နစ်မြုပ်ခဲ့တဲ့ အောင်စိုးမိုးကျော် ရေ ယာဉ်မောင်းသူ လာရောက်ဖမ်းဆီး ခံ

စစ်ကိုင်းတိုင်းဒေသကြီး ကနီမြို့နယ် မိကျောင်းတွင်းကျေးရွာအနား နစ်မြုပ်ခဲ့တဲ့ အောင်စိုးမိုးကျော် ရေယာဉ်မောင်း သူ ပိုင်ရှင် ဦးဇော်မျိုးဝင်းဟာ တိုင်းရဲတပ်ဖွဲ့ထံမှာ ဒီနေ့ လာရောက်အဖမ်းခံခဲ့ပါတယ်။

တမူးမြို့ဘက်ကို ထွက်ပြေးနေရာကနေ လာရောက်အဖမ်းခံတာဖြစ်ကြောင်း ကနီမြို့နယ် ရဲမှူး တင်မောင်မြင့် က ပြောပါတယ်။

"အရင်ကတော့ သူကြောက်လို့ဆိုပြီး တမူးဘက်ကို ထွက်ပြေးခဲ့တာပေါ့။ အခုတော့သူ ရေယာဉ်အသင်း ကရော ပြန်ခေါ်လို့ သူပြန်လာပြီးတော့ အဖမ်းခံတာပါခင်ဗျ။ စက်လှေနစ်မြုပ်မှုကတော့ သူတို့ရဲ့ ပေါ့ဆ မှုကြောင့်ပေါ့ဗျာ။ ဒါကတော့ သိပ်ပြီးတော့ ထွေထွေထူးထူးမရှိပါဘူး။ ရှင်းနေတာပါပဲ။ ရဲစစ်ဆေး ဖို့ကတော့ အချိန်ကာလ ၁ လရပါတယ်ခင်ဗျ။ ရက် ၂၀ အတွင်းမှာ အပြီးစစ်ဆေးပြီးတော့ ကျွန်တော်တို့ ဥပဒေအကြံတောင်းတင်ပြီး တရားစွဲတင်မှာပါခင်ဗျ။ အမြန်ဆုံး ၊ အဲ့တော့မှ သူတို့ တရားရုံးက စစ်ဆေးမှာပါ။"

လာရောက်အဖမ်းခံသူ ဦးဇော်မျိုးဝင်းကို ယင်းမာပင်ခရိုင် မြို့မရဲစခန်းမှာ ဖမ်းဆီးထားတယ်လို့ သိရပါတယ်။

စက်လှေနစ်မြုပ်စဉ်က ဖမ်းဆီးထားတဲ့ လှေမော်တော်လုပ်သား ၄ ဦးကိုတော့ ကနီမြို့နယ်ရဲစခန်းမှာ ဖမ်းဆီးထားတာ ဖြစ်ပါတယ်။

ဖမ်းဆီးခံထားရသူ ၅ဦးကို ရာဇသတ်ကြီးပုဒ်မ ၂၈၀ ရေယာဉ်ကို အရမ်းမောင်းနှင်မှု၊ ပုဒ်မ ၃၀၄(က)/ ၁၁၄ ပေါ့ဆမှုကြောင့်  လူသေမှု နဲ့ အမှုဖွင့်အရေးယူထားပါတယ်။

ကနီမြို့နယ် မိကျောင်းတွင်းကျေးရွာနားမှာ အောက်တိုဘာ ၁၅ ရက်နေ့က အောင်စိုးမိုးကျော် ရေယာဉ်နစ်မြုပ်ရာ မှာ သေဆုံးသူ ၇၀ ကျော်ရှိပြီး အသက်ရှင်ကျန်သူ ၁၅၅ဦး ရှိပါတယ်။