ဒေါ်အောင်ဆန်းစုကြည် မြန်မာ့ရွှေ့ပြောင်း အလုပ်သမားအရေး အလေးပေး ဆွေးနွေး

မနေ့က စမွတ်ဆာခွန်ခရိုင် မဟာချိုင်က မြန်မာရွေ့ပြောင်းအလုပ်သမားများ ယာယီပတ်စ်ပို့ ထုတ်ပေးရေးရုံးမှာ ပြောကြားခဲ့တဲ့ မိန့်ခွန်းမှာ အခုလို ထည့်သွင်းပြောဆိုခဲ့တာပါ။

"ဒုတိယ ဝန်ကြီးချုပ်နဲ့လည်း တွေ့ခဲ့ပါတယ်။ တွေ့ခဲ့တဲ့ အကြောင်းအရင်းကလည်းပဲ ကျွန်မတို့ရဲ့ ရွေ့ပြောင်း အလုပ်သမားတွေရဲ့အခြေအနေကို ကောင်းလာအောင်လို့ ဘယ်လို ပေးနိုင်မလဲ ဆိုတာကို ဆွေးနွေးတာပါ။ အဲဒီဆွေးနွေးချက် အရတော့ အတတ်နိုင်ဆုံး ကျွန်မတို့ ရွှေ့ပြောင်းအလုပ်သမားတွေရဲ့ ပြေလည်ရေးအတွက်ပေါ့။ ဥပမာအားဖြင့် ဆိုလို့ရှိရင် သားသမီးတွေကို ဒေသခံထားကျောင်းတွေမှာ စာသင်ရေး စသည်ဖြင့်ပေါ့နော်၊ ပြေလည်နိုင်မဲ့ ကိစ္စတွေကို လုပ်ပေးပါမယ် ဆိုပြီးတော့ ကျွန်မတို့ ပြောပါတယ်"

မြန်မာ့ ဒီမိုကရေစီခေါင်းဆောင် ဒေါ်အောင်ဆန်းစုကြည်ဟာ မနေ့က ထိုင်း ဒုတိယ ဝန်ကြီးချုပ်နဲ့ တွေ့ဆုံစဉ် မြန်မာ့ရွှေ့ပြောင်း အလုပ်သမားတွေရဲ့အရေးကို အလေးပေး ဆွေးနွေးခဲ့ပါတယ်။

အဲဒီတွေ့ဆုံဆွေးနွေးပွဲ အပြီးမှာ မဟာချိုင်က အလုပ်သမားတွေရဲ့အခြေအနေကို ဒေါ်အောင်ဆန်းစုကြည်ဟာ ဒုတိယမြောက်နေ့အဖြစ် သွားရောက်လေ့လာခဲ့ပြီး မဟာချိုင်က နိုင်ငံသား စိစစ်ရေးရုံးမှာ ထိုင်း၊ မြန်မာ တာဝန်ရှိသူတွေနဲ့လည်း တွေ့ဆုံ ဆွေးနွေးခဲ့ပါတယ်။