုံငွေဆိုင်ရာ ပေါင်းစပ် ညှိနှိုင်းရေးအဖွဲ့ JBC မှာ ဥက္ကဌ တာဝန်ကို ယူထားတာဖြစ်ပါတယ်။

JBC မှာ အစိုးရ၊ တပ်မတော်၊လွှတ်တော်ဘက်က ကိုယ်စားလှယ် ၈ဦး၊ NCA အပစ်ရပ်စာချုပ်လက်မှတ် ထိုးထားတဲ့ အဖွဲ့တွေဘက်က ၄ ဦး၊ NCA စာချုပ် လက်မှတ်မထိုးထားတဲ့ UNFC အဖွဲ့က ၂ ဦးနဲ့ ၀ နဲ့ မိုင်းလားအဖွဲ့က ကိုယ်စား လှယ် ၂ ဦး စုစုပေါင်း ၁၆ ဦးနဲ့ ဖွဲ့စည်းထားပါတယ်။

နိုင်ငံတော်အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်က မြန်မာနိုင်ငံရဲ့ ငြိမ်းချမ်းရေးလုပ်ငန်းကို နိုင်ငံတကာက လာရောက်အကူအညီပေးတဲ့အခါမှာ ကူညီတာသာဖြစ်စေလိုပြီး နိုင်ငံတကာက သူတို့လိုချင်တဲ့ ပုံစံအတိုင်း ပံ့ပိုးတာ ထိန်းချုပ်တာမျိုးမဖြစ်စေချင်ဘူးလို့ ပြောခဲ့ကြောင်း အစည်းအဝေး တက်ရောက်ခဲ့တဲ့ KNU အထွေထွေ အတွင်းရေးမှူး ပဒိုစောကွယ်ထူးဝင်းက ပြောပါတယ်။

ဒီနေ့ ကျင်းပတဲ့ ဒုတိယအကြိမ်မြောက် JBC အစည်းအဝေးကို ဝနဲ့ မိုင်းလားအဖွဲ့က ကိုယ်စားလှယ် နှစ်ဦး တက်ရောက်ခဲ့ပေမယ့် NCA အပစ်ရပ်စာချုပ် လက်မှတ်မထိုးထားတဲ့ UNFC အဖွဲ့က ကိုယ်စားလှယ်နှစ်ဦး မတက်ရောက်နိုင်ခဲ့ပါဘူး။

ငြိမ်းချမ်းရေးလုပ်ငန်းတွေအတွက် နိုင်ငံတကာကနေ ကူညီထောက်ပံ့ပေးတဲ့ ငွေကြေးတွေကို လိုအပ် တဲ့နေရာတွေမှာ အဖွဲ့အစည်းအားလုံး ထိရောက်မျှတအောင် အသုံးချနိုင်ဖို့ ရည်ရွယ်ပြီး ငြိမ်းချမ်းရေးလုပ်ငန်းစဉ် ရန်ပုံငွေဆိုင်ရာ ပေါင်းစပ်ညှိုနှိုင်းရေးအဖွဲ့ JBC ကိုပြီးခဲ့တာ ဒီဇင်ဘာလ ၂၀ ရက်နေ့က နေပြည်တော်မှာ ဖွဲ့စည်း ခဲ့တာဖြစ်ပါတယ်။