ရွေးကောက်ပွဲကော်မရှင် ဥက္ကဌ နဲ့ ဒေါ်အောင်ဆန်းစုကြည် တွေ့ဆုံ

အမျိုးသားဒီမိုကရေစီအဖွဲ့ချုပ် ဥက္ကဌ ဒေါ်အောင်ဆန်းစုကြည်နဲ့ ပြည်ထောင်စု ရွေးကောက်ပွဲကော်မရှင် ဥက္ကဌ ဦးတင်အေးတို့ နေပြည်တော် ပြည်ထောင်စုရွေးကောက်ပွဲကော်မရှင်ရုံးမှာ ဒီကနေ့ တွေ့ဆုံခဲ့ပါတယ်။

ရွေးကောက်ပွဲကာလမှာ ဆောင်ရွက်ပေးခဲ့တာတွေနဲ့ ပတ်သက်ပြီး ကျေးဇူးတင်ကြောင်းနဲ့ ရွေးကောက်ပွဲကာလမှာ အသိပညာပေးလုပ်ငန်းတွေ အားနည်းတာတွေရှိခဲ့ကြောင်း ဒေါ်အောင်ဆန်းစုကြည်က ပြောခဲ့တယ်လို့ တွေ့ဆုံပွဲမှာ ပါဝင်ခဲ့တဲ့ ပြည်ထောင်စုရွေးကောက်ပွဲ ကော်မရှင်အဖွဲ့ဝင် ဦးစိုင်းခမ်းဝင်း က ပြောပါတယ်။

"တွေ့ဆုံပြီးတော့ ရွေးကောက်ပွဲကာလမှာ လုပ်ပေးတဲ့အတွက် ကျေးဇူးတင်တဲ့အကြောင်းပေါ့ ဗျာ၊ ရွေးကောက်ပွဲပြီးတဲ့နောက်ပိုင်းမှာ တွေ့ဆုံဖို့လိုအပ်တဲ့ပုဂ္ဂိုလ်တွေကို လိုက်တွေ့တဲ့သဘော ပါပဲ၊ ရွေးကောက်ပွဲကာလမှာ ဘယ်လိုတွေဆောင်ရွက်ခဲ့တယ်ပေါ့၊ ဒီရွေးကောက်ပွဲအချိန်မှာ အဓိကကတော့ မဲအသိပညာပေးလုပ်ငန်းတွေ အားနည်းတဲ့အကြောင်းတွေ ထည့်ပြောပါတယ်၊ အထွေအထူးတော့မရှိပါဘူး၊ ပညာပေးလုပ်ငန်းတွေလုပ်ငန်းတွေ များများလုပ်ဖို့လိုတယ်ဆိုတဲ့ အကြောင်းတွေပေါ့"

ဒေါ်အောင်ဆန်းစုကြည်နဲ့ ပြည်ထောင်စု ရွေးကောက်ပွဲကော်မရှင် ဥက္ကဌတို့ သီးသန့်တွေ့ဆုံတာ ဒါပထမဆုံး အကြိမ်ဖြစ်ပြီး တစ်နာရီနီးပါးကြာမြင့်ခဲ့ပါတယ်။