မုံရွာ-ချောင်းဦး ကားလမ်းမှာ စစ်ကောင်စီကားနှစ်စီး မိုင်းခွဲခံရ

စစ်ကိုင်းတိုင်း၊ မုံရွာနဲ့ ချောင်းဦးသွား ကားလမ်းမှာ စစ်ကောင်စီတပ်ဖွဲ့ရဲ့ ကားနှစ်စီးကို ဒေသကာကွယ်ရေးတပ်ဖွဲ့ PDF တွေက ဇန်နဝါရီ ၂၁ ရက် မနေ့ညနေက မိုင်းဆွဲ တိုက်ခိုက်ခဲ့လို့ စစ်ကောင်စီတပ်သားတွေ ထိခိုက်သေဆုံးတာ၊ ဒဏ်ရာရတာတွေ ရှိခဲ့တယ်လို့ ချောင်းဦးမြို့နယ် ပြည်သူကာကွယ်ရေးတပ်ဖွဲ့ PDF နဲ့ Immortal Guerilla Force IGF – Monywa အဖွဲ့က ထုတ်ပြန်ပါတယ်။

မနေ့က ညနေ ခြောက်နာရီလောက်မှာ တိုက်ခိုက်ခဲ့တာဖြစ်ပြီး စစ်ကောင်စီတပ်ဘက်က လက်နက်ကြီးတွေနဲ့ရော သေနတ်နဲ့ပါ အနီးပတ်ဝန်းကျင်ကို ပစ်ခတ်ခဲ့လို့ အရပ်သား ပြည်သူတစ်ဦး သေနတ်ကျည် ထိမှန်သေဆုံးခဲ့ရတယ်လို့ ထုတ်ပြန်ချက်ထဲမှာ ဖော်ပြထားပါတယ်။

စစ်ကောင်စီဘက်က ထိခိုက်သေဆုံးခဲ့တဲ့သူတွေကို မုံရွာမြို့ဆီ အိမ်စီးကားတွေနဲ့ ည ၁၂ နာရီ ထိုးတဲ့အချိန်အထိ သယ်ခဲ့ကြရသလို ထိခိုက်ဒဏ်ရာရသူ သေဆုံးသူ အရေအတွက် အတိအကျတော့ မသိရဘူးလို့ ထုတ်ပြန်ပါတယ်။

ဒီဖြစ်စဉ်နဲ့ပတ်သက်ပြီး RFA က သီးခြားအတည်မပြုနိုင်သေးသလို စစ်ကောင်စီပြောခွင့်ရ ပြန်ကြားရေး ဒု-ဝန်ကြီး ဗိုလ်ချုပ် ဇော်မင်းထွန်းကို ဆက်သွယ်မေးမြန်းဖို့ ကြိုးစားနေ ပါတယ်။

ခုလိုတိုက်ပွဲတွေ ဖြစ်ပွားနေတဲ့အချိန်အတွင်း ဒေသခံပြည်သူတွေအနေနဲ့ စစ်သားတွေရဲ့ အနီးတစ်ဝိုက်မှာ နေထိုင်သွားလာတာတွေ မလုပ်ကြဖို့ကိုလည်း ချောင်းဦးမြို့နယ် PDF က သတိပေးထားပါတယ်။